សហព័ន្ធកីឡាបាល់ទះកម្ពុជាបានប្រកាសជាផ្លូវការពីព្រឹត្តិការណ៍ប្រកួតបាល់ទះដណ្ដើមពានរង្វាន់ឆ្នាំ២០១៥ ដែលគេប្រសិទ្ធិនាមថា «ពានរង្វាន់ឯកឧត្តមនាយឧត្តមសេនីយ៍ នេត្រ សាវឿន អគ្គស្នងការនគរបាលជាតិ»។ នេះជាព្រឹត្តិការណ៍លើកទី១សម្រាប់ឆ្នាំ២០១៥នេះ ដែលសហព័ន្ធកីឡាបាល់ទះកម្ពុជា សហការជាមួយសហភាពសហព័ន្ធយុវជនកម្ពុជា រៀបចំនូវការប្រកួតបាល់ទះដ៏ធំអស្ចារ្យនេះ។
យោងតាមសេចក្តីជូនដំណឹងរបស់សហព័ន្ធកីឡាបាល់ទះកម្ពុជាចេញថ្ងៃទី២៩ ខែមករា ឆ្នាំ២០១៥នេះបានឲ្យដឹងថា ក្លិបបាល់ទះខ្លាំងៗចំនួន៨ត្រូវបានសហព័ន្ធជូនដំណឹងឲ្យដាក់ពាក្យចូលរួមប្រកួត ដែលមានជាអាទិ៍ ១.ក្លិបបាល់ទះសហភាពសហព័ន្ធយុវជនកម្ពុជាខេត្តព្រៃវែង ២.សមាគមបាល់ទះក្រសួងមហាផ្ទៃ ៣.ស្នងការដ្ឋាននគរបាលខេត្តបាត់ដំបង ៤.ខេត្តកំពង់ចាម ៥.កងពលធំអន្តរាគមន៍លេខ៣ ខេត្តព្រះវិហារ ៦.ស្នងការនគរបាលខេត្តកំពង់ចាម ៧.បញ្ជាការដ្ឋានអង្គរក្ស ៨.កងពលតូចអន្តរាគមន៍លេខ៧។
លោក បឹង គឹមតោ អគ្គលេខាធិការសហព័ន្ធកីឡាបាល់ទះកម្ពុជាបានឲ្យដឹងថា ការដាក់ពាក្យចូលរួមប្រកួតនឹងចាប់ទទួលពីថ្ងៃជូនដំណឹងនេះ រហូតដល់ថ្ងៃទី១២ ខែកុម្ភៈ ឆ្នាំ២០១៥ ហើយការប្រជុំចាប់ឆ្នោតនឹងប្រព្រឹត្តទៅនៅថ្ងៃទី១៣ ខែកុម្ភៈ វេលាម៉ោង១៦និង០០ នៅទីស្នាក់ការសហភាពសហព័ន្ធយុវជនកម្ពុជាខេត្តព្រៃវែង រាជធានីភ្នំពេញ។
អគ្គលេខាធិការសហព័ន្ធកីឡាបាល់ទះរូបនេះបានបញ្ជាក់ឲ្យដឹងទៀតថា ការប្រកួតជម្រុះក្នុងពូល នឹងធ្វើចាប់ពីថ្ងៃទី១៤ ខែកុម្ភៈ ដល់ ថ្ងៃទី១៨ ខែកុម្ភៈ នៅទីលានកីឡាបាល់ទះក្លិបសហភាពសហព័ន្ធយុវជនកម្ពុជាខេត្តព្រៃវែង និង ទីលានកីឡាបាល់ទះក្រសួងមហាផ្ទៃ(ព្រែកប្រា)។
ចំពោះការប្រកួតផ្តាច់ព្រ័ត្រនឹងប្រព្រឹត្តទៅនៅក្នុងវិមានពហុកីឡដ្ឋានជាតិនៅថ្ងៃទី១៨ ខែកុម្ភៈ ឆ្នាំ២០១៥៕
0 Comments