ព្រះសីហនុ ៖ លោក នេន ចំរើន ប្រធានរដ្ឋបាលជលផលកំពង់សោមបានឱ្យដឹងថា ក្នុងឆ្នាំ២០១៤ ផលនេសាទសមុទ្រទទួលបាន៤៩.៣០០តោន និងផលនេសាទត្រីទឹកសាបចំនួន១.៧៥០តោន ហើយបរិមាណនេះមានការថយចុះជាងឆ្នាំ២០១៣ចំនួន១០០តោន។ ទិន្នផលត្រីថយចុះ ដោយសារកត្តាពីរ ទី១-ដោយសារកត្តាអាកាសធាតុមានភ្លៀង ព្យុះច្រើន ទី២-ដោយសារបច្ចុប្បន្នទូកនេសាទខ្វះកម្លាំងពលកម្ម (កម្មករទូក) ចេញទៅធ្វើនេសាទ។
លោកប្រធានរដ្ឋបាលជលផលបានឱ្យដឹងបន្តថា ទន្ទឹមនឹងផលនេសាទសមុទ្រ និងផលនេសាទទឹកសាប ក៏នៅមានផលនេសាទកែច្នៃសមុទ្របានចំនួន៣.២០០តោន ហើយធ្វើការនាំចេញ បានចំនួន៣.៦៧០តោន ផលត្រីចិញ្ចឹមជាលក្ខណៈគ្រួសារបានចំនួន៨៣៣តោន និងផលិតផលទឹកត្រីបាន១.១២០.០០០លីត្រ។ ក្រៅពីការនេសាទរដ្ឋបាលជលផលកំពង់សោមក៏បានដាក់ក្តាមមេពងក្នុងបែបានចំនួន២.៨៩៨គីឡូក្រាម ស្មើនឹង១៥.៦៩០ក្បាល ព្រមទាំងលែងកូនត្រីចំនួន៣០.០០០ក្បាល និងលែងត្រីមេពូជចំនួន៣០គីឡូក្រាមចូលក្នុងបឹងធម្មជាតិដើម្បីបង្កើនជីវភាពគ្រួសារប្រជាពលរដ្ឋក្នុងសហគមន៍នេសាទទៀតផង។ មន្ត្រីជលផលក៏បានធ្វើការបង្ក្រាបបទល្មើសនេសាទដោយប្រើឧបករណ៍ខុសច្បាប់ហាមឃាត់បានចំនួន៣៩ករណី។
លោកបានបញ្ជាក់ថា ផលត្រីសម្បូរទៅបានវាអាស្រ័យដោយមានការចូលរួមការពារអភិរក្សរបស់ប្រជានេសាទសហគមន៍ ជាពិសេសការការពារព្រៃកោងកាងដែលជាជម្រកមច្ឆជាតិពងកូន ព្រោះព្រៃកោងកាងជាប្រភពដ៏សំខាន់ណាស់ក្នុងការផ្តល់នូវទិន្នផលត្រីសមុទ្រឱ្យសម្បូរឡើង។ ប្រសិនបើយើងនាំគ្នាកាប់បំផ្លាញព្រៃកោងកាងយកដីជាកម្មសិទ្ធិផ្ទាល់ខ្លួន នោះមច្ឆាជាតិក្នុងសមុទ្រ និងទឹកសាបត្រូវបាត់បង់ជាក់ជាមិនខាន។ ដូច្នេះរដ្ឋបាលជលផលបានធ្វើការផ្សព្វផ្សាយជាប្រចាំដល់ប្រជាពលរដ្ឋក្នុងសហគមន៍នេសាទក្នុងខេត្តព្រះសីហនុឱ្យចូលរួមថែរក្សាការពារព្រៃកោងកាង និងចូលរួមដាំកូនកោងកាងឡើងវិញ ដែលជាជម្រកត្រីពងកូន ហើយក៏បានសហការជាមួយអាជ្ញាធរមូលដ្ឋាន និងប្រជាពលរដ្ឋធ្វើការដាំដុះកូនកោងកាងបានចំនួន១១.៥០០ដើម នៅក្នុងស្រុកព្រៃនប់ ខេត្តព្រះសីហនុ ព្រមទាំងបានបណ្ដុះកូនកោងកាងបានចំនួន១៩.៤០០ដើមបន្ថែមទៀតសម្រាប់ដាំបន្តនៅពេលខាងមុខ ព្រមទាំងបំផុសឲ្យយុវវ័យដែលរៀបអាពាហ៍ពិពាហ៍ចូលរួមដាំកូនកោងកាងបានចំនួន១០គូរ ស្មើនឹងចំនួន២០ដើម ក្នុងសួនអាពាហ៍ពិពាហ៍ដែលមានទីតាំងនៅក្នុងឃុំព្រៃនប់ពីរផងដែរ ហើយសកម្មភាពនេះកំពុងមានការចាប់អារម្មណ៍ពីប្រជាពលរដ្ឋ ក៏ដូចភ្ញៀវទេសចរណ៍ជាតិ និងអន្តរជាតិផងដែរ។ ក្រៅពីផលប្រយោជន៍នៃព្រៃកោងកាង រដ្ឋបាលជលផលបានរៀបចំធ្វើនិងទម្លាក់ប្រអប់ថ្មសិប្បនិមិត្តចំនួន១០ប្រអប់បន្ថែមទៀត ដើម្បីយកទៅទម្លាក់នៅក្នុងតំបន់អភិរក្សក្នុងសហគមន៍នេសាទ។
លោកបានឱ្យដឹងបន្ថែមទៀតថា ក្រសួងកសិកម្មបានចេញលិខិតឱ្យរដ្ឋបាលជលផលកំពង់សោមប្រមូលថ្លៃឈ្នួលពីដែននេសាទនៅចុងខែសីហា ហើយរដ្ឋបាលជលផលបានធ្វើការផ្សព្វផ្សាយដល់ប្រជានេសាទក្នុងខេត្តព្រះសីហនុ ចូលរួមបង់ថ្លៃឈ្នួលដែននេសាទឱ្យបានគ្រប់ៗគ្នា រហូតមកដល់ពេលនេះ ប្រជានេសាទបានចូលមកបង់ថ្លៃឈ្នួលដែននេសាទបានចំនួន៨០.០៨២.៥០០រៀល និងប្រាក់ពិន័យបានចំនួន១០.៣៥០.០០០រៀល។
នៅខេត្តព្រះសីហនុមានទូកនេសាទចំនួន១.៥៤០គ្រឿង ក្នុងនោះទូកដែលមានកម្លាំងម៉ាស៊ីនក្រោម៣៣ សេះចំនួន១.២៥១គ្រឿង និង ទូកដែលមានកម្លាំងម៉ាស៊ីនលើសពី៣៣សេះមានចំនួន២៨៩គ្រឿង ជាមធ្យមទូកចេញទៅនេសាទពី៦០ ទៅ៨០% ក្នុងមួយថ្ងៃ៕
ស៊ុយ ចាន់ធា
0 Comments