ស្ទឹងត្រែង ៖ នៅក្នុងពិធីសែនព្រេនដើម្បីសុំសេចក្តីសុខ មេកន្ទ្រាញជនជាតិព្រៅបានរៀបរាប់ពីប្រវត្តិភូមិកាតូត ដែលជនជាតិដើមភាគតិចព្រៅរស់នៅសព្វថ្ងៃ និងបានឲ្យជនជាតិពួកគេជួយថែរក្សាសម្បត្តិ វប្បធម៌ប្រពៃណីដើម្បីទុកឲ្យកូនចៅជំនាន់ក្រោយបានដឹងស្គាល់ផង។
លោកតា ណុង ណុនមេកន្ទ្រាញជនជាតិព្រៅ អាយុ៨៦ឆ្នាំ បានរៀបរាប់ពីប្រវត្តិភូមិកាតូតដែលជនជាតិព្រៅរស់នៅមកដល់សព្វថ្ងៃនេះថា ដើមឡើយភូមិកាតូតមិនមែនជាភូមិទេ គឺជាឈ្មោះឪពុករបស់គាត់ ក្រោយពីគាត់មានជម្ងឺឈឺស្លាប់នៅទីនោះ ហើយរូបលោកក៏បានយកឈ្មោះរបស់ឪពុកបង្កើតបានជាភូមិជនជាតិព្រៅរស់នៅរហូតមកដល់សព្វថ្ងៃនេះ។
លោកមេកន្ទ្រាញបានបន្តឲ្យដឹងទៀតថា ឪពុករបស់គាត់ឈ្មោះកាតូតជាមេកន្ទ្រាញរបស់ជនជាតិដើមភាគតិចព្រៅ ហើយនៅក្នុងទសវត្ស៦០ការរស់នៅរបស់ជនជាតិមិនមានភូមិច្បាស់លាស់ទេ ការរស់នៅរបៀបពនេចរ ក៏ដូចជាការប្រកបកសិកម្ម បានធ្វើការផ្លាស់ប្ដូរស្ទើររៀងរាល់ឆ្នាំ មួយឆ្នាំទៅធ្វើនៅបុសនេះ មួយឆ្នាំធ្វើនៅបុសនោះ ការផ្លាស់ប្ដូរទីកន្លែងដាំដំណាំ និងការធ្វើពនេចរគឺជាទម្លាប់របស់ជនជាតិពួកគេ។
លោកតាបានបន្តថា ឪពុកគាត់ជាមេកន្ទ្រាញជនជាតិព្រៅបានដឹកនាំជនជាតិរបស់ពួកគាត់ក្នុងការធ្វើពនេចរ ផ្លាស់ប្ដូរក្នុងការរស់នៅ ក៏ដូចជាដាំដំណាំកសិកម្ម គឺយ៉ាងយូរពីរឆ្នាំឬក៏មួយឆ្នាំបានប្ដូរទៅកន្លែងថ្មីទៀត តែក្រោយពីឪពុករបស់គាត់ផ្លាស់មកដល់ព្រៃមួយកន្លែង ក៏មានជំងឺ ទោះជាមានការបន់ស្រន់សែនដល់អ្នកតា ក៏មិនមានការធូរស្រាលដែរ ធ្វើឲ្យកាន់តែធ្ងន់ទៅៗ រហូតស្លាប់នៅក្នុងព្រៃនោះ និងបានធ្វើបុណ្យទៅតាមរបៀបប្រពៃណីជនជាតិព្រៅ។ ក្រោយមកលោកក៏បានរៀបចំជាភូមិនៅទីនោះនិងបានយកឈ្មោះឪពុករបស់គាត់ ឈ្មោះកាតូត ដាក់ឈ្មោះថាជាភូមិកាតូត ជាប់រហូតមកដល់សព្វថ្ងៃនេះ។
មេកន្ទ្រាញបានបន្តទៀតថា ក្រោយពីមានការរៀបចំភូមិហើយ ជនជាតិព្រៅទាំងអស់បាននាំគ្នាគោរពទៅតាមប្រពៃណីរបស់គេឲ្យតែដល់រដូវជនជាតិរបស់គេ គេបានរៀបចំពិធីសែនព្រេនក្នុងភូមិដើម្បីសុំសេចក្តីសុខជារៀងរាល់ឆ្នាំ។ លោកបន្តថា ដោយសារមកដល់សម័យទំនើប ប្រទេសជាតិមានការអភិវឌ្ឍន៍ សូម្បីតែផ្ទះនិងរបៀបរស់នៅរបស់ជនជាតិព្រៅ ក៏មានការប្រែប្រួលដែរ។
ទើបនៅក្នុងពិធីសែនព្រេនកន្លងមកថ្មីៗនេះ លោកតាណុង ណុនដែលមានវ័យរហូត៨៦ឆ្នាំ តពីពុករបស់គាត់បានរំលឹកពីសម្បត្តិ វប្បធម៌ ប្រពៃណីជនជាតិព្រៅឲ្យបងប្អូនជនជាតិព្រៅជួយថែរក្សា ប្រពៃណី សម្បត្តិ វប្បធម៌ដែលបានបន្សល់ពីដូនតារបស់ពួកគេ ដែលមានដូចជា ស្រាពាង ឆ្នាំង ឃ្លោក គ្រឿងភ្លើង គងវាយ កំផា ដើម្បីទុកឲ្យក្មេងៗជំនាន់ក្រោយបានដឹងស្គាល់ផង៕
ងិន លីម
0 Comments