ភ្នំពេញ ៖ ព្រឹត្តិការណ៍ HUN Sen-Cupវគ្គ១៦ក្រុមចុងក្រោយ ពូល A និង ពូល B បានបញ្ចប់ការប្រកួតជម្រុះក្នុងពូល ហើយក្រុមដែលបានឡើងត្រៀមលេងបន្តវគ្គ៨ក្រុមចុងក្រោយ និងក្រុមដែលហាលអាវវេចបង្វេចទៅផ្ទះវិញហើយ។
ក្រុមអគ្គស្នងការដ្ឋាននគរបាល់ជាតិ ក្នុងការប្រកួតចុងក្រោយនៃពូលAនេះ បានលេងឈ្នះក្រុមខេត្តក្រចេះ៤ទល់០។ ក្រុមខេត្តក្រចេះហាលអាវត្រឹមនេះ ដោយស្ថិតនៅបាតតារាង ឯក្រុមអគ្គស្នងការដ្ឋាននគរបាលជាតិ៣ប្រកួតឈ្នះទាំង៣ប្រកួត មាន៩ពិន្ទុ ស្ថិតនៅកំពូលតារាង។
ចំពោះក្រុម Albirex Niigata ប្រកួតឈ្នះក្រុមខេត្តត្បូងឃ្មុំ១ទល់០។ ក្រុមខេត្តត្បូងឃ្មុំហាលអាវត្រឹមនេះ ឯក្រុមAlbirex Niigata ៣ប្រកួតឈ្នះ២ប្រកួតចាញ់មួយប្រកួតបានលេខ២ក្នុងពូល ត្រៀមលេងបន្តវគ្គ៨ក្រុមចុងក្រោយដែរ។
ដោយឡែក ការប្រកួតក្នុងពូលBក្រុមបៀលប្រាយយូណាយធីត លេងចាញ់ក្រុម Tri Asia ០ ទល់២។ ៣ប្រកួតរបស់Tri Asia ឈ្នះ២ប្រកួតស្មើមួយប្រកួតមាន៧ពិន្ទុ ឈរនៅចំណាត់ថ្នាក់លេខ១ ក្នុងពូលB ។ ចំណែកក្រុមបៀលប្រាយយូណាយធីត៣ប្រកួតឈ្នះ៣ប្រកួត ចាញ់១ ប្រកួតមាន៦ ពិន្ទុបានលេខ២ក្នុងពូល។ ក្រុមទាំង២នេះ ឡើងលេងបន្តវគ្គ៨ក្រុមចុងក្រោយ។
មួយប្រកួតទៀតរបស់ពូលB ក្រុមគីរីវង់សុខសែនជ័យលេងស្មើជាមួយខេត្តកំពត១ទល់១។ ក្រុមទាំង២នេះ វេចបង្វេចត្រឡប់ទៅផ្ទះវិញដូចគ្នា។ នៅវគ្គ៨ក្រុមចុងក្រោយ អគ្គស្នងការដ្ឋាននគរបាលជាតិលេខ១ពូលA ត្រូវជួបប្រកួតជាមួយក្រុមបៀលប្រាយយូណាយធីតលេខ២ពូលB ឯ Albirex Niigata លេខ២ ពូលA ត្រូវប្រកួតជាមួយក្រុម Tri Asia លេខ១ ពូលB៕
វិសិទ្ធ(រូប១)
0 Comments