កំពង់ឆ្នាំង ៖ ជនល្មើសឆក់ត្រីម្នាក់ត្រូវបានមន្ត្រីសង្កាត់រដ្ឋបាលជលផល និងប្រធានសហគមន៍នេសាទចាប់ខ្លួនបានបញ្ជូនមកដល់ខណ្ឌរដ្ឋបាលជលផលកំពង់ឆ្នាំង នៅល្ងាចថ្ងៃទី២៦ ខែមករា ឆ្នាំ២០១៥ ដោយបានចោទប្រកាន់ពីបទល្មើសឆក់ត្រី ប្រព្រឹត្តឡើងកាលពីវេលាម៉ោង៩និង៣០នាទីព្រឹកថ្ងៃទី២៥ ខែមករា ឆ្នាំ២០១៥ នៅចំណុចបឹងផុក ស្ថិតក្នុងភូមិគរជ្រំ ឃុំកោះថ្កូវ ស្រុកជលគីរី។
លោក ជឹម សុផា ប្រធានសហគមន៍នេសាទភូមិគរជ្រំបានឲ្យដឹងថា ជនល្មើសមានឈ្មោះ ផន គន្ឋា អាយុ២៣ឆ្នាំ មានទីលំនៅភូមិគរជ្រំ ឃុំកោះថ្កូវ។ នៅមុនពេលចាប់ខ្លួនជនល្មើសខាងលើនេះ គឺមានសេចក្តីរាយការណ៍ពីប្រជាពលរដ្ឋប្រាប់ថា មានបទល្មើសឆក់ត្រីនៅចំណុចបឹងផុក ភ្លាមនោះលោកបានដឹកនាំប្រជាពលរដ្ឋដែលជាសមាជិកសមាគមន៏នេសាទ និងមានប្រជាការពារផងដែរ បាននាំគ្នាទៅព័ទ្ធចាប់បានជនល្មើសខាងលើដែលកំពុងប្រព្រឹត្តបទល្មើសជាក់ស្តែងតែម្តង ដោយដកហូតបាន អាំងវែទ័រឆក់ត្រី១គ្រឿង ដងឆក់១គូ អាគុយ៤០អាំពែរ១គ្រឿង ត្រកដាក់ត្រី១ និងត្រីគ្រប់ប្រភេទដែលគេឆក់បានជាង៧គីឡូក្រាមផងដែរ។
លោកបានបញ្ជាក់ថា ក្រោយពីចាប់ឃាត់បានហើយបានយកទៅកាន់សង្កាត់រដ្ឋបាលជលផលដេកមួយយប់ លុះភ្លឺឡើងទើបបញ្ជូនមកកាន់ខណ្ឌរដ្ឋបាលជលផល ដោយសារផ្លូវឆ្ងាយនៅពេលរសៀលទើបមកដល់ខណ្ឌរដ្ឋបាលជលផលកំពង់ឆ្នាំង។ ជនល្មើសរូបនេះត្រូវបានសមត្ថកិច្ចជំនាញកសាងសំណុំរឿងតាមផ្លូវច្បាប់បញ្ជូនទៅតុលាការខេត្ត។
នៅចំពោះមុខសមត្ថកិច្ចជនល្មើសបានសារភាពថា រូបគេរូបគេពិតជាបានឆក់ត្រីពិតមែនដោយសារតែមិនបានដឹងអំពីច្បាប់ទម្លាប់នោះទេ ព្រោះរូបគេមិនបាននៅក្នុងមូលដ្ឋានគឺទៅធ្វើការនៅភ្នំពេញរហូត ពេលត្រឡប់មកវិញក៏ឆក់ត្រីយកមកធ្វើម្ហូប ហើយក៏ត្រូវគេចាប់ខ្លួនតែម្តង។
ជនល្មើស និងវត្ថុតាងខាងលើនេះ ត្រូវបានសមត្ថកិច្ចខណ្ឌរដ្ឋបាលជលផលកំពង់ឆ្នាំង កសាងសំណុំរឿងតាមផ្លូវច្បាប់បញ្ជូនខ្លួនទៅសាលាដំបូងខេត្តនៅព្រឹកថ្ងៃទី២៧ ខែមករានេះ ដើម្បីចោទប្រកាន់និងជំនុំជំរះផ្ដន្ទាទោសតាមបញ្ញត្តិច្បាប់ស្ដីពីជលផលដែលរូបគេអាចជាប់គុកពី១ឆ្នាំទៅ៣ឆ្នាំ៕
( ឈៀង ថារិទ្ធ
0 Comments