ភ្នំពេញ ៖ ស្ថានទូតសហរដ្ឋអាមេរិកមានសេចក្តីរីករាយបានប្រកាសថា ពិព័រណ៍ស្ដីពីការអប់រំនៅសហរដ្ឋអាមេរិកឆ្នាំ២០១៥ នឹងប្រព្រឹត្តទៅនៅថ្ងៃអាទិត្យ ទី០១ ខែកុម្ភៈ ឆ្នាំ២០១៥ ពីម៉ោង៣និង០០ រសៀលដល់ម៉ោង៧និង០០យប់ នៅសណ្ឋាគារអាំងទែកុងទីណង់តាល់ ក្នុងរាជធានីភ្នំពេញ។
យោងតាមសេចក្តីប្រកាសព័ត៌មានរបស់ស្ថានទូតអាមេរិកប្រចាំកម្ពុជាចុះថ្ងៃទី២៩ ខែមករា ឆ្នាំ២០១៥ បានឲ្យដឹងថា តំណាងចំនួន២០រូបមកពីមហាវិទ្យាល័យ និងសកលវិទ្យាល័យនៅក្នុងសហរដ្ឋអាមេរិកនឹងមកប្រាប់សិស្ស និស្សិតអំពីកម្មវិធីសិក្សាយកសញ្ញាប័ត្រមហាវិទ្យាល័យ លក្ខខ័ណ្ឌក្នុងការទទួលឲ្យចូលរៀន និងឱកាសទទួលបានអាហារូបករណ៍នៅក្នុងសហរដ្ឋអាមេរិក។ អ្នករៀបចំពិព័រណ៍ដទៃទៀតនៅទីនោះនឹងផ្តល់ព័ត៌មានស្ដីពីទិដ្ឋាការសំរាប់សិស្ស និស្សិត កម្មវិធីផ្លាស់ប្ដូររបស់រដ្ឋាភិបាលសហរដ្ឋអាមេរិកផ្នែកការសិក្សា និងប្រឹក្សាស្ដីពីការសិក្សានៅសហរដ្ឋអាមេរិក។
សិស្សវិទ្យាល័យ និងនិស្សិតសកលវិទ្យាល័យនៅកម្ពុជាទាំងអស់ដែលមានការចាប់អារម្មណ៍ចង់សិក្សានៅសហរដ្ឋអាមេរិក ត្រូវបានស្វាគមន៍ឲ្យចូលរួម។ ឪពុកម្ដាយរបស់សិស្ស និស្សិតក៏ត្រូវបានស្វាគមន៍ ហើយគួរតែចូលរួមផងដែរ។ ដោយមានការឧបត្ថម្ភពីស្ថានទូតអាមេរិក ពិព័រណ៍នេះត្រូវបានរៀបចំឡើងដោយមជ្ឈមណ្ឌល EducationUSA នៅកម្ពុជា ដែលមានបំណងលើកកំពស់គុណភាពនៃការសិក្សាអប់រំ ពង្រីកឱកាសក្នុងអាជីព និងការសិក្សា សម្រាប់ប្រជាជនកម្ពុជា។
ពិព័រណ៍នេះគឺជាវិធីពិសេសមួយសម្រាប់ឲ្យប្រជាជនកម្ពុជាធ្វើការទាក់ទងជាមួយស្ថាប័នឧត្ដមសិក្សានៅសហរដ្ឋអាមេរិក ហើយយល់ដឹងពីអត្ថប្រយោជន៍នៃការទទួលបានការសិក្សាពីសកលវិទ្យាល័យនៅក្នុងសហរដ្ឋអាមេរិក៕
កោះកែវ
0 Comments