ភ្នំពេញ ៖ ក្រុមនិស្សិតរៀននៅវិទ្យាស្ថានវិទ្យាសាស្ត្រអន្តរជាតិប្រមាណ៦០នាក់ ដឹកនាំដោយសមាគមសម្ព័ន្ធនិស្សិតបញ្ញវន្តខ្មែរ គ្រោងនឹងធ្វើបាតុកម្មមួយនៅខាងមុខរដ្ឋសភា ដើម្បីទាមទារឲ្យស្ថាប័នពាក់ព័ន្ធជួយដោះស្រាយបញ្ហានិស្សិតដែលរងគ្រោះដោយរៀននៅវិទ្យាស្ថាននោះ នាថ្ងៃទី២៨ ខែមករា ឆ្នាំ២០១៥ខាងមុខនេះ បើតាមការបញ្ជាក់ពីក្រុមនិស្សិត។
និស្សិតឈ្មោះ ថន រដ្ឋា តំណាងនិស្សិតរៀននៅវិទ្យាស្ថានវិទ្យាសាស្ត្រអន្តរជាតិ ហើយជាអ្នកដែលបានរងគ្រោះផងដែរ បានថ្លែងនៅក្នុងសន្និសីទថា និស្សិតដែលបានចូលរួមនេះ គឺជាអ្នកដែលបានសិក្សានៅវិទ្យាស្ថានវិទ្យាសាស្ត្រអន្តរជាតិ ផ្នែកបរិញ្ញាបត្ររងគិលានុបដ្ឋាក ដែលមានរយៈពេល៣ឆ្នាំមកហើយ ប៉ុន្តែមិនទាន់បានចុះកម្មសិក្សានៅតាមមន្ទីរពេទ្យណាមួយនៅឡើយទេ។ សម្រាប់លោក ថន រដ្ឋា បានអះអាងថា បានសិក្សានៅទីនោះតាមលំដាប់ថ្នាក់ត្រឹមត្រូវ ហើយឆ្នាំទី១-សាលានេះមានឈ្មោះថា "វិទ្យាស្ថានវិទ្យាសាស្ត្រឯកទេស ដែលមានទីតាំងនៅក្នុងមន្ទីរពេទ្យព្រះកេតុមាលា។ ឆ្នាំទី២-សាលាបានប្ដូរទៅភូមិសាសមគ្គី សង្កាត់ប្ញស្សីកែវ ហើយបានប្ដូរឈ្មោះទៅជាវិទ្យាស្ថានវេជ្ជសាស្ត្រពេទ្យ។
តាមនិស្សិត ថន រដ្ឋា បញ្ជាក់ថា នៅឆ្នាំទី១-មានការសិក្សាជាប់លាប់ត្រឹមត្រូវមិនសូវអាក់ខានទេ ហើយនៅឆ្នាំទី២-មិនបានរៀនជាប់លាប់ល្អទេ ហើយក៍បានចុះកម្មសិក្សាដែរ នៅពេលនោះ ពួកគេបានទៅសួរនាយកសាលាឈ្មោះ លោកគ្រូ ហាក់ ចន្នី ហើយពេលនោះ លោក ហាក់ ចន្នី បានពន្យល់សិស្សឲ្យបង់លុយចូលរៀនឆ្នាំទី៣ទៀត។ នៅពេលនោះនិស្សិតទាំងអស់បានយល់ព្រម ដើម្បីបានចុះកម្មសិក្សា ដោយចង់លុយចំនួន៦០ដុល្លារដើម្បីឲ្យសាលាទាក់ទងទៅមន្ទីរពេទ្យ ប៉ុន្តែនៅឆ្នាំទី៣នេះ សាលាបានប្ដូរទីតាំងទៀត ទៅដាក់នៅសង្កាត់ទួលសង្កែ ខណ្ឌប្ញស្សីកែវ ហើយបានប្ដូរឈ្មោះម្តងទៀតទៅជាវិទ្យាស្ថានវិទ្យាសាស្ត្រអន្តរជាតិ ហើយនៅឆ្នាំទី៣នេះ បើទោះជាបានសន្យាជាមួយនិស្សិតបែបនេះក្តី ក៏សាលាមិនបានឲ្យចុះស្តាដែរ ហើយគ្មានដំណោះស្រាយអ្វីទាំងអស់ ព្រមទាំងបានគម្រាមលុបឈ្មោះសិស្សដែលចេញមុខតវ៉ាទៀតផង ហើយថាសាលានេះ ជាសាលារបស់លោកជំទាវ ជា សំអាត ដែលពួកគេមិនដឹងថា លោកជំទាវ ជា សំអាត នោះជាអ្នកណាទេ ហើយបើទោះជាសុំមើលអាជ្ញាប័ណ្ណក៏មិនឲ្យមើលដែរ។
និស្សិតរូបនោះអះអាងថា នៅឆ្នាំទី៣នេះរៀនយូរៗទៅមានគ្រូមកបង្រៀន ហើយពួកគេបានសម្រេចធ្វើការតវ៉ា ដោយដាក់លិខិតទៅក្រសួងអប់រំយុវជន និងកីឡា និងក្រសួងសុខាភិបាល ហើយក្រោយមកក៏គ្មានដំណោះស្រាយ ពួកគេក៏បានប្រកាសធ្វើបាតុកម្មម្តងទៀតនៅមុខសាលា នាថ្ងៃទី២៧ ខែសីហា ឆ្នាំ២០១៤ ក្រោយពីបានប្រជុំជាមួយក្រសួងជាច្រើនលើកទើបដឹងថា សាលានោះបើកបាន៣ឆ្នាំហើយតែគ្មានអាជ្ញាប័ណ្ណទេ ដូច្នេះនិស្សិត ថន រដ្ឋា បានស្នើឲ្យស្ថាប័នពាក់ព័ន្ធចុះមើលបញ្ហានេះ និងជួយពួកគេផង។
ចំណែកលោក ចារ សីហាក់ ប្រធានសមាគមសម្ព័ន្ធនិស្សិតបញ្ញវន្តខ្មែរបានបញ្ជាក់នៅក្នុងសន្និសីទនោះដែរថា ក្រសួងពាក់ព័ន្ធចង់លុបចោលសាលានេះ តែដោយមានអ្នកធំនៅពីក្រោយ ក៏មិនអាចធ្វើបាន ប៉ុន្តែខាងសាលារាជធានីភ្នំពេញចង់រុញឲ្យសាលានេះមានភាពស្របច្បាប់វិញ ប៉ុន្តែដោយសារតែការដោះស្រាយមិនចេញ ហើយចេះតែពន្យារពេលមិនអស់មិនហើយ ពួកគេបានគ្រោងរៀបចំធ្វើបាតុកម្មនៅមុខរដ្ឋសភា នាថ្ងៃទី២៨ ខែមករាខាងមុខនេះ ដើម្បីដាក់ញត្តិទៅគណៈកម្មការទី៧នៃរដ្ឋសភាទាមទារ៣ចំណុច គឺ ទី១-សុំឲ្យក្រសួងទាំងពីរធ្វើអន្តរាគមន៍ចុះឈ្មោះពួកគេដូចនិស្សិតនៅសាលាផ្សេងៗទៀត ទី២-សុំឲ្យក្រសួងទាំងពីរធ្វើអន្តរាគមន៍ឲ្យពួកគេបានចុះឈ្មោះរៀនផ្នែកគិលានុបដ្ឋាកនៅសាលាផ្សេងៗទៀត ដោយមិនបាច់បង់ថ្លៃការសិក្សា និងទី៣-ស្នើឲ្យគណៈកម្មការទី៧នៃរដ្ឋសភាកោះហៅក្រសួងទាំងពីរមកឆ្លើយលើការសិក្សានៅវិទ្យាស្ថានវិទ្យាសាស្ត្រអន្តរជាតិនេះ។
ទាក់ទងបញ្ហានេះការិយាល័យរបស់យើងនៅមិនទាន់ស្វែងរកការបញ្ជាក់ពីខាងតំណាងវិទ្យាស្ថានវិទ្យាសាស្ត្រអន្តរជាតិបាននៅឡើយទេ រហូតមកដល់រសៀលថ្ងៃដដែលនេះ ប៉ុន្តែបើយើងតាមក្រុមនិស្សិតបានអះអាងថា ពួកគេបង់លុយរៀននៅសាលានោះក្នុងមួយឆ្នាំ៥០០ដុល្លារ៕
កោះកែវ
0 Comments