ភ្នំពេញ ៖ ប្រធានអង្គភាពប្រឆាំងអំពើពុករលួយលោកទេសរដ្ឋមន្ត្រី ឪម យ៉ិនទៀង បានអះអាងថា មានចំណុចថ្មីចំនួន២ដែលត្រូវបានដំណើរការនៅឆ្នាំ២០១៥នេះ ហើយក៍មានករណីដ៏ធំមួយដែលត្រូវចាប់ផ្តើមដំណើរការនៅដើមឆ្នាំនេះផងដែរ តែករណីនេះនៅមិនទាន់ត្រូវបានបង្ហើបឲ្យដឹងថា មានពាក់ព័ន្ធក្រសួង ស្ថាប័ន ឬស្ថាប័នឯកជនណាមួយនៅឡើយទេ ដោយសារតែកំពុងស្ថិតនៅក្នុងការស៊ើបអង្កេត។
លោកទេសរដ្ឋមន្ត្រី ឪម យ៉ិនទៀង បង្ហើបបែបនេះបន្ទាប់ពីលោកបានចូលរួមនៅក្នុងវគ្គបណ្តុះបណ្តាលស្ដីពីតួនាទីអ្នកសារព័ត៌មាននៅក្នុងការចូលរួមចំណែកលើកស្ទួយអភិបាលកិច្ចល្អនិងប្រឆាំងអំពើពុករលួយដែលរៀបចំដោយក្លឹបអ្នកកាសែតកម្ពុជា កាលពីរសៀលថ្ងៃទី២៦ ខែមករា ឆ្នាំ២០១៥។ លោកថ្លែងថា "ឆ្នាំ២០១៥យើងមានចំណុចថ្មីចំនួន២ដែលអាចនិយាយថា ថ្មីជាងលើកមុន គឺទី១. តម្លាភាព បានន័យថា ករណីមួយៗ គឺយើងបើកចំហជាងបន្តិច ដោយយើងប្រឹងធ្វើការប្រឹងខ្លាចបែកការណ៍ និងបាត់ភស្តុតាងជាដើម យើងប្រឹងអាហ្នឹងដើម្បីជាថ្នូរយើងបើកទូលាយមុន ទី២. សំដៅទៅលើគុណភាព ហើយករណីទី១នៃឆ្នាំ២០១៥នេះ អាចជាករណីអំពើពុករលួយមួយ ដែលមានបណ្ដាញ ហើយធ្វើឲ្យមានការបំផ្លាញដល់វិស័យមួយរបស់ជាតិយើង ដែលយើងកំពុងដំណើរការលើវិស័យនេះ"។
តាមលោកបញ្ជាក់ថា "ករណីដែលត្រូវលើកយកមកធ្វើនេះជាតូបករណ៍ថ្មី ហើយកាលពី៤ ឆ្នាំកន្លងមក ករណីតែមួយៗទេ តែករណីសំរាប់ឆ្នាំ២០១៥នេះ ជាករណីដ៏ធំ ដែលមានបណ្ដាញឃុបឃិតគ្នា ហើយនឹងធ្វើឲ្យអន្តរាយដល់ជាតិក្នុងវិស័យនីមួយៗ។ ទោះជាយ៉ាងណាលោកទេសរដ្ឋមន្ត្រីអះអាងថា ករណីនេះវាមានតានតឹងណាស់យើងសូមរក្សាសិទ្ធិមួយរយៈទៀត ដើម្បីធ្វើករណីនេះ ហើយនៅពេលដំណើរការចប់សព្វគ្រប់អាចហៅអ្នកសារព័ត៌មានទៅជាមួយផង ហើយបើនិយាយពីវិស័យអប់រំ គឺជាបញ្ហាទី៣ ទី៤ប៉ុណ្ណោះ ហើយអ្វីបញ្ហាដែលខ្ញុំនិយាយនេះជាករណីដ៏ធ្ងន់ធ្ងរមួយ"។
ទាក់ទងដល់សារៈសំខាន់របស់អ្នកសារព័ត៌មាននៅក្នុងការប្រយុទ្ធប្រឆាំងអំពើពុករលួយលោកទេសរដ្ឋមន្ត្រីបានបញ្ជាក់ថា អ្នកកាសែតម្នាក់អាចជួយប្រយុទ្ធប្រឆាំងអំពើពុករលួយស្មើមនុស្សរាប់រយនាក់បានតាមរយៈការសិក្សា ហើយនៅខាងក្រៅសាលា អ្នកសារព័ត៌មានជាតួអង្គដ៏សំខាន់ដែលអាចចលនា អាចនាំមហាជនឲ្យស្អប់អំពើពុករលួយ និងចេះស្រឡាញ់នូវអំពើស្អាតស្អំ ហើយបញ្ហាសំខាន់មួយទៀតអ្នកសារព័ត៌មានអាចរកឃើញមធ្យោបាយក្នុងប្រយុទ្ធប្រឆាំងអំពើពុករលួយតាមផ្លូវច្បាប់ ក៏ដូចជាផ្លូវអប់រំផងដែរ។ ចំពោះសំណួរថា អង្គភាពប្រឆាំងអំពើពុករលួយនឹងសហការជាមួយអ្នកសារព័ត៌មានក្នុងការប្រយុទ្ធប្រឆាំងអំពើពុករលួយនោះ លោកទេសរដ្ឋមន្ត្រី ឪម យ៉ិនទៀង បញ្ជាក់ថា មិនមែនពាក្យចចាមអារ៉ាមនោះទេ គឺអង្គភាពប្រឆាំងអំពើពុករលួយបានធ្វើពិត។
ទាក់ទងទៅដល់ព័ត៌មានដែរថា មានការយកលុយលើបញ្ហាធ្វើអត្តសញ្ញាណប័ណ្ណនោះ លោកទេសរដ្ឋមន្ត្រីអះអាងថា អង្គភាពនៅមិនទាន់មានការហៅយកទៅសាកសួរនៅឡើយទេ តែបានចេញលិខិតព្រមានជាច្រើនរួចមកហើយទាក់ទងបញ្ហាដែលធ្វើឲ្យប្រជាជនត្អូញត្អែរថា មានការយកលុយនេះ ហើយបញ្ហាមួយទៀត ក្រសួងមហាផ្ទៃកំពុងងតែពង្រឹងជាមួយអគ្គនាយកដ្ឋានអត្តសញ្ញាណប័ណ្ណ ដោយក្រសួងសេដ្ឋកិច្ចបានចេញថ្លៃហូបចុកទាំងអស់ ទាំងថ្លៃបាយ ថ្លៃទឹក ថ្លៃទឹកប៊ិច ជាដើម គឺមិនមានបញ្ហាអ្វីទៀតទេ ហើយបើនៅតែមាន សូមឲ្យផ្តល់ព័ត៌មានឲ្យបានរហ័សលើបញ្ហានេះ ទោះតាមរយៈណាក៏ដោយ៕
កោះកែវ
0 Comments