ភ្នំពេញ ៖ រាជរដ្ឋាភិបាលកម្ពុជាបានសម្រេចតែងតាំងលោកវេជ្ជបណ្ឌិត លី ពេញស៊ុន អនុប្រធានមជ្ឈមណ្ឌលជាតិប្រយុទ្ធនឹងជំងឺអេដស៍ សើស្បែក និងកាមរោគ ទៅជាប្រធានជំនួសលោកវេជ្ជបណ្ឌិត មាន ឈីវុន ដែលត្រូវចូលនិវត្តន៍។
ពិធីប្រកាសផ្ទេរតំណែងនេះបានប្រព្រឹត្តទៅកាលពីព្រឹកថ្ងៃទី២៩ ខែមករា នៅមជ្ឈមណ្ឌលជាតិប្រយុទ្ធនឹងជំងឺអេដស៍ ក្រោមអធិបតីភាពលោកវេជ្ជបណ្ឌិត ម៉ម ប៊ុនហេង រដ្ឋមន្ត្រីក្រសួងសុខាភិបាល តំណាងអង្គការដែលជាដៃគូ និងបុគ្គលិកមន្ត្រីរាជការនៃមជ្ឈមណ្ឌលជាតិប្រយុទ្ធនឹងជំងឺអេដស៍យ៉ាងច្រើនកុះករ។
លោកវេជ្ជបណ្ឌិត មាន ឈីវុន ដែលត្រូវចូលនិវត្តន៍បានមានប្រសាសន៍ថា ដោយមានការគាំទ្រពីរាជរដ្ឋាភិបាលក្រសួងសុខាភិបាល និងដៃគូពាក់ព័ន្ធបានធ្វើឲ្យការងារប្រយុទ្ធនឹងជំងឺអេដស៍ទទួលបានជោគជ័យនៅក្នុងរយៈពេលប្រមាណ២០ឆ្នាំមកនេះ ក្នុងនោះបានកាត់បន្ថយអត្រាប្រេវ៉ាឡង់អ្នកផ្ទុកមេរោគអេដស៍ពី២ភាគរយ នៅឆ្នាំ១៩៩៨មក នៅ០,៦ភាគរយ នៅឆ្នាំ២០១៤។
ចំណែកការឆ្លងថ្មីក៏ថយចុះដែរ គឺពី១០០នាក់ក្នុង១ថ្ងៃមកនៅសល់តែ២នាក់ស្មើនឹងជិត៨០០នាក់ ក្នុង១ឆ្នាំ។ លោកបានបន្តថា គិតរហូតមកដល់ត្រីមាសទី៣ឆ្នាំ២០១៤ មានអ្នកផ្ទុកមេរោគអេដស៍ចំនួន៥៣.៤៩៩នាក់ បានទទួលការព្យាបាលឱសថប្រឆាំងមេរោគអេដស៍ស្មើនឹងជាង៨៥ភាគរយ ក្នុងនោះមានកុមារ៣.៤៧៨នាក់ស្មើនឹង៩០ភាគរយ និងផ្តល់ឱសថដល់អ្នកជំងឺរបេង អេដស៍បានលើស៩០ភាគរយផងដែរ។
លោកវេជ្ជបណ្ឌិត មាន ឈីវុន បានឲ្យដឹងទៀតថា ក្រៅពីនេះយើងបានកាត់បន្ថយអត្រាឆ្លងមេរោគអេដស៍ពីម្តាយទៅកូននៅសល់ត្រឹម១០ភាគរយដែលជាសញ្ញាមួយបង្ហាញថាកម្ពុជានឹងអាចសម្រេចបានតាមគោលដៅនៅឆ្នាំ២០២០ខាងមុខ។ ភាពជោគជ័យនេះហើយបានធ្វើឲ្យអន្តរជាតិទទួលស្គាល់ថា ប្រទេសកម្ពុជាជាប្រទេសមួយឈានមុខក្នុងការឆ្លើយតបនឹងជំងឺអេដស៍។
លោកវេជ្ជបណ្ឌិត ម៉ម ប៊ុនហេង បានសំដែងនូវការសោកស្ដាយចំពោះលោកវេជ្ជបណ្ឌិតមានឈីវិន ដែលត្រូវចូលនិវត្តន៍ព្រោះថា កន្លងមកលោកបានធ្វើការងារជាច្រើននៅក្នុងវិស័យសុខាភិបាលនេះដូចជា ផ្នែកអនាម័យ ការពាររោគរាតត្បាតការចាក់ថ្នាំ បង្ការការលុបបំបាត់ជំងឺគ្រុនស្វិតដៃជើង និងការប្រយុទ្ធនឹងជំងឺអេដស៍ ដែលជាការងារមួយដ៏លំបាកតែលោកបានអនុវត្តដ៏ជោគជ័យ។ លោករដ្ឋមន្ត្រីបានបន្តថា «តែទោះជាយ៉ាងណាក៏ដោយលោកវេជ្ជបណ្ឌិត មាន ឈីវុន មានតួនាទីមួយទៀត គឺជាទីប្រឹក្សាអមក្រសួងសុខាភិបាល។ ដូចនេះខ្ញុំសូមឲ្យលោកជួយលើការងារអេដស៍បន្តទៀតដើម្បីធ្វើយ៉ាងណាចូលរួមលុបបំបាត់យុទ្ធសាស្ត្រ៣សូន្យ នៅឆ្នាំ២០២០ ដែលទី១-លុបបំបាត់ការឆ្លងថ្មី ទី២-បំបាត់ការរើសអើង និងទី៣-លុបបំបាត់ការស្លាប់ដោយជំងឺអេដស៍»។
លោករដ្ឋមន្ត្រីបានឲ្យដឹងថា ការតែងតាំងលោកវេជ្ជបណ្ឌិត លី ពេញស៊ុន ជាប្រធាននេះព្រោះថា លោកមិនមែនជាមនុស្សថ្មីទេ រាជរដ្ឋាភិបាលប្រគល់ភារកិច្ចជួនលោកនេះ ដោយសារតែលោកមានសមត្ថភាព ហើយមានបទពិសោធន៍លើផ្នែកនេះអស់ច្រើនឆ្នាំមកហើយដែរ។ លោករដ្ឋមន្ត្រីថាអ្វីដែលសំខាន់ត្រូវចេះសាមគ្គីគ្នាជាគ្រួសារតែមួយ ទើបអនុវត្តការងារបានជោគជ័យ។
លោករដ្ឋមន្ត្រីបានស្នើឲ្យប្រធានមជ្ឈមណ្ឌលថ្មីធ្វើយ៉ាងណាខិតខំបំពេញការងារឲ្យបានជោគជ័យដើម្បីឲ្យសមនឹងការមានជំនឿទុកចិត្តពីសំណាក់រាជរដ្ឋាភិបាលក្រសួងសុខាភិបាល៕សំអឿន
0 Comments