ព្រៃវែង ៖ នៅព្រឹកថ្ងៃទី២៩ ខែមករា ឆ្នាំ២០១៥ លោក ជុំ សាមឿន អភិបាលនៃគណៈអភិបាលខេត្តព្រៃវែងបានដឹកនាំកម្លាំងចម្រុះចុះរៀបចំសណ្ដាប់ធ្នាប់នៅតំបន់ផ្សារអ្នកលឿងត្រើយខាងកើតរុះរើតូបអាជីវករដែលសង់លើផ្លូវនិងឈូសឆាយផ្លូវចូលផ្សារឲ្យបានធំទូលាយដូចដើម។ លោក ជុំសាមឿន អភិបាលនៃគណៈអភិបាលស្រុកពាមរក៏បានឲ្យ"កម្ពុជាថ្មី" ដឹងថា លោកបានដឹកនាំកម្លាំងចម្រុះចុះរុះរើតូបរបស់អាជីវករនៅផ្សារអ្នកលឿងនេះដើម្បីឈូសឆាយផ្លូវចូលផ្សារឲ្យបានធំទូលាយធ្វើឲ្យផ្សារមានសោភ័ណភាពល្អទាំងផ្សារ និងផ្លូវចូលផ្សារ ម្យ៉ាងវិញទៀតគឺដើម្បីងាយស្រួលចេញចូលនៅពេលមានហេតុការណ៍អ្វីមួយកើតឡើងជាយថាហេតុ។ លោកបានបន្តទៀតថា មុននឹងលោកដឹកនាំកម្លាំងចម្រុះចុះរុះរើឈូសឆាយនេះ គឺលោកបានជូនដំណឹងដល់បងប្អូនអាជីវករ១ខែមុនមកហើយ រួចក៏បានពន្យល់នែនាំពីបញ្ហាផ្សេងៗ ជាពិសេសគឺការពារនៅពេលមានអគ្គីភ័យកើតឡើង វាងាយស្រួលក្នុងការចូលសង្គ្រោះរបស់រថយន្តពន្លត់អគ្គីភ័យ ក៏ដូចជាធ្វើឲ្យផ្សារមានផ្លូវចេញចូលដោយមិនមានការកកស្ទះជាដើម។ លោកបានចុះពន្យល់បងប្អូនអាជីវករក៏យល់ព្រមនិងឯកភាពផងដែរ ហើយផ្លូវនេះគឺស្ថិតនៅប៉ែកខាងជើងផ្សារដែលមានប្រវែងទទឹង៨ម៉ែត្រនិងបណ្តោយ១០០ម៉ែត្រ ក្រោយពេលឈូសឆាយហើយ លោកចាក់ខ្សាច់និងថ្ម ក្រោយមក គឺចាក់ជាផ្លូវបេតុងតែម្តង៕
វិចិត្រ
0 Comments