ភ្នំពេញ ៖ អ្នកប្រដាល់ទម្ងន់៥៧គីឡូក្រាម៤រូបនឹងឡើងប្រកួតដណ្ដើមពានអនុស្សាវរីយ៍បាយ័នលើកទី៣សម្រាប់ដើមឆ្នាំ២០១៥នេះ។
អ្នកប្រដាល់ទាំង៤រូបនោះ រួមមាន អ៊ុង ស៊ីណា មកពីក្លិបសុភានូមានជ័យ, ជុន សាវុធ ក្លិបពោធិជ័យកីឡា, ឯម ស៊ីថុង ក្លិបឫទ្ធីពោធិសែនជ័យ និង ម៉ៅ រិទ្ធី ក្លិបពន្លឺសាមគ្គីខេត្តបាត់ដំបង។
ពួកគេទាំង៤នាក់នេះនឹងជួបប្រកួតគ្នានៅល្ងាចថ្ងៃសៅរ៍ ទី៣១ ខែមករា ឆ្នាំ២០១៥នេះ នៅលើសង្វៀនបាយ័នស្ទឹងមានជ័យ។ ការប្រកួតប្រព្រឹត្តិទៅតាមរូបមន្តជាMarathon គឺចាញ់ហាលអាវ ឈ្នះត្រូវបន្តការប្រកួតទៀត ទាល់តែរកឃើញជើងឯកម្ចាស់ពានក្នុងពេលតែមួយ។
ការប្រកួតចែកចេញជាពីរដំណាក់កាល ដែលដំណាក់កាលទី១-ប្រកួតជម្រុះ ដើម្បីជម្រុះចោលពីរនាក់ដែលចាញ់ៗ ហើយពីរនាក់ដែលឈ្នះនោះត្រូវឡើងទៅជួបគ្នាក្នុងដំណាក់កាលទី២- ដែលជាការប្រកួតផ្តាច់ព្រ័ត្រដណ្ដើមពានអនុស្សាវរីយ៍របស់ស្ថានីយទូរទស្សន៍បាយ័ន។
គួរបញ្ជាក់ថា ការប្រកួតក្នុងដំណាក់កាលទី១-គឺប្រកួតតែ៣ទឹកប៉ុណ្ណោះ ដោយក្នុងមួយទឹកមាន៣នាទី និងការប្រកួតក្នុងដំណាក់កាលផ្តាច់ព្រ័ត្រ គឺវាយ៥ទឹកតែមួយទឹកវាយតែ២នាទីទេ។
សម្រាប់ការជួបគ្នាគូមុនដំបូងគេនោះគឺ អ៊ុង ស៊ីណា ត្រូវជួបជាមួយ ជុន សាវុធ។ ស៊ីណា ធ្លាប់វាយឈ្នះ សាវុធ ដោយពិន្ទុ២ដង ហើយកាលពីក្នុងឆ្នាំ២០១៣កន្លងមក។ ដូច្នេះជំនួបលើកនេះ ប្រៀបដូចជាការឡើងសងសឹករបស់ ជុន សាវុធដែរ។
ទោះជាយ៉ាងណាសម្រាប់ការប្រកួតលើកនេះមិនប្រាកដថា អ៊ុង ស៊ីណា ឈ្នះ សាវុធ ទៀត ឬក៏យ៉ាងណានោះទេ ព្រោះថា ជុន សាវុធឥឡូវនេះ គេក៏ល្អជាងមុនដែរ។ ចាំមើល តើ ស៊ីណាឬក៏សាវុធ ដែលឡើងទៅវគ្គផ្តាច់ព្រ័ត្រនោះ?
ចំពោះអ្នកប្រដាល់ ឯម ស៊ីថុង និង ម៉ៅ រិទ្ធ វិញ គឺជាការជួបគ្នារវាងអ្នកប្រដាល់ជើងចាស់(ម៉ៅ រិទ្ធី) និងអ្នកប្រដាល់ស្រករក្រោយ(ឯម ស៊ីថុង)។ ពួកគេទាំងពីរនាក់នេះ ពុំដែលប៉ះប្រកួតគ្នាទេកន្លងមក។ ទោះបីជាយ៉ាងនេះក្តី ម៉ៅ រិទ្ធី មិនត្រូវបានរំពឹងថាឈ្នះស៊ីថុងនោះឡើយ។ ដោយសារ រិទ្ធី មានកម្ពស់ទាបជាង ស៊ីថុង ហើយមួយទៀតកម្លាំងស៊ុហ្វរបស់រិទ្ធក៏មិនសូវរឹងមាំដូចស៊ីថុងដែរ។
ប៉ុន្តែយ៉ាងណា គេក៏មិនទាន់ច្បាស់ថាស៊ីថុង ឈ្នះម៉ៅ រិទ្ធី នោះដែរ ព្រោះស៊ីថុងមិនសូវមានកលល្បិចក្នុងការប្រកួតដូចរិទ្ធីនោះទេ។ ដូច្នេះ ចាំមើលការប្រកួតជាក់ស្តែងតើម៉ៅ រិទ្ធីឈ្នះ ឬក៏ឯម ស៊ីថុងឈ្នះនោះ ?
គួរបញ្ជាក់ថា កាលពីវាយដណ្ដើមពានលើកទី១កាលពីថ្ងៃទី១០ ខែមករា ឆ្នាំ២០១៥នេះ គឺប្រកួតក្នុងទម្ងន់៦៣,៥០០គីឡូក្រាម ដែលមានជើងខ្លាំង៤រូបដូចគ្នានេះដែរ ហើយអ្នកដែលដណ្ដើមបានជាជើងខ្លាំងលេខ១នោះ គឺសុខ សុវណ្ណ អ្នកប្រដាល់ក្លឹបកងពលតូចលេខ៣១ ក្រោយពីគេបានយកឈ្នះឯម លីថូ ក្លឹបឫទ្ធីពោធិសែនជ័យក្នុងវគ្គផ្តាច់ព្រ័ត្រ។ ការប្រកួតដណ្ដើមពានលើកទី២ទម្ងន់៦៥គីឡូក្រាម ដែលមាន៤នាក់ដដែល គឺបានទៅលើលួន សុខខេង ក្លិបអាស៊ីកីឡា ក្រោយវាយឈ្នះធី តុងហ៊ី ក្លឹបសាលវ័ន្តកីឡាក្នុងវគ្គផ្តាច់ព្រ័ត្រនោះ។
ចាំមើលពានទម្ងន់៥៧គីឡូក្រាមលើកទី៣នេះនឹងបានទៅអ្នកប្រដាល់រូបណាមួយក្នុងចំណោមអ៊ុង ស៊ីណា, ជុន សាវុធ, ឯម ស៊ីថុង និង ម៉ៅ រិទ្ធី នេះ៕
0 Comments