សៀមរាប ៖ អគ្គិភ័យលេបត្របាក់ផ្ទះប្រជាពលរដ្ឋនៅមុខអតីតភូមិភាគ៤អស់១ខ្នងទាំងព្រឹកព្រលឹម ខណៈពេលម្ចាស់ផ្ទះអុជធូបបន់ស្រន់មិនបានប្រុងប្រយ័ត្នរួចចុះមកក្រោមដើម្បីរៀបចំលក់ដូរនៅមុខផ្ទះ ទើបបង្កឲ្យមានការឆេះឆាបអស់ផ្ទះទាំងស្រុងតែម្តង បើទោះបីរថយន្តពន្លត់អគ្គិភ័យមកជួយក៏មិនទាន់ដែរ។
ហេតុការណ៍នេះបង្កឲ្យមានការភ្ញាក់ទាំងព្រឹកព្រលឹមនៅវេលាម៉ោង៦និង១៥នាទី ថ្ងៃទី២៨ខែមករា ឆ្នាំ២០១៥ ស្ថិតនៅភូមិគោកតាចាន់ សង្កាត់គោកចក ក្រុងសៀមរាប។ សមត្ថកិច្ចនៅកន្លែងកើតហេតុបានប្រាប់ឲ្យដឹងថា មុនពេលកើតហេតុម្ចាស់បានដុតធូបនៅលើផ្ទះរបស់គាត់ដើម្បីបន់ស្រន់ រួចចុះមកក្រោមរៀបចំឥវ៉ាន់លក់ដូរ ពេលគាត់ឡើងទៅវិញឃើញធូបជិតអស់ ក៏ចុះមកវិញមកទៀត មិនទាន់បានប៉ុន្មាននាទីផងគាត់ក៏ឃើញផ្សែងហុយទ្រលោម ពេលនោះគាត់ឡើងទៅមើលស្រាប់តែឆេះជើងធូបធ្លាក់មកក្រោម គាត់ក៏ស្រែកហៅអ្នកជិតខាងឲ្យជួយពន្លត់។ សមត្ថកិច្ចនគរបាលបានបន្តទៀតថា ក្រោយពេលកើតហេតុពលរដ្ឋក៏បានរាយការទៅនគរបាលប៉ុស្តិ៍គោកចកដើម្បីជួយហៅរថយន្តពន្លត់អគ្គិភ័យឲ្យមកជួយមួយសន្ទុះធំក៏ឃើញរថយន្តពន្លត់អគ្គិភ័យមកដល់ចំនួន២ឡាន តែបាញ់អស់មួយឡានប៉ុណ្ណោះក៏រលត់អស់ទៅ។ សមត្ថកិច្ចបានបន្តទៀតថា ម្ចាស់ផ្ទះមានឈ្មោះ នូ វណ្ណី ភេទស្រី អាយុ៥៣ឆ្នាំ មុខរបរលក់ដូរនៅផ្ទះ រស់នៅភូមិគោកតាចាន់ សង្កាត់គោកចក ក្រុងសៀមរាបត្រូវបានភ្លើងឆេះផ្ទះអស់ទាំងស្រុង ដែលមានទំហំ៧មX១០ម៉ែត្រ ធ្វើអំពីឈើលើថ្មក្រោម ប្រក់ស៊ីប្រូ ហើយខូចខាតសម្ភារៈដូចជាម៉ូតូម៉ាកC60 សេរីចាស់មួយគ្រឿង,ទូរដែក១។
សូមរំលឹកថា នៅខេត្តសៀមរាបនាដើមឆ្នាំ២០១៥នេះ ទើបតែមានករណីគ្រោះអគ្គិភ័យមួយលើកប៉ុណ្ណោះ ហើយមួយករណីនេះត្រូវបានអគ្គិភ័យឆាបឆេះអស់ទ្រព្យសម្បត្តិទាំងស្រុង៕
កុសល
0 Comments