ភ្នំពេញ ៖ ក្រោយពិធីរៀបការតាមប្រពៃណីនៅឯខេត្តបាត់ដំបងកាលពីថ្ងៃទី១៦ ខែមករា ឆ្នាំ២០១៥រួចមក កាលពីរាត្រីថ្ងៃទី២៣ ខែមករា ឆ្នាំ២០១៥កន្លងមកនេះ អ្នកនាង ឆៃលី ដាឡែន និងលោក រិទ្ធី ឧត្តមស៊ីដារា ដែលជាស្វាមីបានធ្វើពិធីកាត់ចំណងដៃនៅកោះពេជ្រក្នុងរាជធានីភ្នំពេញ ដោយមានភ្ញៀវចូលរួមប្រមាណ៥០០នាក់ និងបានធ្វើឲ្យមានការភ្ញាក់ផ្អើល ខណៈដែលតារាស្រីរូបនេះបានយំឱបលោកអេឡិច ចាន់ត្រា នៅនឹងមុខស្វាមី។
នៅក្នុងពិធីថ្លែងអំណរគុណភ្ញៀវដែលបានមកចូលរួមដ៏កុះករដែលភាគច្រើនជាអ្នកសិល្បៈនោះ ឆៃលី ដាឡែន បានចាប់ផ្ដើមអួលដើមក ខណៈដែលនាងរំភើបនឹងពិធីមង្គលការដ៏ធំដែលជាក្តីស្រមៃដ៏ធំក្នុងជីវិតរបស់នាង។ តារារូបនេះបាននិយាយឲ្យដឹងថា មានមិត្តរួមអាជីពជាច្រើនដែលជួយបំពេញក្តីស្រមៃរបស់នាងឲ្យក្លាយជាការពិតក្នុងនោះក៏មានរួមចំណែកដៃគូចាស់ គឺលោកអេឡិច ចាន់ត្រាដែលបានជួយគ្រប់បែបយ៉ាងធ្វើឲ្យនាងទទួលបានទាំងការគាំទ្រ ក៏ដូចជាជំរុញលើកទឹកចិត្តនាង។ ក្នុងទឹកភ្នែកហូររហាមតារាចម្រៀង ឆៃលី ដាឡែន បានឱបលោកអេឡិច ចាន់ត្រា ដែលកន្លងមកអ្នកទាំងពីរធ្លាប់លេចធ្លាយដំណឹងស្នេហាក្រៅឆាកជាមួយគ្នានោះ។
តារាស្រីរូបនេះបានបន្តថា ទោះបីជាកន្លងមកនាងនិងលោក អេឡិច ចាន់ត្រា ធ្លាប់ឈ្លោះប្រកែក និងជួបឧបសគ្គជាច្រើនរាប់មិនអស់ ក៏លោកអេឡិច ចាន់ត្រានៅតែបន្តចូលរួមលើកកម្លាំងចិត្តនាងជានិច្ច ហើយក្នុងពិធីមង្គលការនេះក៏មានការជួយជ្រោមជ្រែងពីលោកដែរ។ ចំណែកលោក អេឡិច ចាន់ត្រាវិញក៏ស្រក់ទឹកភ្នែក ក្រោយពីពេលខ្លួនបានឮការថ្លែងអំណរគុណពីដៃគូរបស់ខ្លួននូវសន្តានចិត្តអាណិតស្រលាញ់ និងចេះជួយយកអាសាគ្នាគ្រាលំបាក គ្រាកំសត់ជាមួយគ្នានិងការយកចិត្តទុកដាក់នៅលើវិថីសិល្បៈដំបូងរបស់ពួកគេ។
នៅក្នុងពិធីកាត់ចំណងដៃរបស់ ឆៃលី ដាឡែន ដែលបានធ្វើនៅរាជធានីភ្នំពេញនេះគឺជាការចេញមុខជួយជ្រោមជ្រែងរបស់តារាចម្រៀងមុខកូនកាត់ចិនលោក អេឡិច ចាន់ត្រា ជាអ្នករ៉ាប់រង រួមជាមួយនឹងមិត្តភ័ក្ដិលោក នង មុន្នីកា អគ្គនាយកក្រុមហ៊ុន HAMONIA ដែលជាក្រុមហ៊ុនមានរៀបចំតុបតែង និងរចនាផ្កាស្រស់នោះ។ មិនខុសពីដៃគូដែលខ្លួនគិតថាសក្ដិសមនិងលើកស្ទួយខ្លួនឲ្យមានកេរ្តិ៍ឈ្មោះក្នុងដំណើរសិល្បៈដូចសព្វថ្ងៃ ក្នុងទឹកមុខញញឹមតែមានស្នាមហូរទឹកភ្នែកផងនោះ លោក អេឡិច ចាន់ត្រា បានថ្លែងទាំងអួលដើមក ព្រមទាំងយកដៃជូតទឹកភ្នែកឲ្យដៃគូខ្លួនថា«ថ្ងៃនេះជាថ្ងៃ ដែលខ្ញុំស្រក់ទឹកភ្នែកដំបូងជាមួយដៃគូរបស់ខ្ញុំ! ខ្ញុំជូតទឹកភ្នែកឲ្យដាឡែន ព្រោះថ្ងៃនេះនាងស្រស់ស្អាតខ្លាំងណាស់! ដូច្នេះមិនត្រូវឲ្យមានទឹកភ្នែកហូរទេ!»។ នៅពេល លោក អេឡិច ចាន់ត្រា និយាយមិនទាន់ចប់ផង ភ្ញៀវដែលបានចូលរួមក្នុងពិធីបានស្រែកគាំទ្រគងរំពងពេញរោងពិធីទាំងមូលតែម្ដង៕
នរសិង្ហ
0 Comments