ភ្នំពេញ ៖ ប្ដី-ប្រពន្ធបើកម៉ូតូឌុបគ្នាក្នុងល្បឿនលឿនជ្រុលទៅបុកសមត្ថកិច្ចមួយក្រុមមានគ្នា៤នាក់កំពុងតែបណ្ដើរម៉ូតូដែលជនសង្ស័យផ្លុងចោលមួយគ្រឿងយកទៅរក្សានៅអធិការដ្ឋានខណ្ឌចំការមនទាំងកំរោល បណ្ដាលឲ្យម៉ូតូប៉ើង និងខ្ទាតរងរបួសធ្ងន់-ស្រាល៣នាក់។
កាលពីវេលាម៉ោង៤និង៣០នាទីទៀបភ្លឺ ថ្ងៃទី៣១ ខែមករា ឆ្នាំ២០១៥ នៅចំណុចផ្លូវលេខ៥១ កែងនឹងផ្លូវលេខ២៩៤ ស្ថិតក្នុងសង្កាត់បឹងកេងកង១ ខណ្ឌចំការមន។ សាក្សីបានឱ្យដឹងថា នៅមុនពេលកើតហេតុសមត្ថកិច្ចបានមួយក្រុមមានគ្នា៤នាក់ជិះម៉ូតូម៉ាក FTR ២គ្រឿងបើកឌុបគ្នាល្បាតតាមមូលដ្ឋាន ពេលកំពុងល្បាត ស្រាប់តែប្រទះឃើញជនសង្ស័យម្នាក់កំពុងបណ្ដើរម៉ូតូកូនទាមួយគ្រឿង ហើយជនសង្ស័យពេលដែលឃើញសមត្ថកិច្ចក៏បានផ្ដួលម៉ូតូចោលរត់ចូលទៅក្នុងវត្តលង្កា រួចក៏គេចខ្លួនបាត់ស្រមោល។ បន្ទាប់មកសមត្ថកិច្ចបានយកម៉ូតូដែលជនសង្ស័យផ្ដួលចោលខាងលើបណ្ដើរទៅកាន់អធិការដ្ឋានខណ្ឌចំការមនរក្សាទៅធ្វើការស្រាវជ្រាវ ដោយសមត្ថកិច្ច៣នាក់ជិះម៉ូតូFTR និងម្នាក់ទៀតឡើងចែវបណ្ដើរម៉ូតូកូនទា ពណ៌ទឹកប្រាក់ ពាក់ស្លាកលេខNGO-0212 បណ្ដើរតាមផ្លូវព្រះសីហនុឡើងមកផ្លូវលេខ៥១ ក្នុងទិសដៅពីជើងទៅត្បូង ខណៈមកដល់ចំណុចផ្លូវកែង២៩៤ ក៏ត្រូវបានម៉ូតូហុងដាឌ្រីម ពណ៌ខ្មៅមួយគ្រឿង ពាក់ស្លាកលេខភ្នំពេញ1BW-2636 បើកឌុបគ្នាតាមផ្លូវលេខ២៩៤ បើកមកបុកចំពាក់កណ្ដាលម៉ូតូកូនទាពេញទំហឹង បណ្ដាលឱ្យម៉ូតូប៉ើងខ្ទាតរបួសគ្រិចកជើងសមត្ថកិច្ចដែលបណ្ដើរម៉ូតូនោះ។ ចំណែកពីរនាក់ប្ដី-ប្រពន្ធជិះម៉ូតូហុងដាឌ្រីមរងរបួសធ្ងន់។
ក្រោយពេលកើតហេតុជនរងគ្រោះរបួសធ្ងន់ត្រូវបានគរបញ្ជូនទៅសង្គ្រោះនៅមន្ទីរពេទ្យ ចំណែកម៉ូតូរបស់ជនរងគ្រោះត្រូវបានសមត្ថកិច្ចយកទៅរក្សាទុកនៅអធិការដ្ឋានខណ្ឌចំការមនរង់ចាំដោះស្រាយគ្នាតាមនីតិវិធីច្បាប់ជាក្រោយ។
ឌួងវិរះជ័យ
0 Comments