បន្ទាយមានជ័យ ៖ ការលោភលន់គ្មានភស្តុតាង រឿងម្ចាស់ទាប្ដឹងប្រជាពលរដ្ឋទាសំណង២៣លានរៀល ត្រូវបានអាជ្ញាធរឃុំទាំងពីរដោះស្រាយបញ្ចប់រឿងប្រជាពលរដ្ឋសងត្រឹម៥លានរៀលតែប៉ុណ្ណោះ។ ការដោះស្រាយសំណងនេះបានប្រព្រឹត្តឡើងកាលពីព្រឹកថ្ងៃទី២៩ ខែមករា ឆ្នាំ២០១៥នៅសាលាឃុំគោកឋិន ស្រុកថ្មពួក ខេត្តបន្ទាយមានជ័យ។ លោក នង ប៊ុនឈី មេឃុំគោកឋិនបានប្រាប់ថា កាលពីថ្ងៃទី១៥ ខែមករា ឆ្នាំ២០១៥ គឺប្រជាពលរដ្ឋរស់នៅភូមិដឺឃុំគោកឋិន ស្រុកថ្មពួក បានចាប់ទាចំនួន២៥ក្បាលដែលចូលលេងទឹកក្នុងអាងប្រាសាទតាដក់ ដែលប្រជាពលរដ្ឋភូមិដឺការពាររក្សាទុកទឹកប្រើប្រាស់ក្នុងភូមិ។ លោកបានបញ្ជាក់ថា ក្រោយពេលចាប់ទា ម្ចាស់ទាឈ្មោះ សេង លាងគីម ភេទស្រីដែលរស់នៅភូមិថ្មី ឃុំភូមិថ្មី ស្រុកថ្មពួកបានប្ដឹងប្រជាពលរដ្ឋក្នុងសហគមន៍ភូមិដឺឃុំគោកឋិន ស្រុកថ្មពួក ចោទប្រកាន់លួចចាប់ទាបាត់អស់ចំនួន១.១៥០ក្បាល ហើយប្ដឹងប្រជាពលរដ្ឋភូមិដឺទាសំណងចំនួន២៣លានរៀល។ លោកបានបញ្ជាក់ថា ក្រោយពេលដែលម្ចាស់ទាប្ដឹង ប្រជាពលរដ្ឋក្នុងសហគមន៍ភូមិដឺបាននាំគ្នាមកតវ៉ាចំនួន៥០នាក់ កាលពីថ្ងៃទី១៦ ខែមករា ឆ្នាំ២០១៥ នៅមុខសាលាឃុំគោកឋិនដើម្បីរកយុត្តិធម៌។ ក្រោយពេលម្ចាស់ទាប្ដឹងប្រជាពលរដ្ឋភូមិដឺទារសំណង់ចំនួន២៣លានរៀលគឺការដោះស្រាយដែលម្ចាស់ទាប្ដឹងទាមទារឲ្យសងតាំងពីចំនួន២៣លានរៀលរហូតចុះនៅចំនួន១៥លានរៀល ដោយប្ដឹងគ្មានភស្តុតាងច្បាស់លាស់ ទើបការដោះស្រាយម្ចាស់ទាទទួលយកសំណងចំនួន៥លានរៀល ត្រូវបញ្ចប់រឿងកាលព្រឹកថ្ងៃទី២៩ ខែមករា ឆ្នាំ២០១៥ នៅសាលាឃុំគោកឋិន ស្រុកថ្មពួក ដោះស្រាយដោយអាជ្ញាធរឃុំគោកឋិន និងឃុំភូមិថ្មី ស្រុកថ្មពួកបញ្ចប់រឿងតែម្តង៕
គង្គា
0 Comments