ភ្នំពេញ ៖ ផល សោភ័ណ្ឌ និងឈិន ក្វាន់ង៉ុយ ជួបថៃ អ្នកប្រដាល់ជើងខ្លាំងរបស់កម្ពុជារឿង សោភ័ណ្ឌ មកពីក្លិបមកុដរាជសីហ៍នឹងជួបប្រកួតជាមួយអ្នកប្រដាល់ថៃឈ្មោះ Sen Sep ក្នុងកម្មវិធីប្រដាល់ថ្មីកំពូលជើងឯក Black Cat របស់ SEA-TV ដែលចាប់ផ្តើមនាម៉ោង៨យប់ ថ្ងៃអាទិត្យទី០១ ខែកុម្ភៈ ឆ្នាំ២០១៥នេះ។ អ្នកប្រដាល់ទាំងពីរនាក់នេះជួបគ្នាម្តងហើយ កាលពីថ្ងៃទី២៤ ខែមករា ឆ្នាំ២០១៥ នៅលើសង្វៀនខេត្តកំពង់ស្ពឺ ដែលក្នុងការប្រកួតគ្នានោះ ពួកគេវាយស្មើពិន្ទុគ្នា។ ជើងខ្លាំងពីរនាក់នេះ ប្រកួតគ្នាក្នុងទម្ងន់៦៧គីឡូក្រាម។
Sen Sepនេះ គេខ្លាំងនិងល្អណាស់ ហើយបើក្រៅពីរឿង សោភ័ណ្ឌនោះ ម្ល៉េះក៏ពិបាកទប់ទល់ជាមួយគេណាស់។ អ្នកប្រដាល់ថៃរូបនេះ ល្អទាំងកណ្ដាប់ដៃ ជើងទាត់ ជង្គង់ កែងកំប្លេតែម្តង។ គេនៅចាំបានថា វាយ៤ទឹកដំបូងនោះ Sen Sepនេះ មានប្រៀបឈ្នះលើរឿង សោភ័ណ្ឌទៅហើយ តែបើកុំ សោភ័ណ្ឌ យកប្រៀបឈ្នះក្នុងទឹកទី៥វិញ ដោយទាត់ចូលកណ្ដៀតក្អមរបស់ Sen Sep មួយជើងពេញ ដែលធ្វើឲ្យគេចង់គាំងម្តងៗនោះ ក៏មិនបានស្មើគ្នាដែរ។
អ្នកប្រដាល់ថៃ Sen Sep រូបនេះមានប្រវត្តិប្រកួតតិចជាងរឿង សោភ័ណ្ឌ គឺចំនួន៧៩លើក ដោយឈ្នះ៦៤លើក ចាញ់១៤លើក និងស្មើ១លើក(ស្មើជាមួយសោភ័ណ្ឌ) តែគេវាយល្អជាងអ្នកប្រដាល់ថៃដែលមកមុនៗ។ ទោះជាយ៉ាងណាមកប៉ះជាមួយរឿង សោភ័ណ្ឌ ជើងខ្លាំងរបស់កម្ពុជាដែលមានប្រវត្តិប្រកួតរហូតដល់ទៅ១២៤លើក ក្នុងនោះឈ្នះ១០៤លើក ចាញ់១៤លើក និងស្មើពិន្ទុ៦លើក Sen Sepក៏ពិបាកទំពារដែរ។
រឿង សោភ័ណ្ឌ ជាអ្នកប្រដាល់មានចិត្តខ្លាំងបំផុត គេមិនងាយអោយថៃស៊ីងាយៗទេ។ ជាអ្នកប្រដាល់ដែលមានកណ្ដាប់ដៃធ្ងន់ ជើងធ្ងន់នោះ មិនញញើតSen Sep មិនតិចណាទេ បើទោះជាធ្លាប់ភ្លក្សម្តងហើយនេះ។ ដូច្នេះ ចាំមើលការជួបគ្នាលើកទី២នេះ តើរឿង សោភ័ណ្ឌ ឬ Sen Sep ដែលឈ្នះការប្រកួតនេះ ?
ផល សោភ័ណ្ឌ អ្នកប្រដាល់ជើងខ្លាំងនៃក្លិបតាឡីដំរីមានរិទ្ធ ដែលទើបបំបាក់ថៃ(Kwan Meung)ឲ្យសន្លប់ក្នុងទឹកទី២ កាលពីថ្ងៃទី២៥ ខែមករាកន្លងមកនេះ ពេលនេះត្រូវជួបជាមួយអ្នកប្រដាល់ថៃម្នាក់ទៀត ឈ្មោះ Tor Khit ក្នុងទម្ងន់៦៣,៥០០គីឡូក្រាម។
Tor Khit នេះ គេពុំដែលមកប្រកួតនៅភ្នំពេញនោះទេ។ តាមលោកញាណ សុធី អ្នក ចាត់ចែងកម្មវិធីប្រដាល់នៅSEA-TV បានឲ្យដឹងថា អ្នកប្រដាល់ថៃរូបនេះជាជើងខ្លាំងនៅបាងកក ដោយធ្លាប់ប្រកួតបានចំនួន៧៩លើក ក្នុងនោះវាយឈ្នះ៦៨លើក ចាញ់១០លើក និងស្មើ១លើក។ បើធៀបជាមួយ ផល សោភ័ណ្ឌ គឺច្រើនជាងតិចតួចប៉ុណ្ណោះ ដោយ សោភ័ណ្ឌ ប្រកួតបាន៧២លើក វាយឈ្នះ៦២លើក និងចាញ់១០លើក។
សោភ័ណ្ឌ ជាអ្នកប្រដាល់ជើងខ្លាំងនៅកម្ពុជាដែលធ្លាប់ផ្ដួលយកឈ្នះថៃ៦នាក់មកហើយ ហើយនេះជាលើកទី៧របស់ សោភ័ណ្ឌ ហើយ ដែលជួបប្រកួតជាមួយថៃនេះ។ កាលពីពាក់កណ្ដាលខែធ្នូកន្លងមកនេះ សោភ័ណ្ឌ បានបំបាក់អ្នកប្រដាល់ថៃឈ្មោះ Ruerob Windy មិនឲ្យតដៃកើតក្នុងទឹកទី២ប៉ុណ្ណោះ ហើយជួបថៃចុងក្រោយនេះHor.Kwanmeung (ថ្ងៃទី២៥ ខែមករា ឆ្នាំ២០១៥) គេក៏បំបាក់អោយសន្លប់ក្នុងទឹកទី២ដែរ។
Tor Khit ដែលរាងចាញ់កម្ពស់បន្តិចផងនោះ ប៉ះជាមួយសោភ័ណ្ឌដែលមានកណ្ដាប់ដៃខ្លាំង រហ័ស និង លឿននោះ មិនដឹងថាមានវាសនាដូចអ្នកពីរនាក់មុនឬយ៉ាងណានោះទេ។ ចាំមើល ផល សោភ័ណ្ឌ ផ្ដួលអ្នកប្រដាល់ថៃ Tor Khit នេះ បានឬអត់ ?
ឈិន ក្វាន់ង៉ុយ អ្នកប្រដាល់ក្លិបមកុដរាជសីហ៍ ត្រូវជួបជាមួយអ្នកប្រដាល់ថៃ Chhai Rak ក្នុងទម្ងន់៦៣,៥០០គីឡូក្រាម។ អ្នកប្រដាល់ថៃ Chhai Rak ដែលជាគូររបស់ក្វាន់ង៉ុយនេះ មិនធ្លាប់មកប្រកួតនៅលើសង្វៀនភ្នំពេញនោះទេ។
Chhai Rak ប៉ះជាមួយក្វាន់ង៉ុយ អាចថាល្អមើល ដោយសារមានកម្ពស់ប្រហាក់ប្រហែលគ្នា តែយ៉ាងណារឿងលទ្ធផលឈ្នះចាញ់ គឺមិនអាចទាយមុនបានទេ។ អ្នកប្រដាល់ថៃរូបនេះធ្លាប់ប្រកួតបាន៥៦លើក ក្នុងនោះវាយឈ្នះ៤៥លើក ចាញ់៨លើក និងស្មើ៣លើក ខណៈដែលក្វាន់ង៉ុយ គេប្រកួតបាន៦៨លើក ឈ្នះ៥៦លើក ចាញ់១១លើក និងចាញ់១លើក។ ឈិន ក្វាន់ង៉ុយ ជាលើកទី៥របស់គេហើយ ដែលឡើងប្រកួតជាមួយថៃនេះ ដែល៤នាក់មុនសុទ្ធតែចាញ់ក្វាន់ង៉ុយទាំងអស់។
ឈិនក្វាន់ង៉ុយ បើមានការតាំងចិត្តប្រកួតនោះ គេប្រហែលជាមិនចាញ់ណោះឡើយ ប៉ុន្តែខ្លាចតែក្វាន់ង៉ុយចិត្តតូចចាញ់ច្រាបអ្នកប្រដាល់ថៃនោះទេ ទើបអាចចាញ់ Chhai Rak បើគេរឹងមាំដូចជាប្រកួតជាមួយថៃ៤នាក់លើកមុននោះ ក្វាន់ង៉ុយមិនចាញ់នោះឡើយ៕
វិសិទ្ធ
0 Comments