ភ្នំពេញ ៖ ដោយមើលឃើញពីសក្ដានុពលនៃឱកាសវិនិយោគដ៏ល្អក្នុងប្រទេសកម្ពុជា ខណៈពេលដែលកំណើនទេសចរអន្តរជាតិយ៉ាងច្រើនក្នុងប្រទេសកម្ពុជា ក្នុងនោះក៏មានការកើនឡើងនៃទេសចរជនជាតិជប៉ុនផង ក្នុងរយៈពេលប៉ុន្មានឆ្នាំចុងក្រោយនេះ។ ផ្តើមចេញពីចំណុចនេះ ភោជនីយដ្ឋានសាច់គោអាំងដ៏ល្បីក្នុងប្រទេសជប៉ុន KAZU (ខាហ្សឹ) ក៏បានសម្រេចចូលមកបោះទុនវិនិយោគផ្នែកវិស័យភោជនីយដ្ឋាននេះ ក្នុងគោលបំណងផ្តល់រសជាតិសាច់គោអាំងបែបប្រពៃណីជប៉ុន ក្នុងប្រទេសកម្ពុជា ជាពិសេសពលរដ្ឋកម្ពុជា និងទេសចរបរទេសដែលមកទស្សនាប្រទេសកម្ពុជា ដោយពួកគេមិនចាំបាច់ចំណាយលុយធ្វើដំណើរទៅទីក្រុងតូក្យូនោះទេ។
លោក Tabe KIYOSHI (តាបិ គីយ៉ូស៊ី) នាយកភោជនីយដ្ឋាន KAZU (KAZU (ខាហ្សឹ)) ក្នុងប្រទេសកម្ពុជាមានប្រសាសន៍ថា វត្តមានមានរបស់ KAZU (ខាហ្សឹ) នៅពេលនេះ ពិតជាបានចូលរួមចំណែកយ៉ាងសំខាន់ដល់ការចូលរួមអភិវឌ្ឍន៍វិស័យភោជនីយដ្ឋានបែបជប៉ុនក្នុងប្រទេសកម្ពុជា ជាពិសេសភោជនីយដ្ឋានរបស់លោកមានកម្រិតស្តង់ដារខ្ពស់ដូចជានៅប្រទេសជប៉ុនអញ្ចឹងដែរ។
នៅក្នុងឱកាសសម្ពោធភោជនីយដ្ឋានសាច់អាំង ខាហ្សឹ នៅថ្ងៃទី២៩ ខែមករា ឆ្នាំ២០១៥នេះ លោក តាបិ គីយ៉ូស៊ី បានបញ្ជាក់ថា ក្នុងការបង្កើតចេញនូវភោជនីយដ្ឋានខាហ្សឹនាថ្ងៃនេះ លោកបានបោះទុនវិនិយោគចំនួន៤០ម៉ឺនដុល្លារសហរដ្ឋអាមេរិកដើម្បីរៀបចំទាំងការរចនាទីតាំងបែបជប៉ុន និងនាំចូលនូវសាច់គោ ពិសេសពីប្រទេសជប៉ុន រួមទាំងគ្រឿងផ្សំមួយចំនួនផ្សេងទៀត។ លើសពីនេះទៅទៀត ភោជនីយដ្ឋានរបស់លោក មានចុងភៅល្បីៗមួយចំនួនមកពីប្រទេសជប៉ុន ហើយការបើកទ្វាររបស់ខាហ្សឹនាពេលនេះបានផ្តល់ការងារដល់បុគ្គលិកជនជាតិកម្ពុជាជាង៣០នាក់ផងដែរ។
លោក Tabe KIYOSHI (តាបិ គីយ៉ូស៊ី)បានបញ្ជាក់បន្ថែមថា ក្រោយការចូលមកវិនិយោគក្នុងប្រទេសកម្ពុជាកន្លែងមកនេះ លោកបានកត់សម្គាល់ឃើញថា ការវិនិយោគក្នុងវិស័យភោជនីយដ្ឋាននៅកម្ពុជាពិតជានៅមានសក្ដានុពលខ្ពស់ កត្តាទាំងនេះហើយបានធ្វើឲ្យលើកកំពុងតែសម្លឹងមើលទីតាំងផ្សេងទៀតនៅក្នុងបណ្ដាខេត្តទេសចរណ៍ធំៗមួយចំនួនទៀតក្នុងការពង្រីកសាខា ភោជនីយដ្ឋានខាហ្សឹ នាពេលឆាប់ៗខាងមុខនេះបន្ថែមទៀត។
យោងតាមរបាយការណ៍ពីសមាគមភោជនីយដ្ឋានកម្ពុជាកាលពីឆ្នាំ២០១៤ បង្ហាញថា ប្រទេសកម្ពុជាមានភោជនីយដ្ឋានចំនួន១.៧៦២កន្លែងនៅក្នុងរាជធានីភ្នំពេញ និងនៅទូទាំងប្រទេសមានចំនួនជិត៣ពាន់ភោជនីយដ្ឋាន ហើយមានប្រមាណ២៣ភាគរយកំពុងជួបបញ្ហាកង្វះធនធាន មនុស្សបម្រើការក្នុងវិស័យនេះ។
យ៉ាងណាក៏របាយការណ៍សមាគមភោជនីយដ្ឋានកម្ពុជាដដែលបញ្ជាក់ថា មានម្ចាស់ភោជនីយដ្ឋានចំនួន៨២ភាគរយចង់បើកសាខាថ្មីបន្ថែមនាពេលខាងមុខ។ ដូច្នេះការពង្រឹងធនធានមនុស្ស និងយុទ្ធសាស្ត្រទីផ្សារ គឺជារឿងចាំបាច់ដើម្បីប្រកួតប្រជែង និងទទួលស្វាគមន៍សមាហរណកម្មអា ស៊ានដែលនឹងចូលមកនៅចុងឆ្នាំ២០១៥។ គួរបញ្ជាក់បន្ថែមថា ភោជនីយដ្ឋានសាច់អាំងជប៉ុនមានទីតាំងស្ថិតនៅលើផ្លូវ៣០២ខាងត្បូងវិមានឯករាជ្យ៕
វត្តី
0 Comments