បន្ទាយមានជ័យ ៖ កម្លាំងនគរបាលប្រឆាំងបទល្មើសសេដ្ឋកិច្ចខេត្តបន្ទាយមានជ័យមានវិធានការយ៉ាងក្តៅគគុកចំពោះរថយន្តណាដែលដឹកសំពីងសំពោងពេលយប់ និងពេលថ្ងៃបង្កប់ទំនិញគេចពន្ធខុសច្បាប់។ នៅខេត្តបន្ទាយមានជ័យរាល់យប់និងថ្ងៃ នៅតាមផ្លូវជាតិលេខ៥ គេឃើញមានរថយន្តនីសាន់ និងរថយន្តច្នៃ បានដឹកទំនិញសំពីងសំពោងគ្មានសណ្ដាប់ធ្នាប់យ៉ាងច្រើន ទំនិញដែលដឹកសំពីងសំពោងគឺឈ្មួញបានឃុបឃិតជាមួយមន្ត្រីស្ថាប័នជំនាញដែលដាក់ប៉ុស្តិ៍កុងត្រូលលើផ្លូវ។ មានរថយន្តទំនើបៗដែលដឹកទំនិញគេចពន្ធរាល់យប់ចេញពីក្រុងប៉ោយប៉ែត ស្រុកម៉ាឡៃ និងច្រកបឹងត្រកួន ហើយអ្នកដែលរកស៊ីដឹកទំនិញខុសច្បាប់នេះភាគច្រើនជាសាច់ញាតិមន្ត្រីគយទើបហ៊ានដឹកទំនិញលោតឆ័ត្របែបនេះ។ ក្រុមឈ្មួញរកស៊ីដឹកទំនិញសំពីងសំពោងពេលយប់បានប្រាប់ថា គាត់ដឹងថាដឹកទំនិញសំពីងសំពោងបែបនេះគឺវាខុសនឹងច្បាប់ដែរ តែបើមិនឲ្យដឹកបែបនេះទេវាមិនរួចថ្លៃបង់ឲ្យសមត្ថកិច្ចដាក់ប៉ុស្តិ៍តាមផ្លូវនោះទេ។ គ្រាន់តែចេញពីក្រុងប៉ោយប៉ែតដល់ក្រុងសិរីសោភ័ណមានប៉ុស្តិ៍ច្រើនដែលត្រូវបង់ក្នុងមួយជើងៗចំណាយលុយអស់ច្រើនសម្រាប់បង់ឲ្យសមិត្តកិច្ចទាំងនេះ។ លោក ចាប់ សុផារិទ្ធ នាយការិយាល័យនគរបាលប្រឆាំងបទល្មើសសេដ្ឋកិច្ចខេត្តបន្ទាយមានជ័យបានប្រាប់ថា លោកនឹងមានវិធានការចំពោះរថយន្តដែលដឹកទំនិញសំពីងសំពោងដែលលួចបង្កប់ទំនិញគេចពន្ធដែលឈ្មួញលួចនាំចូលដឹកដោយខុសច្បាប់រាល់យប់ និងរថយន្តទំនើបដែលដឹកទំនិញខុសច្បាប់ពេលថ្ងៃនិងយប់ ដែលហ៊ានរកស៊ីដោយខុសច្បាប់លោកសុំច្បាប់លោកឧត្ដមសេនីយ៍ត្រី អាត់ ខែម ស្នងការនគរបាលខេត្តបន្ទាយមានជ័យ ចាត់វិធានការតាមច្បាប់៕
គង្គា
0 Comments