ប្រទេសអ៊ីស្រាអែលបាននិយាយប្រាប់ក្រុមប្រឹក្សាសន្តិសុខអ-ស-ប នៅថ្ងៃពុធថា ខ្លួននឹងប្រកាន់យកគ្រប់វិធានការចាំបាច់ទាំងអស់ដើម្បីការពារខ្លួនឯង និងការបាញ់តបតរវាងពួកសកម្មប្រយុទ្ធហេសប៊ូឡា និងអ៊ីស្រាអែលដែលបានបង្កើនការគំរាមថានឹងមានជម្លោះពេញទំហឹងនោះ។
ឯកអគ្គរដ្ឋទូតអ៊ីស្រាអែលប្រចាំអ-ស-ប លោក រ៉ន់ប្រូស័រ (Ron Prosor) បាននិយាយនៅក្នុងសារលិខិតមួយផ្ញើជូនអគ្គលេខាធិការលោក បានគីមូន (Ki-moon) និងក្រុមប្រឹក្សាសន្តិសុខថា"អ៊ីស្រាអែលនឹងមិនឈរមើលនៅពេលពួកហេសប៊ូឡាសំដៅទៅលើប្រជាជនអ៊ីស្រាអែលនោះទេ"។
លោកបានបន្ថែមថា "ប្រទេសអ៊ីស្រាអែលនឹងមិនទទួលយកការវាយប្រហារណាមួយមកលើទឹកដីរបស់ខ្លួន ហើយនឹងប្រកាន់យកគ្រប់វិធានការចាំបាច់ទាំងអស់ដើម្បីការពារប្រជាជនរបស់ខ្លួន"។ ការវាយប្រហារនោះបានកើតឡើងនៅថ្ងៃពុធ នៅក្នុងការប្រយុទ្ធគ្នាកើនឡើងដ៏ខ្លាំងបំផុតចាប់តាំងពីសង្គ្រាមឆ្នាំ២០០៦មក។
ទាហានអ៊ីស្រាអែលពីរនាក់ និងទាហានរក្សាសន្តិភាពអេស្ប៉ាញម្នាក់ បានស្លាប់នៅពេលពួកហេសប៊ូឡា បាញ់មីស៊ីលទៅលើក្បួនរថយន្តយោធារបស់អ៊ីស្រាអែលនៅព្រំដែនលីបង់៕
រឹទ្ធ
0 Comments