ភ្នំពេញ ៖ សមាជិកក្រុមប្រឹក្សាខណ្ឌព្រែកព្នៅស្នើឲ្យរដ្ឋបាលខណ្ឌជួយពន្លឿនក្នុងការទប់ស្កាត់ទឹកស្អុយដែលបង្ហូរមកពីក្នុងក្រុងចូលបឹងតាមោគ និងរថយន្តដឹកដី ដឹកខ្សាច់ជ្រុះរាយតាមផ្លូវ ដែលធ្វើឲ្យប៉ះពាល់ដល់ប្រជាពលរដ្ឋធ្វើដំណើរជារៀងរាល់ថ្ងៃ។
ការលើកឡើងនេះនៅក្នុងកិច្ចប្រជុំសាមញ្ញលើកទី៨ អាណត្តិទី២របស់ក្រុមប្រឹក្សា នាព្រឹកថ្ងៃទី៣០ ខែមករា ឆ្នាំ២០១៥នេះ នៅសាលាខណ្ឌព្រែកព្នៅ ដែលមានការចូលរួមពីលោក ម៉ៅ បូរ៉ា ប្រធានក្រុមប្រឹក្សាខណ្ឌព្រែកព្នៅ និងលោក លោកស្រីអភិបាលរងខណ្ឌ ព្រមទាំងសមាជិកក្រុមប្រឹក្សា និងមន្ត្រីសាលាខណ្ឌជាច្រើនរូបទៀតផងដែរ។
នៅក្នុងកិច្ចប្រជុំនេះលោក ម៉ៅ បូរ៉ា ប្រធានក្រុមប្រឹក្សាខណ្ឌព្រែកព្នៅបានលើកឡើង កោតសសើរសមត្ថកិច្ចគ្រប់លំដាប់ថ្នាក់ក្នុងខណ្ឌទាំងមូលដែលបានជួយសម្រួលចរាចរណ៍ និងរួបរួមគ្នាធ្វើការតាមតួនាទីប្រកបដោយការទទួលខុសត្រូវ និងសាមគ្គីគ្នាបានយ៉ាងល្អចាប់ពីខណ្ឌព្រែកព្នៅបង្កើតមករយៈពេលជាង៦ខែកន្លងមកនេះ។ បើទោះជាយ៉ាងនេះក្តី សមាជិកក្រុមប្រឹក្សាខណ្ឌព្រែកព្នៅបានលើកឡើងពីការលំបាករបស់ប្រជាពលរដ្ឋក្នុងការធ្វើដំណើរ ព្រោះមានរថយន្តដឹកថ្ម ដឹកខ្សាច់ជ្រុះរាយតាមផ្លូវ ដែលធ្វើឲ្យប៉ះពាល់ដល់ប្រជាពលរដ្ឋធ្វើដំណើរជារៀងរាល់ថ្ងៃ ពិសេសទឹកស្អុយដែលបង្ហូរមកពីក្នុងក្រុងចូលបឹងតាមោគ ដែលធ្វើឲ្យប្រជាពលរដ្ឋមិនអាចប្រើប្រាស់នូវទឹកបឹងនេះបាន។
ឆ្លើយតបទៅនឹងសំណើនេះលោក ខូច សាលិន អភិបាលរងខណ្ឌព្រែកព្នៅមានប្រសាសន៍ថាចំពោះ ចំពោះការទប់ស្កាត់ទឹកស្អុយដែលបង្ហូរចូលបឹងតាមោគនោះ សាលារាជធានីភ្នំពេញបានសិក្សាគម្រោងនេះហើយ តែអាចប្រើពេលវេលាយូរបន្តិច ព្រោះត្រូវការបច្ចេកទេសខ្ពស់ទើបអាចធ្វើបាន។
លោកបន្តថា ចំណែករថយន្តដឹកដី ដឹកខ្សាច់ជ្រុះរាយតាមផ្លូវនោះខាងសមត្ថកិច្ចកំពុងតែទប់ស្កាត់ហើយតែយើងធ្វើបណ្ដើរៗ ដោយឡែកផ្លូវ២ខ្សែដែលរងការខូចខាតនោះ សាលាខណ្ឌបានធ្វើសំណើជូនដល់សាលារាជធានីភ្នំពេញរួចហើយ សាលារាជធានីភ្នំពេញក៏បានឲ្យមន្ត្រីជំនាញចុះមកសិក្សារួចហើយដែរ។
នៅក្នុងឱកាសនោះដែរ លោកម៉ៅ បូរ៉ា បានលើកទិសដៅ និងវិធានការ ដល់អង្គប្រជុំ ត្រូវខិតខំយកចិត្តទុកដាក់អនុវត្តលើគ្រប់វិស័យ ដើម្បីអនុវត្តតាមគោលនយោបាយចតុកោណដំណាក់កាលទី២ និងទី៣របស់រាជរដ្ឋាភិបាល ក្រោមការដឹកនាំរបស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលសព្វថ្ងៃនេះបាននិងកំពុងដឹកនាំនាវាកម្ពុជាលើមាគ៌ាអភិវឌ្ឍន៍រីកចម្រើនលើគ្រប់វិស័យ៕
ឧត្តរ៉ា
0 Comments