ភ្នំពេញ ៖ ដើម្បីបន្តនិរន្តរភាពការងារ និងបណ្តុះបណ្តាលយុវជនកាកបាទក្រហម យុវជនកាយរឹទ្ធិ នៅតាមវិទ្យាល័យ អនុវិទ្យាល័យចូលរួមធ្វើអំពើល្អក្នុងសង្គម រួមចំណែកកាត់បន្ថយបាតុភាពអវិជ្ជមានក្នុងសង្គម ពិសេសដើម្បីបន្តចុះអប់រំផ្សព្វផ្សាយច្បាប់ចរាចរណ៍ផ្លូវគោកថ្មីដល់សាធារណៈជន រួមចំណែកកាត់បន្ថយការប្រព្រឹត្តិបទល្មើស ការកកស្ទះ អត្រាស្លាប់របួសដោយសារគ្រោះថ្នាក់ចរាចរណ៍ និងការមិនគោរពច្បាប់ចរាចរណ៍អាជ្ញាធររាជធានីភ្នំពេញបានប្រកាសថានឹងពង្រីកបន្ថែមនូវយុវជនកាកបាទក្រហមចំនួន៦ពាន់នាក់ យុវជនកាយរឹទ្ធិជាតិកម្ពុជាថ្នាក់រាជធានីចំនួន៤ពាន់នាក់បន្ថែម។
ការប្រកាសបែបនេះបានធ្វើឡើងក្នុងកិច្ចប្រជុំនារសៀលថ្ងៃទី២៧ ខែមករា ឆ្នាំ២០១៥ នៅសាលារាជធានីភ្នំពេញ ក្រោមអធិបតីភាពលោក ប៉ា សុជាតិវង្ស អភិបាលរាជធានីភ្នំពេញ បន្ទាប់ពីមានសំណើសុំពង្រីកបន្ថែមពីមន្ទីរអប់រំយុវជន និងកីឡារាជធានីភ្នំពេញ។
នៅក្នុងកិច្ចប្រជុំនោះលោកប៉ា សុជាតិវង្ស មានប្រសាសន៍ថាការចូលរួមរបស់យុវជនក្នុងការងារសង្គមគឺពិតជាមានសារៈសំខាន់បំផុត ពីព្រោះកិច្ចការទាំងអស់មានផលប្រយោជន៍ ទាំងខ្លួនពួកគេផ្ទាល់ និងសង្គមជាតិទាំងមូល។ ជាងនេះទៅទៀតធ្វើឲ្យយុវជនបានសិក្សារៀនសូត្រពីបញ្ហាសង្គមតាំងពីពួកគេនៅសិក្សាថ្នាក់អនុវិទ្យាល័យ និងវិទ្យាល័យ ក៏ដូចជាដើម្បីឲ្យពួកគេជៀសឆ្ងាយពីអំពើខុសច្បាប់ផ្សេងៗផងដែរ។ ជាមួយនឹងការលើកឡើងបែបនេះលោកអភិបាលក៏បានណែនាំដល់អាជ្ញាធរខណ្ឌត្រូវចុះរៀបចំយុវជនកាកបាទក្រហម និងយុវជនកាយរឹទ្ធិតាមខណ្ឌរៀងៗខ្លួន ហើយបើមានឱកាសយុវជនដែលបានជ្រើសរើសនឹងត្រូវចូលរួមប្រជុំទទួលយកចំណេះដឹងពីតួនាទី ភារកិច្ចរបស់ខ្លួនបន្ថែមទៀត។
លោក ជា ជាតិ ប្រធានមន្ទីរអប់រំយុវជន និងកីឡារាជធានីភ្នំពេញបានឲ្យដឹងថា យុវជនកាកបាទក្រហមក្នុងឆ្នាំ២០១៤ មានចំនួន២.២២៣នាក់ ខណៈដែលការពង្រីកបន្ថែមចំនួន៦ពាន់នាក់ក្នុងឆ្នាំ២០១៥។ ចំណែកយុវជនកាយរឹទ្ធិក្នុងឆ្នាំ២០១៤ មានចំនួន៤.៦៩៩នាក់ ហើយឆ្នាំ២០១៥ មានគម្រោងពង្រីកបន្ថែមចំនួន៤ពាន់នាក់ថែមទៀត៕
ស្រីរ័ត្ន
0 Comments