ភ្នំពេញ ៖ នៅលើសង្វៀនបាយ័នបឹងស្នោនាល្ងាចថ្ងៃអាទិត្យ ទី០១ ខែកុម្ភៈ ឆ្នាំ២០១៥នេះ សូត្រ ប៊ុនធី អ្នកប្រដាល់ជើងខ្លាំងវ័យក្មេងនៃក្លិបបក្សីស្លាបដែក ត្រូវគេផ្គូផ្គងឲ្យជួបប្រកួតជាមួយ ហេង វាសនា អ្នកប្រដាល់ក្លិបព្រៃទទឹងខេត្តបាត់ដំបង។
អ្នកប្រដាល់ពីរនាក់នេះ មិនដែលជួបគ្នាទេកន្លងមក។ សូត្រ ប៊ុនធី គេជាអ្នកប្រដាល់ដែលត្រូវបានគេចាប់អារម្មណ៍ បន្ទាប់ពីអ្នកប្រដាល់វ័យក្មេង ឡៅ ចន្ទ្រា ក្លិបកងពលទ័ពឆ័ត្រយោង៩១១នោះ។ អ្នកប្រដាល់រូបនេះ មានកាយសម្បទាស្តើង ខ្ពស់ ដៃជើង វែង ដូចឡៅ ចន្ទ្រាដែរ។
ចំណែក ហេង វាសនា គេក៏ជាអ្នកប្រដាល់ជើងខ្លាំងស្រករក្រោយដែរ។ អ្នកប្រដាល់រូបនេះហើយ ធ្លាប់ផ្ដួលអ្នកប្រដាល់នៅភ្នំពេញប៉ុន្មាននាក់ហើយកន្លងមក។ ដោយសារតែបែបនេះទើប ប៊ុនធី ត្រូវគេផ្គូឲ្យជួបអ្នកខ្លាំងជាបន្តបន្ទាប់ ប៉ុន្តែតាំងពីជួបប្រកួតជាមួយអ្នកខ្លាំងនោះ ធ្វើឲ្យគេជួបបរាជ័យផ្ទួនៗប្រមាណ៣ប្រកួតចុងក្រោយនេះ។ វាសនា ប្រកួតចុងក្រោយនេះវាយចាញ់សៀវ សំណាង ក្លឹបក្រសួងការពារជាតិដោយពិន្ទុ។
ប៊ុនធី ត្រូវគេមើលឃើញល្អនិងខ្លាំង ដែលតម្រូវឲ្យអ្នកផ្គូផ្គងជួបជាមួយជើងខ្លាំងៗដូចវាសនាដែរ ហើយតាំងពីជួបជើងខ្លាំងនោះមក ប៊ុនធី ក៏ជួបបរាជ័យផ្ទួនៗដែរ។ គេប្រកួតចុងក្រោយនេះ វាយចាញ់ឃីម បូរ៉ា អ្នកប្រដាល់ក្លិបរស្មីភូមិគាបខេត្តបន្ទាយមានជ័យដោយពិន្ទុ។ ចាប់តាំងពីរូបគេវាយឈ្នះ ឈិត ង៉ុយ ជើងខ្លាំងនៃក្លិបអប្សរាគុនខ្មែរមកនោះ។
សូត្រ ប៊ុនធី មានផ្លែជង្គង់ កែងល្អ តែសម្រាប់កម្លាំងកាយសម្បទា និង តិចនិកប្រកួត បានន័យថា ល្បិចកលគឺនៅខ្ចីនៅឡើយ។ ក្នុងប្រភេទទម្ងន់៦០គីឡូក្រាមនេះ ក៏ពិបាករកអ្នកណាផ្ដួលយកឈ្នះប៊ុនធីបាននោះដែរ។
ប៉ុន្តែក៏មានអ្នកវិភាគកីឡាប្រដាល់ក្នុងស្រុកមួយចំនួនអះអាងថា មិនអាចមើលស្រាលចំពោះហេង វាសនាឡើយ។ ទោះជាយ៉ាងណា សម្រាប់ការទស្សន៍ទាយថា អ្នកណាឈ្នះ អ្នកណាចាញ់នោះ ពុំមាននរណាហ៊ានទាយនោះឡើយទេ។ ប៉ុន្តែរវាងអ្នកប្រដាល់ទាំងពីរនាក់នេះ គេមានជំនឿចិត្តលើ សូត្រ ប៊ុនធី ច្រើនជាង។
ផាន់ ចំណាន អ្នកប្រដាល់ក្លិបតេជ្ជៈរាជសីហ៍បង្ក្រាបគ្រឿងញៀនខេត្តរតនគិរី នឹងឡើងប្រកួតជាមួយឃឹម ពេជ្រចិន្តា អ្នកប្រដាល់ក្លឹបនិរោធមានជ័យ។ អ្នកប្រដាល់ពីរនាក់នេះ ក៏មិនធ្លាប់ដែលជួបគ្នាដែរពីមុនមក។
ចំណាន មានរាងខ្ពស់ ដៃជើងវែងជាងចិន្តា តែចិត្តប្រដាល់របស់គេរាងតូចជាងចិន្តា និងវាយចេញយឺតជាង ដែលធ្វើឲ្យការប្រកួតរបស់គេតែងជួបការបរាជ័យ។ ការប្រកួតចុងក្រោយនេះចំណាន បានវាយចាញ់ ម៉ន ចាន់ដារ៉ា អ្នកប្រដាល់ក្លឹបការិយាល័យទី៥ កងទ័ពជើងគោកក្នុងទឹកទី៣ ។ រីឯ ឃឹម ពេជ្រចិន្តា គេវាយអាងកម្លាំងបាយ ម្ល៉ោះហើយ ព្រេជ ចិន្តា វាយគ្មានបណ្ដាក់ដៃទេ គឺសម្រុកចូលវាយទៅលើគូប្រកួតជានិច្ច ដែលគូប្រកួតមានចិត្តតូចខ្លះ អាចចាញ់នឹងការសម្លុតរបស់ចិន្តា។ គេប្រកួតចុងក្រោយ វាយឈ្នះបូរី កល្យាណ ក្លិបបុរីគុនខ្មែរដោយពិន្ទុ។ ចាំមើលរវាង ផាន់ ចំណាន និង ឃឹម ពេជ្រចិន្តា តើនរណាជាអ្នកឈ្នះសម្រាប់ការជួបគ្នាលើកដំបូងនេះ។
ចាន់ ចំរើន អ្នកប្រដាល់ក្លិបនិរោធមានជ័យនឹងឡើងប្រកួតជាមួយ មាស សារ៉ាក់ អ្នកប្រដាល់ក្លិបដួងសែនសុខគុនខ្មែរ។ នេះជាជំនួបលើកដំបូងរបស់អ្នកប្រដាល់ទាំងពីរ។ មាស សារ៉ាក់ ជាអ្នកប្រដាល់ជើងចាស់ គ្រាន់តែគេមានចិត្តប្រដាល់មិនសូវធំប៉ុណ្ណោះ។ ហើយការជួបជាមួយ ចំរើននេះ សារ៉ាក់ មិនអាចមើលងាយបានទេ ព្រោះថាចាន់ ចំរើន ថ្វីត្បិតតែជាអ្នកប្រដាល់ចំណូលថ្មី ប៉ុន្តែគេវាយខ្លាំង ទាំងទាត់ ជង្គង់ និងកែង។ ប្រកួតចុងក្រោយនេះ ចំរើន វាយឈ្នះ សល់ ប៊ុនហ៊ីម ក្លិបកុសលកីឡាដោយពិន្ទុ។ ឯការប្រកួតចុងក្រោយរបស់ មាស សារ៉ាក់វិញ គឺវាយឈ្នះហេង វាសនា ក្លិបព្រៃទទឹងខេត្តបាត់ដំបងដោយពិន្ទុ។ ចាំមើល តើ ហេង វាសនាឈ្នះ ឬក៏ពៅ សារ៉ាក់ឈ្នះ ?
ចំណែក វ៉ាន់ សារ៉ាត់ អ្នកប្រដាល់ក្លិបកងរាជអាវុធហត្ថរាជធានីភ្នំពេញ នឹងត្រូវឡើងប្រកួតជាមួយ ម៉ន សនសុងអ្នកប្រដាល់ក្លឹបការិយាល័យទី៥កងទ័ពជើងគោក។ ពីរនាក់នេះ ពុំធ្លាប់ដែលជួបគ្នាទេពីមុនមក។ សម្រាប់ការជួបគ្នាលើកដំបូងនេះ មិនដឹងថា នរណាជាអ្នកឈ្នះនោះទេ៕
វិសិទ្ធ
0 Comments