ភ្នំពេញ ៖ ជនសង្ស័យចំនួន៣នាក់ ដែលត្រូវកម្លាំងសមត្ថកិច្ចប្រឆាំងការជួញដូរគ្រឿងញៀន រាជធានីភ្នំពេញ សហការជាមួយព្រះរាជអាជ្ញារងអមសាលាដំបូងរាជធានីភ្នំពេញធ្វើការឃាត់ខ្លួនជាបន្តបន្ទាប់ កាលពីថ្ងៃទី២៧ ខែមករា ឆ្នាំ២០១៥កន្លងមក នៅព្រឹកថ្ងៃទី២៩ ខែមករា ឆ្នាំ២០១៥ សមត្ថកិច្ចបានបង្ហាញមុខពួកគេក្រោយសមត្ថកិច្ចសាកសួរនិងស្រាវជ្រាវឃើញថា អ្នកទាំង៣ជាមុខសញ្ញាចែកចាយ និងប្រើប្រាស់ថ្នាំញៀន។
សមត្ថកិច្ចបានឲ្យដឹងថា ជនសង្ស័យដែលឃាត់ខ្លួនទី១-ឈ្មោះ ឃុន ស៊ីណា ភេទប្រុស អាយុ ២៣ឆ្នាំ ស្នាក់នៅផ្ទះជួល សង្កាត់បឹងព្រលិត ខណ្ឌ៧មករា ទី២-ឈ្មោះ សំ តាន ភេទប្រុស អាយុ២៩ ឆ្នាំ ស្នាក់នៅសង្កាត់ស្រះចក ខណ្ឌដូនពេញ និងទី៣-ឈ្មោះ នង ចាន់ឌុល ភេទប្រុស អាយុ១៩ឆ្នាំ ស្នាក់ នៅសង្កាត់បឹងកក់ទី២ ខណ្ឌទួលគោក។ សមត្ថកិច្ចបន្តថា ក្នុងប្រតិបត្តិការឃាត់ខ្លួនពួកគេ សមត្ថកិច្ចដកហូតបានថ្នាំញៀន៩កញ្ចប់តូច អាយឌី ( វិទ្យុទាក់ទង )មួយគ្រឿង ទូរស័ព្ទដៃ៣ គ្រឿង រួមនឹងម៉ូតូ២គ្រឿងទៀត។
សមត្ថកិច្ចបានបញ្ជាក់ថា មុនដំបូងសមត្ថកិច្ចបានស្រាវជ្រាវដឹងថា ឈ្មោះ ឃុន ស៊ីណា កំពុងធ្វើសកម្មភាពជួញដូរថ្នាំញៀននៅម្តុំសង្កាត់ទួលទំពូង ខណ្ឌចំការមន ទើបកម្លាំងសមត្ថកិច្ចដឹកនាំដោយស្នងការរង រួមជាមួយព្រះរាជអាជ្ញារង ចុះព័ទ្ធនឹងឆែកឆេរឃើញថ្នាំញៀន ក៏សម្រេចឃាត់ខ្លួនយកមកសួរនាំ រហូតឈានដល់ការតាមចាប់បានឈ្មោះ សំ តាន់ នៅកន្លែងមជ្ឈមណ្ឌលម៉ុងឌីយ៉ាល សង្កាត់ផ្សារដើមគរ ខណ្ឌទួលគោក។ ក្រោយពីឃាត់ខ្លួនអ្នកទាំងពីរនេះបានហើយ សមត្ថកិច្ចបានបន្តសួរនាំតាមជំនាញ ទើបឈានទៅឃាត់ខ្លួនឈ្មោះ នង ចាន់ឌុល ដែលកំពុងសម្ងំចែកចាយថ្នាំញៀននៅផ្លូវលេខ៦១០ សង្កាត់បឹងកក់ទី២ ខណ្ឌទួលគោក។
ក្រោយមកធ្វើការឃាត់ខ្លួនជាបន្តបន្ទាប់នេះ សមត្ថកិច្ចបានរកឃើញថ្នាំញៀន៩កញ្ចប់ ដូច្នេះក៏សម្រេចកសាងសំណុំរឿងឃុំខ្លួនពួកគេទាំង៣នាក់នៅការិយាល័យប្រឆាំងគ្រឿងញៀនរាជធានីភ្នំពេញ រង់ចាំបញ្ជូនបន្តទៅសាលាដំបូងរាជធានីភ្នំពេញ ដើម្បីផ្ដន្ទាទោសតាមនីតិវិធីច្បាប់៕
រ៉ាវុទ្ធ
0 Comments