យោងទៅតាមការប៉ាន់ស្មានបានឲ្យដឹងថា អតិផរណាប្រចាំឆ្នាំរបស់រុស្ស៊ី សម្រាប់ឆ្នាំ២០១៤នឹងឡើងដល់ប្រហែល១១.៤ភាគរយ ដែលអូសទាញដោយតម្លៃប្រាក់រូប (rouble) ដាំក្បាលចុះ។ ការធ្លាក់តម្លៃរូបិយប័ណ្ណនេះ បានជំរុញតម្លៃទំនិញឲ្យឡើងថ្លៃ ជាពិសេសម្ហូបអាហារដែលបានឡើងប្រហែល១៥.៤ភាគរយនៅក្នុងឆ្នាំ២០១៤។
សេវាស្ថិតិរបស់រដ្ឋ Rosstat បាននិយាយថា តម្លៃគ្រឿងប្រើប្រាស់ឡើង២.៦ភាគរយនៅក្នុងខែធ្នូ រយៈពេលមួយខែ នៅពេលដែលប្រាក់រូបបានទទួលរងនូវការធ្លាក់ចុះដ៏ជ្រៅបំផុតរបស់ខ្លួន។ ក្នុងពេលជាមួយគ្នានេះ ប្រទេសរុស្ស៊ីបានធ្វើអន្ដរាគមន៍ដើម្បីគាំទ្រធនាគារមួយទៀតគឺធនាគារ Gazprombank។
នៅក្នុងឆ្នាំ២០១៣ កម្រិតអតិផរណាប្រចាំឆ្នាំគឺ៦.៥ភាគរយ។ តួលេខអតិផរណាឆ្នាំ២០១៤ គឺខ្ពស់បំផុតចាប់តាំងពីរុស្ស៊ី មានវិបត្ដិហិរញ្ញវត្ថុនៅក្នុងឆ្នាំ២០០៨។ តម្លៃប្រេងទាប និងការដាក់ទណ្ឌកម្មរបស់លោកខាងលិចដោយសារប្រទសអ៊ុយក្រែននោះ បានអូសទាញតម្លៃប្រាក់រូបឲ្យធ្លាក់ចុះ មានន័យថា តម្លៃនៃទំនិញជាច្រើន ជាពិសេសការនាំចូលបានឡើងថ្លៃ។
Rosstat បាននិយាយថា តម្លៃផលិតផលមិនមែនម្ហូបអាហារឡើង៨.១ភាគរយនៅក្នុងអំឡុងឆ្នាំ២០១៤ ចំណែកបន្ទុកសេវាបានឡើងដល់១០.៥ភាគរយ។ Rosstat នឹងត្រូវចេញផ្សាយទិន្នន័យអតិផរណានៅទីបញ្ចប់នៅថ្ងៃទី១២ ខែមករា។
សេដ្ឋកិច្ចរបស់ប្រទេសរុស្ស៊ីរួញនៅក្នុងខែវិច្ឆិកា ជាលើកដំបូងនៅក្នុងរយៈពេល៥ឆ្នាំ និងត្រូវបានគេរំពឹងថា នឹងធ្លាក់ទៅក្នុងភាពមិនរីកចម្រើនទៅមុខនៅត្រីមាសទី១នៃឆ្នាំ២០១៥។
ការធ្លាក់ចុះនៅក្នុងតម្លៃប្រេង បានកាត់បន្ថយប្រាក់ចំណូលដែលរកបានដោយរដ្ឋាភិបាល ចំណែកការដាក់ទណ្ឌកម្មមកលើប្រទេសរុស្ស៊ីដោយសារសកម្មភាពរបស់ខ្លួននៅក្នុងប្រទេសអ៊ុយក្រែននោះ បានធ្វើឲ្យប៉ះពាល់ដល់វិស័យធនាគារ ដោយបានកាត់ផ្ដាច់ការផ្ដល់ប្រាក់កម្ចីឲ្យបរទេស។
កាលពីថ្ងៃពុធ រដ្ឋាភិបាលបានទិញជិត៤១ពាន់លានរូប (៤៣៧លានអឺរ៉ូ, ៦៨៣លានដុល្លារ) ភាគហ៊ុនរបស់ធនាគាររដ្ឋ Gazprombank ដែលជាផ្នែកមួយនៃផែនការគាំទ្រ។ Gazprombank បាននិយាយនៅក្នុងសេចក្ដីថ្លែងការណ៍មួយថា ការចាក់បញ្ចូលសាច់ប្រាក់នេះ ជួយធនាគារដើម្បីពង្រឹងរចនាសម្ព័ន្ធមូលធនរបស់ខ្លួន និងផ្ដល់នូវទំហំគ្រប់គ្រាន់ដើម្បីពង្រីកប្រតិបត្ដិការរបស់ខ្លួន៕
ថាលីយ៉ាន
0 Comments