ភ្នំពេញ ៖ លោក រ័ត្ន ស្រ៊ាង មេបញ្ជាការរងកងរាជអាវុធហត្ថលើផ្ទៃប្រទេស និងជាមេបញ្ជាការកង
រាជអាវុធហត្ថរាជធានីភ្នំពេញបានឲ្យដឹងកាលពីល្ងាចថ្ងៃទី២៦ ខែមករា ឆ្នាំ២០១៥នេះថា រយៈពេល៣ថ្ងៃចុងសប្ដាហ៍ទី៣ ខែមករា ឆ្នាំ២០១៥នេះ គឺគិតចាប់ពីល្ងាចថ្ងៃទី២៣ ខែមករា ឆ្នាំ២០១៥ ដល់ថ្ងៃទី២៥ ខែមករា ឆ្នាំ២០១៥ អាវុធហត្ថរាជធានីភ្នំពេញស្រាវជ្រាវប្រមូលមុខសញ្ញាជួញដូរ ចែកចាយគ្រឿងញៀនបានចំនួន១២នាក់ ក្នុងនោះមានមេខ្លោងធំម្នាក់ដកហូតថ្នាំញៀនប្រភេទមេតំហ្វេតាមីនទឹកកកជិត០១គីឡូក្រាម អាវុធខ្លីម៉ាករ៉ូឡូ០១ដើម និងសម្ភារៈវត្ថុតាងជាច្រើនទៀត។
លោកបានបញ្ជាក់ឲ្យដឹងទៀតថា ដោយមានការណែនាំចង្អុលបង្ហាញពីលោក សៅ សុខាអគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស ក្នុងដើមឆ្នាំ២០១៥នេះ កម្លាំងកងរាជអាវុធហត្ថរាជធានីភ្នំពេញអនុវត្តសម្រេចបានស្នាដៃគួរឲ្យកត់សម្គាល់ជាក់ស្តែងនៅថ្ងៃទី២៣ ខែមករា ឆ្នាំ២០១៥ កម្លាំងកងរាជអាវុធហត្ថខណ្ឌពោធិសែនជ័យក្របួចបានមុខសញ្ញាមេខ្លោងជួញដូរគ្រឿងញៀនដ៏សកម្មម្នាក់ឈ្មោះ មាស វណ្ណា ហៅចិន ភេទប្រុស អាយុ៤៩ឆ្នាំ នៅក្នុងភូមិសាស្ត្រភូមិតាងួន សង្កាត់កាកាប ខណ្ឌពោធិសែនជ័យ ដកហូតបានថ្នាំញៀនប្រភេទមេតំហ្វេតាមីនទឹកកកជិត០៦ខាំ ព្រមទាំងវត្ថុតាងពាក់ព័ន្ធមួយចំនួន រួចមកក៏បានបន្តធ្វើការស្រាវជ្រាវឃាត់ខ្លួនជនសង្ស័យ០១នាក់ទៀតនៅចំណុចភូមិប៉ប្រ៉ក់ជើង សង្កាត់កាកាបខណ្ឌពោធិសែនជ័យ ដកហូតបានថ្នាំញៀនប្រភេទមេតំហ្វេតាមីនទឹកកក០១កញ្ចប់តូច។ បន្ទាប់មកកម្លាំងជំនាញការិយាល័យប្រឆាំងគ្រឿងញៀនកងរាជអាវុធហត្ថរាជធានីភ្នំពេញសហការជាមួយ
កម្លាំងមូលដ្ឋានអាវុធហត្ថខណ្ឌពោធិសែនជ័យបានបន្តចុះធ្វើការហ៊ុមព័ទ្ធគោលដៅដែលមានការពាក់ព័ន្ធលើករណីជួញដូរ ចែកចាយគ្រឿងញៀន ហើយបានឃាត់ខ្លួនជនសង្ស័យជាបន្តបន្ទាប់បានចំនួន០៧នាក់បន្ថែមទៀត(ក្នុងនោះស្រី០២នាក់)។
ក្នុងការបង្ក្រាបនោះកម្លាំងអាវុធហត្ថដកហូតសម្ភារៈវត្ថុតាងមួយចំនួនរួមមាន ថ្នាំញៀនប្រភេទមេតំហ្វេតាមីនទឹកកកចំនួន០៣កញ្ចប់តូច,ជញ្ជីងថ្លឹងថ្នាំ០១,ដាវ០១ និងកាំបិត០១។ លោកបានបញ្ជាក់ទៀតថា កម្លាំងអាវុធហត្ថការិយាល័យប្រឆាំងគ្រឿងញៀននៃមន្ទីរស្រាវជ្រាវ និងយុត្តិធម៌ រាជធានីភ្នំពេញបានធ្វើការឃាត់ខ្លួនជនសង្ស័យចំនួន០៣នាក់បន្ថែមទៀតក្នុងនោះមានម្នាក់ជាមេខ្លោងជួញដូរគ្រឿងញៀនឈ្មោះ ហ៊ូ ម៉េងខេង ហៅឡូតូ ជាមុខសញ្ញាចាស់ធ្លាប់ជាប់ពន្ធនាគារពីបទជួញដូរគ្រឿងញៀនចំនួន០២ដងរួចមកហើយ វត្ថុតាងដកហូតបានរួមមាន ថ្នាំញៀនប្រភេទ
មេតំហ្វេតាមីនទឹកកកចំនួន២៧កញ្ចប់តូច និង០២កញ្ចប់ធំ ថ្នាំទឹកដបអាចជាសារធាតុគីមីផ្សំចំនួន១៧០ដប អាវុធខ្លីម៉ាករូឡូ០១ដើម និងវត្ថុតាងពាក់ព័ន្ធជាច្រើនទៀត។
បច្ចុប្បន្នជនសង្ស័យទាំង១២នាក់ រួមនឹងវត្ថុតាង ត្រូវបានអាវុធហត្ថរាជធានីកសាងសំណុំរឿងបញ្ជូនទៅសាលាដំបូងដើម្បីផ្ដន្ទាទោសតាមច្បាប់៕
វិមាន
0 Comments