បន្ទាយមានជ័យ ៖ អាវុធហត្ថខេត្តបន្ទាយមានជ័យនឹងបញ្ជូនស្ត្រីឈ្មោះ ចែ បារាំង ទៅតុលាការនៅរសៀលថ្ងៃទី២៨ ខែមករា ឆ្នាំ២០១៥ ដើម្បីឲ្យតុលាការអនុវត្តទៅតាមច្បាប់បន្ទាប់ពីមានការឃាត់ខ្លួន កន្លងមក ក្នុងរឿងយកឈ្មោះថ្នាក់ដឹកនាំក្នុងជួររដ្ឋាភិបាលឆបោកអ្នកដទៃរត់ការទម្លាក់លោក ង៉ោ ម៉េងជ្រួន អភិបាលក្រុងប៉ោយប៉ែតដាក់អ្នកថ្មី។
ស្ត្រីឈ្មោះ ចែ បារាំង ដែលត្រូវសមត្ថកិច្ចឃាត់ខ្លួនកាលពីថ្ងៃទី២៦ ខែមករា ឆ្នាំ២០១៥ ដោយអាវុធហត្ថក្រុងប៉ោយប៉ែត ហើយបញ្ជូនមកអាវុធហត្ថខេត្ត បន្ទាប់ពីមានសាក្សីពីរ៣នាក់រាយការណ៍ថា ចែ បារាំង បានឲ្យគេហៅខ្លួនជាជំទាវតូច និងយកឈ្មោះថ្នាក់ដឹកនាំរដ្ឋាភិបាលរត់ការទម្លាក់លោក ង៉ោ ម៉េងជ្រួន អភិបាលក្រុងប៉ោយប៉ែត ដោយដាក់ជំនួសឈ្មោះ ឱក សុផាន ដែលអតីតជាសមាគមន៍អភិវឌ្ឍន៍កសិកម្មជាតិនាពេលឆាប់ៗ។ មិនតែប៉ុណ្ណោះ ជននេះក៏ត្រូវបានគេឮថា រៀបចំពិធីជប់លៀងដ៏ធំនៅភោជនីយដ្ឋាន(នាគទិព្វ១) ។ ជាមួយនឹងការឃាត់ខ្លួនស្ត្រីរូបនេះ សមត្ថកិច្ចក៏បានឃាត់ខ្លួនលោក ឱក សុផាន មកសាកសួរផងដែរ។
លោក ឱ បូរិន្ទ មេបញ្ជាការអាវុធហត្ថខេត្តបន្ទាយមានជ័យបានបញ្ជាក់ឲ្យដឹងនាថ្ងៃទី២៨នេះថា ឆ្លងតាមការឃាត់ខ្លួន និងសាកសួររួចមក លោកនឹងចាត់ឲ្យការិយាល័យជំនាញកសាងសំណុំរឿងបញ្ជូនស្ត្រីរូបនេះទៅតុលាការនារសៀលថ្ងៃទី២៨ មករា ២០១៥ ដើម្បីអោយតុលាការវិនិច្ឆ័យទោសទៅតាមច្បាប់ ចំណែកឈ្មោះ ឱក សុផាន ដែលត្រឹមតែជាសាក្សីមិនបានបញ្ជូនទៅទេ៕
អ,ពៅ
0 Comments