ភ្នំពេញ ៖ រាជរដ្ឋាភិបាលកម្ពុជាបានបន្តផ្តល់ជំនួយហិរញ្ញវត្ថុ និងជំនួយមិនមែនហិរញ្ញវត្ថុចំនួន៤,១លានដុល្លារសហរដ្ឋអាមេរិកដល់ភាគីជាតិនៃអង្គជំនុំជម្រះវិសាមញ្ញក្នុងតុលាការកម្ពុជាដែលក្នុងនោះថវិកាចំនួន១,៦លានដុល្លារសម្រាប់ទ្រទ្រង់ការចំណាយលើសេវាប្រតិបត្តិការរបស់តុលាការ និង ២,២៥លានដុល្លារសម្រាប់ចំណាយលើប្រាក់បៀវត្សរ៍របស់មន្ត្រីបុគ្គលិកភាគីជាតិ។
ការសន្យាផ្តល់ជំនួយថវិកាប្រមាណ៤,១លានដុល្លារនេះគឺស្មើនឹង៦២% នៃគម្រោងថវិកាចំណាយសរុបប្រចាំឆ្នាំ២០១៥ របស់ភាគីជាតិកម្ពុជា។ នៅឆ្នាំ២០១៥នេះ ភាគីជាតិគ្រោងនឹងចំណាយថវិកាប្រមាណ៦,៦លានដុល្លារ។ នេះបើតាមមន្ត្រីនាំពាក្យសាលាក្តីខ្មែរក្រហមថ្លែងឱ្យដឹងនៅថ្ងៃទី២៦ ខែមករា ឆ្នាំ២០១៥នេះ។ មន្ត្រីនាំពាក្យដដែលបានថ្លែងថា បច្ចុប្បន្ននេះការិយាល័យរដ្ឋបាលនៃសាលាក្តីខ្មែរក្រហមបាននិងកំពុងធ្វើការផ្នែកនីតិវិធីជាមួយក្រសួងសេដ្ឋកិច្ច និងហិរញ្ញវត្ថុដើម្បីទទួលបានថវិកានេះឱ្យបានទាន់ពេលវេលា។
លោក នេត្រ ភក្ត្រា មន្ត្រីនាំពាក្យនៃអង្គជំនុំជម្រះវិសាមញ្ញក្នុងតុលាការកម្ពុជាបានមានប្រសាសន៍ថា ការសន្យាផ្តល់ជំនួយថវិកាពីរាជរដ្ឋាភិបាលកម្ពុជាចំពោះភាគីជាតិនៃសាលាក្តីខ្មែរក្រហមគឺដូចអ្វីដែលសម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានសន្យាក្នុងជំនួបកំពូលជាមួយលោក បាន គីមូន អគ្គលេខាធិការអង្គការសហប្រជាជាតិនៅប្រទេសភូមាកាលពីចុងឆ្នាំ២០១៤កន្លងទៅ ក្នុងការជួយដោះស្រាយបញ្ហាថវិកាសម្រាប់ភាគីជាតិនៃសាលាក្តីខ្មែរក្រហម។ លោកបានបន្តថា ការសន្យាផ្តល់ជំនួយថវិកាបន្ថែមនេះគឺជាការបន្តការគាំទ្ររបស់រាជរដ្ឋាភិបាលចំពោះដំណើរការស្វែងរកការពិត និងយុត្តិធម៌ជូនដល់ជនរងគ្រោះដោយរបបខ្មែរក្រហម។
លោកបញ្ជាក់ថា "តាងនាមឱ្យអង្គជំនុំជម្រះវិសាមញ្ញក្នុងតុលាការកម្ពុជាជាពិសេសមន្ត្រីបុគ្គលិកជាតិទាំងអស់ ខ្ញុំសូមថ្លែងអំណរគុណយ៉ាងជ្រាលជ្រៅចំពោះរាជរដ្ឋាភិបាលកម្ពុជា សម្ដេចនាយករដ្ឋមន្ត្រី ហ៊ុន សែន ដែលតែងតែផ្តល់នូវការគាំទ្រចំពោះសាលាក្តីខ្មែរក្រហម និងផ្តល់ជំនួយហិរញ្ញវត្ថុដល់ភាគីជាតិនៃសាលាក្តីដើម្បីដំណើរការកិច្ចការរបស់ខ្លួនដោយរលូន"។
លោកបានឱ្យដឹងផងដែរថា នៅឆ្នាំ២០១៤កន្លងទៅ រាជរដ្ឋាភិបាលកម្ពុជាបានផ្តល់ជំនួយថវិកាហិរញ្ញវត្ថុ និងជំនួយមិនមែនហិរញ្ញវត្ថុចំនួន៣,៩៥លានដុល្លារសហរដ្ឋអាមេរិក ដែលក្នុងនោះ ១,៧លានដុល្លារសហរដ្ឋសម្រាប់ចំណាយលើសេវាប្រតិបត្តិការទូទៅរបស់តុលាការ និងថវិកាចំនួន ២,៥លានដុល្លារសហរដ្ឋអាមេរិកសម្រាប់ប្រាក់បៀវត្សរ៍របស់មន្ត្រីបុគ្គលិកជាតិរយៈពេល៦ខែ (១,១លានដុល្លារសម្រាប់ត្រីមាសទី១ និង១,១៥លានដុល្លារសម្រាប់ត្រីមាសទី៤)។ ការផ្តល់វិភាគទាន ចំនួន៣,៩៥លានដុល្លារអាមេរិកនេះស្មើប្រមាណ៦២%នៃគម្រោងថវិកាភាគីជាតិឆ្នាំ២០១៤ ដែល ត្រូវបានអនុម័តឱ្យចំណាយចំនួន៦,៤លានដុល្លារសហរដ្ឋអាមេរិក។
លោកបានបន្តថា ចាប់តាំងពីឆ្នាំ២០០៦រហូតមកដល់ឆ្នាំ២០១៣ រាជរដ្ឋាភិបាលកម្ពុជាបានផ្តល់ថវិកាដល់សាលាក្តីខ្មែរក្រហមទាំងជំនួយហិរញ្ញវត្ថុ និងមិនមែនហិរញ្ញវត្ថុចំនួន២៥,២លានដុល្លារក្នុងនោះជំនួយមិនមែនហិរញ្ញវត្ថុចំនួន១០,៨ លានដុល្លារ និង១៤,៤២លានដុល្លារជាជំនួយថវិកា។ រហូតមកទល់ពេលនេះ រាជរដ្ឋាភិបាលកម្ពុជាជាប្រទេសម្ចាស់ជំនួយធំទី២របស់សាលាក្តីខ្មែរក្រហមបន្ទាប់ពីប្រទេសជប៉ុនបានផ្តល់ជំនួយថវិកាចំនួនប្រមាណ៨២លានដុល្លារ ប្រទេសអូស្ត្រាលីចំនួន២៣, ២០លានដុល្លារ សហរដ្ឋអាមេរិកចំនួន២០,៨០លានដុល្លារ អាល្លឺម៉ង់ចំនួន១៣,៥៨លាន អង់គ្លេសចំនួន១១,៥២លាន សហភាពអឺរ៉ុបចំនួន៨,៨៦លាន បារាំងចំនួន៨,២៥លាន ស៊ុយអែតចំនួន៨,២លាន និងប្រទេសន័រវេសចំនួន៧លានដុល្លារសហរដ្ឋអាមេរិក៕
កោះកែវ
0 Comments