ភ្នំពេញ ៖ លោក គួច ចំរើន អភិបាលនៃគណៈអភិបាលខណ្ឌដូនពេញបានមានប្រសាសន៍ថា រថយន្តធន់ធ្ងន់ដឹកលើសទម្ងន់ និងការចោលសំរាមផ្ដេសផ្ដាសដាក់គនៅលើទ្រូងផ្លូវ ជាមូលហេតុចំបងធ្វើឲ្យផ្លូវឆាប់ខូច ព្រោះផ្លូវពេលរថយន្តធន់ធ្ងន់ផ្ទុកទំនិញលើសទម្ងន់រាប់តោន ប្រាកដជាធ្វើឲ្យផ្លូវប្រេះស្រាំ ឯសំរាមក៏ជាមូលហេតុធ្វើឲ្យផ្លូវខូចខាតដែរ ដោយសារការដក់ទឹកពេលមានភ្លៀងធ្លាក់ម្តងៗធ្វើឲ្យសំរាមអណ្ដែតរាយប៉ាយទៅបិទជិតមាត់អណ្ដូងលូ បង្កឲ្យស្ទះចរន្តទឹកហូរ។
លោកអភិបាលខណ្ឌមានប្រសាសន៍លើកឡើងដូចនេះនៅក្នុងឱកាសបើកការដ្ឋានដាក់ប្រព័ន្ធលូនៅផ្លូវលេខ១៩ និងផ្លូវលេខ១៨៤ នាព្រឹកថ្ងៃទី៣០ ខែមករា ឆ្នាំ២០១៥នេះ។ លោកបានបន្តទៀតថា ដើម្បីជាវិធានការទប់ស្កាត់នូវបញ្ហាទាំងនេះ នោះយើងទាំងអស់គ្នាត្រូវចូលរួមថែរក្សា ការពារផ្លូវ ដោយមិនត្រូវយកសំរាមកាកសំណល់ដាក់គនៅមាត់អណ្ដូងលូ ត្រូវមានស្មារតី ភ្ញាក់រឭកខ្ពស់ ធ្វើការវិចខ្ចប់សំរាមឲ្យបានត្រឹមត្រូវដើម្បីដាក់ចូលក្នុងរថយន្តដឹកសំរាមរបស់ក្រុមហ៊ុន។
លោកអភិបាលខណ្ឌក៏បានជំរុញឲ្យអាជ្ញាធរមានសមត្ថកិច្ចក្នុងខណ្ឌដូនពេញទាំងអស់ ត្រូវមានវិធានការតឹងរ៉ឹងបំផុតចំពោះអ្នកល្មើសទៅនឹងគោលការណ៍ថែទាំផ្លូវរបស់សាលារាជធានីភ្នំពេញ។ លោកបានមានប្រសាសន៍ទៀតថា ការបើកការដ្ឋានដាក់ប្រព័ន្ធលូតាមដងផ្លូវទាំង២ខ្សែនេះ មានសារៈសំខាន់ណាស់ដើម្បីឆ្លើយតបទៅនឹងកម្មវិធីនយោបាយរបស់រាជរដ្ឋាភិបាលក្នុងការអភិវឌ្ឍន៍ហេដ្ឋារចនាសម្ព័ន្ធនៅថ្នាក់ក្រោមជាតិ ពិសេសបង្កលក្ខណៈងាយស្រួលក្នុងការរំដោះទឹកកខ្វក់ចេញពីភូមិសាស្ត្រ ក៏ដូចជាលំនៅដ្ឋានរបស់ប្រជាពលរដ្ឋឲ្យបានឆាប់ ព្រោះតាមការកត់សម្គាល់ឃើញថា នៅពេលមានភ្លៀងធ្លាក់ម្តងៗ ធ្វើឲ្យតំបន់នេះមានការលិចលង់ បង្កការលំបាកក្នុងការធ្វើចរាចរណ៍ និងមានផលប៉ះពាល់យ៉ាងធ្ងន់ធ្ងរដល់ជីវភាពរស់នៅរបស់ប្រជាពលរដ្ឋ។
លោកក៏បានអំពាវនាវដល់ប្រជាពលរដ្ឋសុំឲ្យមានការយោគយល់ អធ្យាស្រ័យដល់ក្រុម ការងារស្ថាបនា ក៏ដូចជាអាជ្ញាធរ ព្រោះក្នុងពេលអនុវត្តដាក់ប្រព័ន្ធលូនេះ ពិតជាមានផលប៉ះពាល់ដល់ប្រជាពលរដ្ឋក្នុងរយៈពេលដ៏ខ្លីជាក់ជាមិនខានឡើយ។
គួរបញ្ជាក់ថា ប្រព័ន្ធលូដែលត្រូវដាក់នេះមានប្រវែងសរុប៨៧២ម៉ែត្រ មានទំហំ១ម៉ែត្រ ក្នុងនោះដាក់នៅតាមផ្លូវលេខ១៩ ចាប់ពីផ្លូវលេខ១៨៤ ដល់ផ្លូវលេខ២៤០ មានប្រវែង៤៦២ម៉ែត្រ ក្នុងនោះដាក់អណ្ដូងលូចំនួន១៩អណ្តូង និងផ្លូវលេខ១៨៤ ចាប់ពីផ្លូវលេខ១៩ ដល់ផ្លូវលេខ០៣ មានប្រវែង៤១០ម៉ែត្រ ក្នុងនោះដាក់អណ្ដូងលូ១៧អណ្តូង អនុវត្តដោយក្រុមហ៊ុនBBE ដែលត្រូវចំណាយថវិកាអស់ចំនួន១១១៤,0៤២០០០រៀល (មួយពាន់មួយរយដប់បួនលាន បួនម៉ឺនពីរពាន់រៀល)៕
រស្មី
0 Comments