ព្រះសីហនុ ៖ ប្រជាពលរដ្ឋជាច្រើនរស់នៅតាមបណ្តោយផ្លូវវិថី២ធ្នូ ស្ថិតនៅក្នុងភូមិលេខ១ សង្កាត់លេខ៣ ក្រុងព្រះសីហនុ(តំបន់ពយកំពេញ) បាននាំគ្នាផ្ដិតមេដៃដាក់ពាក្យបណ្ដឹងចូលទៅអាជ្ញាធរខេត្តឲ្យជួយធ្វើអន្តរាគមន៍ចំពោះក្រុមហ៊ុន(ប៉ុលឈុនស៊ី.ហ៊ួអ៊ីនធើណេសិនណលហូរថេល) ដែលកំពុងធ្វើការពង្រីកផ្លូវ ដោយចោទប្រកាន់ថា ក្រុមហ៊ុនបានកាយយកអាចម៍ដីនៅសងខាងផ្លូវជំរៅ៣ទៅ៤ម៉ែត្រយកទៅចាក់បំពេញលើដីរបស់ខ្លួនបង្កផលប៉ះពាល់យ៉ាងធ្ងន់ធ្ងរដល់លំនៅដ្ឋានប្រជាពលរដ្ឋរស់នៅសងខាងផ្លូវ ដោយលំនៅដ្ឋានប្រជាពលរដ្ឋទាំងនោះអាចប្រឈមការបាក់ស្រុតគ្រប់ពេលវេលា។ បងស្រី ថោង ពុទ្ធាវី អាយុ៣៦ឆ្នាំ តំណាងប្រជាពលរងគ្រោះខាងលើបាននិយាយរៀបរាប់ប្រាប់ក្រុមអ្នកសារព័ត៌មានកាសែតនិងទូរទស្សន៍ជាច្រើនថា ប្រជាពលរដ្ឋមានសេចក្តីត្រេកអរខ្លាំងណាស់ចំពោះគោលការណ៍អភិវឌ្ឍន៍ពង្រីកផ្លូវវិថី២ធ្នូរបស់អាជ្ញាធរខេត្តទំហំសងខាងម្ខាង១២ម៉ែត្របន្ថែមលើផ្លូវចាស់ដែលមានស្រាប់ធ្វើឲ្យផ្លូវបានធំទូលាយងាយស្រួលក្នុងការធ្វើចរាចរណ៍ទៅមក ជាពិសេសអាចលើស្ទួយសោភ័ណភាពមុខមាត់ក្រុងទេសចរណ៍ឆ្នេរសមុទ្រយើងបានមួយកម្រិតបន្ថែមទៀតផងដែរ។ ប៉ុន្តែចំពោះការសាងសង់ពង្រីកផ្លូវរបស់ក្រុមហ៊ុនខាងលើបែបកាយយកអាចម៍ដីនៅសងខាងផ្លូវជំរៅ៣ទៅ៤ម៉ែត្រដូចនេះ យើងខ្ញុំប្រជាពលរដ្ឋមិនគាំទ្រនោះឡើយ និងប្រឆាំងដាច់ខាតពីព្រោះការកាយយកអាចម៍ដីដ៏ជ្រៅបែបនេះវាអាចបង្កផលប៉ះពាល់បាក់ស្រុតលំនៅដ្ឋានប្រជាពលរដ្ឋដែលរស់នៅសងខាងផ្លូវគ្រប់ពេលវេលា។
ជាមួយគ្នានេះបងប្អូនប្រជាពលរដ្ឋរងគ្រោះទាំងអស់បានធ្វើសំណូមពរទៅដល់អាជ្ញាធរខេត្តឲ្យជួយអន្តរាគមន៍ចំពោះក្រុមហ៊ុនខាងលើដែលទទួលសិទ្ធិសាងសង់ពង្រីកផ្លូវវិថី២ធ្នូនេះ ធ្វើយ៉ាងណាឲ្យក្រុមហ៊ុននេះអនុវត្តន៍ការជួសជុលផ្លូវ និងពង្រីកផ្លូវធ្វើទៅតាមស្ថានភាពផ្លូវដែលមានស្រាប់ដើម្បីបញ្ចៀសផលប៉ះពាល់លំនៅដ្ឋានប្រជាពលរដ្ឋដែលកំពុងរស់នៅ។
លោក អ៊ី ធារិន នាយករងការិយាល័យអន្តរវិស័យសាលាខេត្តព្រះសីហនុបានធ្វើការបញ្ជាក់ថា ជុំវិញបញ្ហាបណ្ដឹង ប្រជាពលរដ្ឋសូមអន្តរាគមន៍ខាងលើនេះ អាជ្ញាធរខេត្តបានចុះទៅធ្វើការហាមឃាត់ និងផ្លាកការដ្ឋានសាងសង់ ពង្រីកផ្លូវរបស់ក្រុមហ៊ុនខាងលើជាបណ្ដោះអាសន្នហើយ ដើម្បីឲ្យមន្ត្រីជំនាញដែលពាក់ព័ន្ធសាងសង់ផ្លូវនេះធ្វើការសិក្សាឡើងវិញ។
លោក លី វ៉ានដា អភិបាលរងក្រុងព្រះសីហនុក៏បានមានប្រសាសន៍ផងដែរថា គម្រោងពង្រីកផ្លូវបន្ថែមរបស់ក្រុមហ៊ុនខាងលើនេះធ្វើយ៉ាងណានោះ លោកមិនដឹងនោះទេ ពីព្រោះនេះជារឿងរបស់មន្ត្រីជំនាញហើយចំពោះការសូមអន្តរាគមន៍របស់ប្រជាពលរដ្ឋអាជ្ញាធរខេត្តកំពុងធ្វើការដោះស្រាយហើយជាមួយនឹងមន្ត្រីជំនាញ។
គួរបញ្ជាក់ផងដែរថា ផ្លូវវិថី២ធ្នូនេះជាផ្លូវចាក់អ៊ុតកៅស៊ូយ៉ាងល្អប្រណិតដែលមានស្រាប់សាងសង់ឡើងរាប់សិបឆ្នាំមកហើយ ប៉ុន្តែថ្មីៗនេះក្រុមហ៊ុន(ប៉ុលឈុនស៊ី.ហ៊ួអ៊ីនធើណេសិនណលហូរថេល)មានគម្រោងធ្វើសណ្ឋាគារខ្នាតលំដាប់ផ្កាយប្រាំចំនួន៧០០បន្ទប់នៅលើទីតាំងដីរបស់ខ្លួនដែលស្ថិតនៅជាប់និងផ្លូវវិថី២ធ្នូនេះ ព្រមទាំងបានធ្វើការស្នើសុំធ្វើការពង្រីកផ្លូវវិថី២ធ្នូបន្ថែមប្រវែង៥០០ម៉ែត្រ ដោយទទឹងពង្រីកបន្ថែមទំហំ២០ម៉ែត្របូករួមលើទំហំចាស់ដែលមានស្រាប់។
ភាគីក្រុមហ៊ុនខាងលើក្រោយពីទទួលបានសិទ្ធិក្នុងការពង្រីកផ្លូវខាងលើនេះរួច ក៏បានចាប់ផ្ដើមធ្វើការឈូសឆាយកាយយកអាចម៍ដីនៅសងខាងផ្លូវចំណុចខ្លះជំរៅ៣ម៉ែត្រនិងចំណុចខ្លះជំរៅ៤ម៉ែត្រដឹកយកអាចម៍ដីទាំងនោះទៅចាក់បំពេញលើទីតាំងដីរបស់ខ្លួននៅជាប់មាត់បឹងខាងក្រោយអូតែលសុខា ជាហេតុធ្វើប្រជាពលរដ្ឋនាំគ្នាប្ដឹងតវ៉ាក្នុងពេលនោះតែម្តងទៅ ពីព្រោះបើទុកឲ្យក្រុមហ៊ុននៅតែបន្តជីកយកដីផ្លូវបែបនេះតទៅទៀត លំនៅដ្ឋានរបស់ប្រជាពលរដ្ឋដែលរស់នៅសងខាងផ្លូវច្បាស់ជាត្រូវបាក់ស្រុតរលំគ្រប់ពេលវេលាគេចមិនផុតនោះទេ។ ជុំវិញបញ្ហាភាពមិនប្រក្រតីខាងលើនេះ បើតាមការបង្ហើបប្រាប់ឲ្យដឹងពីមន្ត្រីជំនាញមន្ទីរសាធារណការខេត្តព្រះសីហនុម្នាក់ថា ដោយសារតែផ្លូវនេះមានស្ថានភាពខ្ពស់ទាបមិនស្មើគ្នា ហើយមានកំពស់ខ្ពស់ជាងទីតាំងដីក្រុមហ៊ុនដែលគ្រោងធ្វើការសាងសង់សណ្ឋាគារលំដាប់ផ្កាយប្រាំ ការកាយដីសម្រុតចុះក្រោម ដែលកន្លែងខ្លះជំរៅ៣ម៉ែត្រនិងកន្លែងខ្លះ៤ទៅ៥ម៉ែត្រនោះវាជាគម្រោងរបស់ក្រុមហ៊ុនដែលគេបានសិក្សារួចហើយក្នុងគោលដៅធ្វើយ៉ាងណាឲ្យផ្លូវនេះបានរាបស្មើ និងដីក្រុមហ៊ុនដោយក្រុមហ៊ុននេះគេមិនបានគិតពីផលប៉ះពាល់ផ្ទះសម្បែងជីវភាពរស់នៅរបស់ប្រជាពលរដ្ឋនោះឡើយ៕
កោះពស់
){kind=link}
0 Comments