ភ្នំពេញ ៖ នៅសាលប្រជុំក្រសួងមហាផ្ទៃកាលពីរសៀលថ្ងៃទី២៧ ខែមករា ឆ្នាំ២០១៥ បានប្រារព្ធពិធីប្រកាសមុខតំណែង និងបំពាក់ឋានន្តរស័ក្តិជូននាយនគរបាលជាតិចំនួន៨៥រូប ក្រោមអធិបតីភាព លោក ឯម សំអាន រដ្ឋលេខាធិការក្រសួងមហាផ្ទៃ តំណាងដ៏ខ្ពស់របស់ឧបនាយករដ្ឋមន្ត្រី ស ខេង រដ្ឋមន្ត្រី ក្រសួងមហាផ្ទៃ។
នាយនគរបាលជាតិទាំង៨៥រូបដែលត្រូវប្រកាសមុខតំណែង និងបំពាក់ឋានន្តរស័ក្តិ ក្នុងនោះរួមមាន ប្រកាសមុខតំណែងចំនួន០៤រូប និងបំពាក់ឋានន្តរស័ក្តិចំនួន៨១រូប ក្នុងនោះថ្នាក់ឧត្តមសេនីយ៍ឯកចំនួន១០រូប ថ្នាក់ឧត្តមសេនីយ៍ទោចំនួន៣០រូប ថ្នាក់ឧត្តមសេនីយ៍ត្រីចំនួន៤១រូប។
បន្ទាប់ពីមានការប្រកាសមុខតំណែង និងបំពាក់ឋានន្តរស័ក្តិរួចមក លោក ឯម សំអាន បានមានប្រសាសន៍ផ្ដាំផ្ញើដល់នាយនគរបាលទាំងអស់ដែលបានទទួលមុខតំណែង និងឋានន្តរស័ក្តិនាថ្ងៃនេះ ត្រូវទទួលខុសត្រូវខ្ពស់នូវតួនាទីដែលទទួលបាន។
លោកក៏បានបន្តទៀតថា កងកម្លាំងគឺជាកម្លាំងស្នូលនៅក្នុងកិច្ចការពារសន្តិសុខជូនប្រជាពលរដ្ឋ ដូច្នេះកងកម្លាំងទាំងអស់ ជាពិសេសកងកម្លាំងនៅតាមប៉ុស្តិ៍នគរបាលរដ្ឋបាល តាមមូលដ្ឋាន ត្រូវកសាងខ្លឹមសារបទដ្ឋាន កម្មវិធីការងាររបស់ប៉ុស្តិ៍រដ្ឋបាល ក៏ដូចជាការផ្សព្វផ្សាយគោលនយោបាយភូមិ-ឃុំ មានសុវត្ថិភាព ធានាឲ្យខានតែបាននូវសុវត្ថិភាព សន្តិសុខដើម្បីឲ្យទៅជាកម្លាំង និងសេវាសន្តិសុខដ៏រឹងមាំនៅតាមមូលដ្ឋាន៕
រ៉ាវុទ្ធ
0 Comments