ភ្នំពេញ ៖ ព័ត៌មានស្ដីពីការឈឺចិត្តស្អិតទ្រូងដោយសាររឿងបែកស្នេហាចាស់របស់កញ្ញា នី មុនីនាថ អាចនឹងលែងកើតមានទៀតហើយ បន្ទាប់ពីតារាស្រីរូបនេះត្រូវបានគេឃើញបណ្ដើរបុរសសង្ហា វ័យក្មេងស្រស់ស្អាតម្នាក់ទៅចូលរួមពិធីកាត់ចំណងដៃនៃមង្គលការរបស់តារាចម្រៀង ឆៃ លីដាឡែន កាលពីសប្ដាហ៍មុននៅកោះពេជ្ររាជធានីភ្នំពេញ។
ការបណ្ដើរបុរសដែលជាគូរស្នេហ៍ថ្មីរបស់កញ្ញា នី មុនីនាថ ត្រូវបានគេនិយាយថា ក្រោយពីអតីតតារាសម្ដែង លោក កែវ កុសល ត្រៀមរៀបការជាមួយនឹងអ្នកមេម៉ាយម្ចាស់ហាងកាត់ដេរនោះ នាងមិនបានបង្អង់យូរក្នុងការជ្រើសរើសគូស្នេហ៍ថ្មីទេ។
នៅក្នុងរយៈពេលកន្លងមកតារាសម្ដែង លោក កែវ កុសល ដែលល្បីថាមានទំនាក់ទំនងយ៉ាងជ្រាលជ្រៅជាច្រើនឆ្នាំហើយជាមួយកញ្ញា នី មុន្នីនាថនោះ បានសម្រេចចិត្តភ្ជាប់ពាក្យជាមួយនារីផ្សេងហើយ កាលពីថ្ងៃទី២០ ខែធ្នូ ឆ្នាំ២០១៥ បន្ទាប់ពីដំណឹងស្នេហាប្រេះឆារបស់អ្នកទាំងពីរបានផ្ទុះឡើងកាលពីពាក់កណ្ដាលឆ្នាំមុន។ ក្នុងពិធីមង្គលការតារាចម្រៀងឆៃ លីដាឡែន កញ្ញានី មុនីនាថ បានបង្ហាញពីទឹកមុខញញឹមបិទមាត់មិនជិតឡើយ ដែលបង្ហាញថានាងមិនមានជំងឺឈាមកកក្នុងទ្រូងដូចគេលើកឡើងឡើយ ព្រោះតែបានបណ្ដើរបុរសសង្ហាវ័យក្មេងម្នាក់យ៉ាងជិតស្និទ្ធ។
អ្នកយកព័ត៌មាន«កម្ពុជាថ្មី»នៅមិនទាន់អាចស្វែងរកការបញ្ជាក់ពីតារាសម្ដែងរូបនេះបាននៅឡើយទេកាលពីម្សិលមិញ។ ប៉ុន្តែបើយោងតាមការបញ្ជាក់ពីអ្នកស្និទ្ធនឹងនាងលើកឡើងថា បុរសនោះពិតជាគូស្នេហ៍ថ្មីរបស់ នី មុនីនាថ ដែលនាងទើបរកបានថ្មីៗនេះហើយ បុរសនោះគឺជាអាណិកជននៅសហរដ្ឋអាមេរិក។ ប្រភពបញ្ជាក់ថា នី មុនីនាថនៅមិនទាន់លាតត្រដាងរឿងស្នេហាថ្មីប្រាប់មិត្តភ័ក្ដិនៅឡើយទេ ប៉ុន្តែគេដឹងថា បុរសសង្ហាវ័យប្រមាណ៣០ឆ្នាំនោះគឺជាអ្នកជួយស្អំបេះដូងនាងពីការរបួលស្នេហ៍ចាស់។
កញ្ញា នី មុនីនាថ នៅក្នុងពេលកន្លងមក ត្រូវបានគេចាត់ទុកថាជាអ្នកសិល្បៈដែលកម្រនឹងបណ្ដើរបុរសប្លែកមុខជាសាធារណៈណាស់ ដែលសូម្បីតែលោក កែវ កុសល ដែលជាអតីតគូស្នេហ៍ក៏នាងមិនដែលបណ្ដើរដែរ គឺមានតែម្តាយ និងអ្នករួមអាជីពជិតដិតប៉ុណ្ណោះ ដែលតារាស្រីរូបនេះហ៊ានកៀកកិត។ ប្រភពពីអ្នកសិល្បៈបញ្ជាក់ថា អ្វីដែលធ្វើឲ្យនី មុនីនាថ ហ៊ានបណ្ដើរគូស្នេហ៍ដោយបើកចំហគឺចង់បញ្ឈឺអតីតគូស្នេហ៍ចាស់ដែលមានវត្តមាននៅក្នុងពិធីកាត់ចំណងដៃនោះដែរ ហើយចង់បញ្ជាក់ប្រាប់អ្នករួមអាជីពថានាងពិតជាមានបុរសតាមស្នេហ៍មិនតិចទេ ហើយបើអត់ពីពោះម៉ាយ កែវ កុសល ទៅក៏នាងអាចរកបានគូស្នេហ៍ជាបុរសសង្ហា និងរស់នៅសហរដ្ឋអាមេរិកដូចអតីតគូស្នេហ៍ផងដែរ៕
នរសិង្ហ
0 Comments