កណ្ដាល ៖ សាខាកាកបាទក្រហមកម្ពុជាខេត្តកណ្តាលកាលពីព្រឹកថ្ងៃទី២៨ ខែមករា ឆ្នាំ២០១៥ បានបើកកិច្ចប្រជុំស្ដីពីការផ្សព្វផ្សាយផែនការការងាររបស់កាកបាទក្រហមកម្ពុជាអាណត្តិទី៦ ក្រោមអធិបតីភាពលោកជំទាវ ពុំ ចន្ទីនី អគ្គលេខាធិការកាកបាទក្រហមកម្ពុជា។ ពិធីនេះបានការអញ្ជើញ ចូលរួមពីលោក ជាវ តាយ អភិបាលរងខេត្ត និងជាប្រធានគណៈកម្មាធិការសាខាកាកបាទក្រហមកម្ពុជាខេត្តកណ្តាល ប្រតិភូគណៈកម្មាធិការកណ្ដាលកាកបាទក្រហមកម្ពុជា សមាជិកសមាជិកាគណៈកម្មាធិការ សាខា អនុសាខាស្រុក-ក្រុង ក្រុមប្រតិបត្តិសរុបចំនួន៥២នាក់។
លោក ជាវ តាយ មានមតិស្វាគមន៍និងគូសបញ្ជាក់ថា កិច្ចប្រជុំផ្សព្វផ្សាយផែនការការងាររបស់កាកបាទក្រហមកម្ពុជាអាណត្តិទី៦ មានគោលបំណងលើកកម្ពស់ការយល់ដឹងពីបេសកកម្មការងាររបស់កាកបាទក្រហមកម្ពុជា ដែលត្រូវអនុវត្តនៅក្នុងអាណត្តិទី៦ ដែលមានរយៈពេល៦ឆ្នាំ ពី ២០១៤ ដល់២០១៩ មន្ត្រីកាកបាទក្រហម ដើម្បីឈានទៅដល់ភាពជោគជ័យក្នុងកិច្ចប្រតិបត្តិការផែនការការងារក្នុងវិស័យស្នូលទាំង៤របស់កាកបាទក្រហមកម្ពុជា។ សាខាកាកបាទក្រហមកម្ពុជាខេត្ត ក៏ដូចជាអនុសាខាគ្រប់ស្រុក-ក្រុង ដែលជាស្ថាប័នថ្នាក់មូលដ្ឋានរបស់កាកបាទក្រហមកម្ពុជា ក៏មានភារកិច្ចធ្វើប្រតិបត្តិការលើគ្រប់វិស័យតាមផែនការរបស់ថ្នាក់កណ្ដាលផងដែរ។
មានប្រសាសន៍ក្នុងបទបង្ហាញលោកជំទាវ ពុំ ចន្ទីនី អគ្គលេខាធិការកាកបាទក្រហមកម្ពុជា បានបញ្ជាក់ពីខ្លឹមសារសំខាន់ៗរួមមាន៖ ១-គោលការណ៍គ្រឹះទាំង៧របស់កាកបាទក្រហមកម្ពុជា ២-ការរៀបចំ និងការប្រព្រឹត្តទៅរបស់កាកបាទក្រហមកម្ពុជាមាន១៥ជំពូក , ៣-ទិសដៅការងារសំខាន់ៗក្នុងអាណត្តិទី៦របស់កាកបាទក្រហមកម្ពុជា , ៤-អគ្គអភិបាល និងក្រុមប្រតិបត្តិនៅថ្នាក់សាខា ,៥-កញ្ចប់សកម្មភាពអប្បបរមា និងទី៦-ជំហានដែលត្រូវអនុវត្តបន្ត។ ជាមួយគ្នានេះដែរលោកជំទាវអគ្គលេខាធិការបានផ្សព្វផ្សាយលិខិតសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ស្ដីពីភារកិច្ចមួយចំនួនដែលត្រូវយកចិត្តទុកដាក់ក្នុងក្របខណ្ឌជាភារកិច្ចស្នូលរបស់កាកបាទក្រហមកម្ពុជា មេត្តាពិនិត្យលទ្ធភាពរៀបចំ និងអនុវត្តភារកិច្ចជាចាំបាច់មួយចំនួន បន្ថែមទៀតរួមមាន ៖ ១-រៀបចំសកម្មភាពចុះសួរសុខទុក្ខ និងផ្តល់កញ្ចប់ជំនួយសម្រាប់ជីវភាពរស់នៅនៃទារក-កុមារ ដែលកំពុងរស់នៅក្នុងពន្ធនាគារ-មណ្ឌលកែប្រែ ជាមួយឪពុក-ម្តាយ ឬ អាណាព្យាបាល។ ២-រៀបចំកញ្ចប់អំណោយសម្រាប់កំណើតទារកម្នាក់ៗនៅមណ្ឌលសុខភាព ឬមន្ទីរពេទ្យសាធារណៈ ដោយដាក់ថាជាអំណោយរបស់សាខា អនុសាខា ឬដាក់ឈ្មោះសប្បុរសជនផ្ទាល់។ ៣-រៀបចំធ្វើការប៉ាន់ប្រមាណសមត្ថភាពសាខា ដើម្បីត្រៀមកសាង និងអនុវត្តផែនការអភិវឌ្ឍន៍សាខារយៈពេល៦ឆ្នាំ ( ២០១៤-២០១៥ ) ដោយមានការឧបត្ថម្ភគាំទ្របច្ចេកទេសពីថ្នាក់កណ្ដាល។ ៤-ការងារយុវជនកាកបាទក្រហម សូមយកចិត្តទុកអនុវត្តឲ្យបានគ្រប់ជ្រុងជ្រោយ គោលនយោបាយយុវជនកាកបាទក្រហមកម្ពុជា៕
មុនី
0 Comments