កងកម្លាំងបំបែកខ្លួនស្និទ្ធរុស្ស៊ីបាននិយាយនៅថ្ងៃអង្គារថា ពួកគេបានវាយរុញច្រានកងទ័ពរដ្ឋាភិបាលអ៊ុយក្រែនឲ្យដកថយចេញពីសង្កាត់ពីរនៅជាយក្រុងដូណេត ដែលជាតំបន់ការពារដ៏សំខាន់របស់គេ ហើយគោលបំណងរបស់គេគឺដើម្បីពង្រីកការគ្រប់គ្រងរបស់គេនៅក្នុងតំបន់ទាំងមូល។ ការរុលទៅមុខរបស់ឧទ្ទាមដែលបានធ្វើការពីសប្ដាហ៍មុននោះ បានរំលោភបទឈប់បាញ់រយៈពេល៥ខែ ដោយបានអុជឲ្យមានសង្គ្រាមសាជាថ្មី ដែលបានសម្លាប់មនុស្សជាង៥.០០០នាក់ និងនាំមកនូវការគំរាមទណ្ឌកម្មថ្មីប្រឆាំងនឹងក្រុងមូស្គូ ដែលអង្គការណាតូ ចោទប្រកាន់ថា កំពុងគាំទ្រពួកបំបែកខ្លួនដោយផ្តល់ប្រាក់ អាវុធ និងកងទ័ពនោះ។
ពួកបំបែកខ្លួននិយាយថា គោលដៅដំបូងរបស់គេគឺត្រូវវាយរុញច្រានកងកម្លាំងរដ្ឋាភិបាលឲ្យដកថយ ដកកាំភ្លើងធំចេញពីទីក្រុងទាំងឡាយរបស់គេនិងពង្រឹងការក្តោបក្តាប់តំបន់ការពារសំខាន់ៗរបស់គេ។
លោក អេឌូអាដបាស៊ូរិ(Edduard Basurin) មេបញ្ជាការរងឧទ្ទាមនៅដូណេតនិយាយថា ពួកយុទ្ធជនបានវាយបណ្ដេញកងទ័ពរដ្ឋាភិបាលចេញពីជាយក្រុងម៉ារិយិនកានិងកណ្ដាលទីក្រុងប៉េស្គី នៅជិតប្រលានយន្តហោះដូណេត។
លោក បាននិយាយតាមទូរស័ព្ទថា "ពួកគេបានគ្រប់គ្រងទីក្រុងម៉ារិយិនកា ទាំងស្រុងហើយ៕រឹទ្ធ
0 Comments