ភ្នំពេញ ៖ រដ្ឋមន្ត្រីក្រសួងមុខងារសាធារណៈបានមានប្រសាសន៍ថា បច្ចុប្បន្ននេះនៅតាមស្ថាប័នរដ្ឋមិនមានមន្ត្រីខ្មោចទៀតទេ គឺមានតែមន្ត្រីទំនេរគ្មានប្រាក់បៀវត្សរ៍ប៉ុណ្ណោះ ដែលមានចំនួន៧.៥៣៧នាក់ ក្នុងចំណោមមន្ត្រីរាជការសរុបចំនួន១៨៩.៨៤៤នាក់។
លោក ពេជ្រ ប៊ុនធិន រដ្ឋមន្ត្រីក្រសួងមុខងារសាធារណៈបានថ្លែងបែបនេះនៅក្នុងសន្និសីទកាសែតកាលពីរសៀលថ្ងៃទី២៨ ខែមករា នៅទីស្ដីការក្រសួង។ លោករដ្ឋមន្ត្រីបានមានប្រសាសន៍បន្តថា កាលពីឆ្នាំ១៩៩៥ នៅតាមស្ថាប័នរដ្ឋយើងមានមន្ត្រីខ្មោចជាច្រើនត្រូវបានគេរកឃើញ ហើយមានមន្ត្រីខ្លះមានឈ្មោះពីរកន្លែងទៀតផង ប៉ុន្តែចាប់តាំងពីរាជរដ្ឋាភិបាលធ្វើការកំណែទម្រង់រួចមកមន្ត្រីខ្មោចដែលធ្លាប់ឃើញពីមុននោះ ត្រូវបានលុបបំបាត់។ លោករដ្ឋមន្ត្រីបានបន្ថែមថា ទោះបីជាមន្ត្រីខ្មោចលុបបំបាត់ តែនៅមានមន្ត្រីទំនេរគ្មានប្រាក់បៀវត្សរ៍ ដែលបច្ចុប្បន្ននេះមានចំនួន៧.៥៣៧នាក់ ក្នុងចំណោមមន្ត្រីរាជការសរុបចំនួន១៨៩.៨៤៤នាក់។ ចំនួនមន្ត្រីរាជការសរុប១៨៩.៨៤៤នាក់នេះ មន្ត្រីនៅថ្នាក់ជាតិមានចំនួន៣៤.៦៣៥នាក់ និងមន្ត្រីថ្នាក់ក្រោមជាតិមានចំនួន១៥៥.២០៩នាក់។ក្នុងចំណោមនោះមានមន្ត្រីរាជការដែលបានដាក់ចូលនិវត្តន៍មានចំនួនជាង៣.០០០នាក់ផងដែរ។
លោកបានពន្យល់ថា មន្ត្រីទំនេរគ្មានប្រាក់បៀវត្សរ៍នេះមានពីរប្រភេទគឺទី១-ជាមន្ត្រីដែលមានជាប់រវល់នៅក្នុងក្រុមគ្រួសារឬលក្ខណៈផ្ទាល់ខ្លួន។ គេអាចស្នើសុំព្យួរការងារក្នុងរយៈពេល៤ឆ្នាំប៉ុណ្ណោះ បើលើសពី៤ឆ្នាំ ត្រូវលាឈប់តែម្តង។ ក្នុងករណីនេះ បើមន្ត្រីនោះធ្វើការងារជូនរដ្ឋបានចំនួន៣០ឆ្នាំ និងទទួលបានប្រាក់ខែចូលនិវត្តន៍។ តែបើមិនបាន៣០ឆ្នាំទេ ទទួលបើកប្រាក់ហើយចប់តែម្តង។ ការសុំព្យួរការងារនេះធ្វើឡើងក្នុងពេល១ឆ្នាំម្តង។ លោករដ្ឋមន្ត្រីបានបញ្ជាក់ថា ទី២-មន្ត្រីទំនេរគ្មានប្រាក់បៀវត្សរ៍ដែរ តែមិនគោរពវិន័យស្ថាប័នដូចជា ឧស្សាហ៍ឈប់ច្រើនមិនសូវមកបំពេញការងារជូនរដ្ឋ។ មន្ត្រីនេះមិនត្រូវបានឡើងឋានន្តរសក្ដិទេ ពោលគឺបាត់បង់អតីតភាពតែម្តង។
លោករដ្ឋមន្ត្រីបានបញ្ជាក់ថា ចាប់ពីឆ្នាំ២០១៥នេះតទៅ រាជរដ្ឋាភិបាលបានពង្រឹងការងាររដ្ឋបាលនៅតាមក្រសួងស្ថាប័ននានា ពិសេសវត្តមានរបស់មន្ត្រីរាជការព្រោះថា បច្ចុប្បន្ននេះមន្ត្រីរាជការបានបើកប្រាក់បៀវត្សរ៍តាមប្រព័ន្ធធនាគារ១០០ភាគរយហើយ។ ដូចនេះចាំបាច់ត្រូវតែពង្រឹងហើយក្នុងករណីរកឃើញនូវភាពអសកម្មមន្ត្រីរាជការណាម្នាក់ ថ្នាក់ដឹកនាំក្រសួង និងស្ថាប័ននោះត្រូវទទួលខុសត្រូវ។
នៅក្នុងឱកាសនោះដែរ លោក ពេជ្រ ប៊ុនធិន បានលើកឡើងពីសមិទ្ធផលដែលក្រសួងបានធ្វើកន្លងមក ក្នុងឆ្នាំ២០១៤ ដូចជា ទី១-បានធ្វើនិយតកម្មថ្នាក់ និងឋានន្តរស័ក្តិជូនមន្ត្រីរាជការទាំងអស់ ទាំងថ្នាក់ជាតិ និងថ្នាក់ក្រោមជាតិ ២-បានកែសម្រួលក្របខ័ណ្ឌមន្ត្រីរាជការស៊ីវិលដែលមាន៤ ប្រភេទក្របខ័ណ្ឌ មកប្រភេទក្របខ័ណ្ឌថ្មីដែលមានត្រឹម៣ប្រភេទ គឺក្របខ័ណ្ឌ(ក-ខ-គ) ដោយលុបចោលប្រភេទក្របខ័ណ្ឌឃ(មន្ត្រីរាជការស៊ីវិលបានធ្វើសមាហរណកម្មទៅក្នុងក្របខណ្ឌថ្មីរួចហើយ ក្នុងខែមករា ឆ្នាំ២០១៥នេះ) ៣-បានបន្ថែមបៀវត្សមូលដ្ឋានជូនមន្ត្រីរាជការស៊ីវិល និងដំឡើងប្រាក់បំណាច់មុខងារអប់រំ និងសុខាភិបាល(ប្រាក់បៀវត្សទាបបំផុតក្នុងរដ្ឋបាលទូទៅ៤២៤.០០០រៀល អប់រំនិងសុខាភិបាល៥៥០.០០០រៀល) (រាជរដ្ឋាភិបាលបានកំណត់ទិសដៅត្រូវដំឡើងប្រាក់ខែឲ្យបានទាបបំផុត១លានរៀលក្នុង១ខែក្នុងឆ្នាំ២០១៨) ៤-បានកែលំអការបើកផ្តល់បៀវត្សជូនមន្ត្រីរាជការស៊ីវិល នគរបាលជាតិ និងយោធិនឱ្យទទួលបានបៀវត្សគ្រប់ចំនួន និងបានទាន់ពេលវេលាក្នុងសប្ដាហ៍ ទី៤-នៃខែនីមួយៗដោយបានបើកផ្តល់បៀវត្សតាមប្រព័ន្ធធនាគារជូនមន្ត្រីរាជការស៊ីវិលសម្រេចបាន១០០%។ ៥-បានដាក់ដំណើរការប្រព័ន្ធកាត់ពន្ធបៀវត្សរ៍ប្រចាំខែរបស់មន្ត្រីរាជការជាស្វ័យប្រវត្តិតាមរយៈប្រព័ន្ធទិន្នន័យបៀវត្សរ៍របស់ក្រសួងមុខងារសាធារណៈ។ ៦-បានរៀបចំឡើងវិញនូវការគ្រប់គ្រង និងការបើកផ្ដល់ប្រាក់បំណាច់ជូនទីប្រឹក្សា ជំនួយការ លេខាធិការ និងមន្ត្រីដែលមានឋានៈស្មើប្រកបដោយប្រសិទ្ធភាព។ ៧-ធ្វើវិភាគមុខងារ រចនាសម្ព័ន្ធដឹកនាំ គ្រប់គ្រងរបស់ក្រសួងអប់រំ យុវជន និងកីឡា ក្រសួងសុខាភិបាល ជាពិសេសប្រសិទ្ធភាពនៃការប្រើប្រាស់មន្ត្រីជាប់កិច្ចសន្យា បុគ្គលិកបណ្ដែត និងការប្រើប្រាស់ថ្នាក់ពីរវេន និងថ្នាក់គួប ការចាត់ចែងសេវាបង្រៀនក្នុងគ្រឹះស្ថានបឋមសិក្សាសាធារណៈ ៨-បានរៀបចំគម្រោងសំខាន់មួយចំនួន ក្នុងនោះមាន គម្រោងស្ដីពីប្រព័ន្ធគ្រប់គ្រងវត្តមាន និងការបំពេញការងាររបស់មន្ត្រីរាជការស៊ីវិលដើម្បីពង្រឹងវិន័យការងារ និងប្រសិទ្ធភាពចំណាយ។ ៩-បានរៀបចំគោលនយោបាយស្ដីពីការគ្រប់គ្រង និងអភិវឌ្ឍធនធានមនុស្សនៅរដ្ឋបាលថ្នាក់ក្រោមជាតិ និងការធ្វើប្រតិភូកម្មអំណាចដល់រដ្ឋបាលថ្នាក់ក្រោមជាតិ ក្នុងការតែងតាំង ការផ្លាស់ប្ដូរ និងការបញ្ចប់ភារកិច្ចមន្ត្រីរាជការដែលបំពេញការងារនៅថ្នាក់ក្រោមជាតិ ១០-បានបណ្តុះបណ្តាលដល់មន្ត្រីរាជការជាន់ខ្ពស់ មន្ត្រីគ្រប់គ្រងកម្រិតមធ្យមទាំងថ្នាក់ជាតិ ទាំងថ្នាក់ក្រោមជាតិសរុបចំនួន១.០៥៩នាក់ រួមទាំងការបង្កើតបន្ថែមកម្មវិធីបណ្តុះបណ្តាលរយៈពេលខ្លីដល់មន្ត្រីរាជការ ទាំងថ្នាក់ជាតិ ទាំងថ្នាក់ក្រោមជាតិ នៅសាលាភូមិន្ទរដ្ឋបាល ១១-បានដាក់ដំណើរការប្រព័ន្ធកាត់ពន្ធបៀវត្សរ៍ប្រចាំខែរបស់មន្ត្រីរាជការជាស្វ័យប្រវត្តិតាមរយៈប្រព័ន្ធទិន្នន័យបៀវត្សរ៍របស់ក្រសួងមុខងារសាធារណៈ ១២-បានរៀបចំ "ប្រព័ន្ធបញ្ជូន ទទួលព័ត៌មាន និងឯកសារបៀវត្សតាមអេឡិចត្រូនិក (Drag and Drop System)" ដែលនឹងដាក់ឲ្យដំណើរការនៅក្រោយពេលសមាហរណកម្មរួច១៣-បានកំណត់សេវាសាធារណៈសំខាន់ៗមួយចំនួនដែលប៉ះពាល់ផ្ទាល់ដល់ជីវភាពរស់នៅរបស់ប្រជាពលរដ្ឋជាអាទិភាពរបស់ក្រសួងស្ថាប័នដែលត្រូវកែលំអគុណភាព និងពង្រឹងប្រសិទ្ធភាព រួមទាំងយន្តការព័ត៌មានត្រឡប់ពីប្រជាពលរដ្ឋ៕
សំអឿន
0 Comments