ព្រះវិហារ ៖ ប្រជាពលរដ្ឋក្រីក្រចំនួន៨គ្រួសាររស់នៅលើដីចំនួន៧ហិកតា ដែលមានក្បាលដីប្រវែង២០០ម៉ែត្រ និងបណ្តោយ៣៥០ម៉ែត្រស្មើ៧ហិកតាជាប់ដងផ្លូវជាតិ ស្ថិតនៅភូមិស្រយង់ជើងឃុំស្រយង់ ស្រុកគូលែនកំពុងទទួលរងការទាមទារ ដោយសារស្ត្រីអ្នកមានទឹកលុយម្នាក់តាំងខ្លួនជាជំទាវដើរចង្អុលប៉ាតណាប៉ាតណីថាដីទំហំ៧ហិកតានោះជាដីរបស់គាត់ ប៉ុន្តែមិនមានឯកសារកាន់កាប់ដីធ្លីពិតប្រាកដណាមួយយកមកធ្វើជាភស្តុតាងនោះទេ។
បុរសតំណាងប្រជាពលរដ្ឋទាំង៧គ្រួសាររួមមានទី១-ឈ្មោះ បាន សុខចាន់ឆាយា ទី២-ស្វាយតោ ទី៣-អួន ពិទូ ទី៤-អ៊ូ គួន ទី៥-ស៊ុន ហេង ទី៦-គង់ ធា ទី៧-ឈ្មោះ សាប់ វិន និងទី៨-ឈ្មោះ ហ៊ាន ហៀក គឺពួកគាត់អះអាងថាជាម្ចាស់កម្មសិទ្ធិកាន់កាប់ដីចំនួន៧ហិកតានេះ។
ប្រជាពលរដ្ឋម្នាក់ឈ្មោះ បាន សុខចាន់ឆាយាបានឲ្យដឹងនៅព្រឹកថ្ងៃទី៣០ ខែមករា ឆ្នាំ២០១៥ថា ដីទំហំ៧ហិកតានេះ ពួកគាត់ទាំង៨គ្រួសារបានកាន់កាប់ច្រើនឆ្នាំមកហើយមិនដែលមានបញ្ហាអ្វីនោះទេ ប៉ុន្តែចូលដល់ឆ្នាំ២០១៥នេះ មានស្ត្រីម្នាក់ឈ្មោះ ទួន ចន្ទ្រា តាំងខ្លួនជាជំទាវបានដើរចង្អុលទាំងស្រពិចស្រពិលថាជាដីរបស់គាត់ទៅវិញ។ ស្ដ្រីម្នាក់នេះមើលមុខមើលក្រោយដែរ បើប៉ះចំដីអ្នកមានអំណាចក្នុងមូលដ្ឋានគឺគាត់មិនហ៊ានចង្អុលឲ្យចំនោះទេ តែបើដីណាជាដីរបស់ប្រជាពលរដ្ឋក្រីក្រនោះ គាត់អាងទឹកលុយជំរិតយកដីនោះតែម្ដង។
គាត់បន្តទៀតថា មានបុរសខិលខូច២នាក់ដើរចង្អុលយកដីប្រជាពលរដ្ឋយកទៅលក់ឲ្យស្ត្រីឈ្មោះ ទួន ចន្ទ្រា គឺទី១-ឈ្មោះ កែម សុផល មន្ត្រីអង្គការធនធានធម្មជាតិប្រចាំស្រុកគូលែន និងទី២-ឈ្មោះ ហិត យ៉ន អតីតមេភូមិស្រយង់ជើងធ្លាប់ដើរចង្អុលយកដីប្រជាពលរដ្ឋមួយចំនួនយកទៅលក់ឲ្យឈ្មួញដីបានលុយដុំកំភួនហើយក៏ចេះតែកើតមានទំនាស់ដីធ្លីរហូតមក។ ស្ត្រីឈ្មោះ ទួន ចន្ទ្រាបានពឹងឈ្មោះ សុង នាយប៉ុស្តិ៍នគរបាលស្លក្រាមនៅខេត្តសៀមរាបមកកាង និងចេញមុខប្ដឹងទាមទារយកដីធ្លីពីប្រជាពលរដ្ឋទាំង៨គ្រួសារក្នុងរឿងក្ដីដីធ្លីនេះថែមទៀត។
លោក សុង នាយប៉ុស្តិ៍នគរបាលស្លក្រាមបានឲ្យអ្នកសារព័ត៌មានដឹងនៅព្រឹកថ្ងៃទី៣០ ខែមករា ឆ្នាំ២០១៥ថា គាត់និងស្ត្រីឈ្មោះ ទួន ចន្ទ្រា ពិតជាបានប្ដឹងទាមទារយកដីខាងលើនេះមែន។ចំពោះរឿងប្រវត្តិដីធ្លីនេះគាត់បានជំរុញអ្នកសារព័ត៌មានឲ្យទាក់ទងសួរនាំទៅកាន់លោកស្រី ទួនចន្ទ្រាទើបដឹងច្បាស់។
ស្ត្រីឈ្មោះ ទួន ចន្ទ្រាបានឲ្យដឹងនៅព្រឹកថ្ងៃទី៣០ ខែមករា ឆ្នាំ២០១៥ថា ដីនោះជាដីរបស់គាត់ហើយមានឯកសារទិញលក់ត្រឹមត្រូវថែមទៀតផង។ គាត់និយាយថា ដីមានទំនាស់នោះមានម្ចាស់ចំនួន១០នាក់គឺពួកគេឲ្យគាត់ជាអ្នកឈរឈ្មោះប្ដឹងប្រជាពលរដ្ឋដែលរស់នៅលើដីនោះទៅក្រសួង ប៉ុន្តែគាត់មិនបានបញ្ជាក់ប្រាប់ឈ្មោះក្រសួងអ្វីនោះទេ ហើយបានប្រាប់អ្នកកាសែតថែមទៀតថា ត្រូវទៅកាន់ផ្ទះរបស់គាត់នៅជិតអង្គការរ៉ាក់ជាប់ផ្លូវភ្លោះ៣០ម៉ែត្រ ក្នុងក្រុងសៀមរាប បើចង់ដឹងរឿងក្ដីនេះ៕
មង្គល
0 Comments