ចាប់​ខ្លួន​ជាង​បាញ់​ថ្នាំ​លក់​រថយន្ត​ប្រើ​កាត​គ្រី​ក្លែងក្លាយ

កំពង់ចាម​ ៖ ​ជាង​បាញ់​ថ្នាំ​រថយន្ត​ម្នាក់ ត្រូវ​សមត្ថកិច្ច នគរបាល ស្រុក​ជើងព្រៃ​ចាប់ខ្លួន​ពី​បទ​រំលោភ​ទំនុកចិត្ត​ដោយ​លក់​រថយន្ត​មួយ​គ្រឿង​ប្រើ​កាត​គ្រី ក្លែងក្លាយ។

ប៉ូលិស​បាន​អោយ​ដឹង​ថា កាលពី​ថ្ងៃទី​05​ ខែមិថុនា​ ឆ្នាំ​2018​វេលា​ម៉ោង 12-00​ នគរបាល​ស្រុក​ជើងព្រៃ បាន​ទទួល​បណ្ដឹង​ពី​ជនរងគ្រោះ ឈ្មោះ ញ៉ែម​សម្ផស្ស ភេទ​ស្រី​អាយុ​25​ឆ្នាំ​ នៅ​ភូមិ​សង្កែ​ពង ឃុំ​ស្រម៉រ ​ស្រុក​ជើងព្រៃ​ ខេត្តកំពង់ចាម ​ ដោយ​បាន​មក​ប្តឹង​នៅ​អធិការដ្ឋាន​នគរបាល​ស្រុក​ជើងព្រៃ​ថា ខ្លួន​ត្រូវ​ជនសង្ស័យ​ឈ្មោះ ហ៊ាង​ម៉េង​សាន ភេទ​ប្រុស អាយុ​26​ឆ្នាំ​ នៅ​ភូមិ​កោះត្រែង ឃុំ​កោះ​ពីរ ស្រុក​ក្រូចឆ្មារ​ខេត្ត​ត្បូងឃ្មុំ មាន​មុខរបរ​ជាជាង តោន​បាញ់ថ្នាំ​រថយន្ត​ស្នាក់នៅ​ភូមិ​សង្កែ​ពង​ ឃុំ​ស្រម៉រ ស្រុក​ជើ​ព្រៃ​(​ជួល​ដី​គេ​ប្រកបមុខរបរ​) បាន​លក់​រថយន្ត ប្រើ​កាត​គ្រី​ក្លែងក្លាយ អោយ​ខ្លួន​ ញែ​ម សម្ផស្ស ក្នុង​តម្លៃ​ប្រាក់​ចំនួន​4100$(​បួន​ពាន់​មួយ​រយ​ដុល្លារ)។

ស្ត្រី​រងគ្រោះ​បាន​បញ្ជាក់​ថា នៅ​ថ្ងៃទី​31-5-2018​វេលា​ម៉ោង​12 ឈ្មោះ ហ៊ាង ម៉េង​សាន​ភេទ​ប្រុស អាយុ​26​ឆ្នាំ មុខរបរ​ជាជាង​បាញ់ថ្នាំ​រថយន្ត ស្នាក់នៅ​ភូមិ​សង្កែ​ពង ឃុំ​ស្រម៉រ ស្រុក​ជើងព្រៃ ខេត្ត​កំពង់ចាម បាន​ទូរស័ព្ទ​មក​ខ្លួន​ឈ្មោះ​(​ញ៉ែម​សម្ផស្ស​)​ និង​ប្តី ឈ្នោះ វ៉ាន់ ផល្លី អាយុ​32​ឆ្នាំ ​នៅ​ភូមិ​សង្កែ​ពង មុខរបរ​ជាង​ម៉ា​ស៊ី​ន​រថយន្ត ថា ឈ្មោះ ហា៑ង ម៉េង​សាន ចង់​លក់​រថយន្ត ម៉ាក​សាំ​យ៉ុង មួយគ្រឿង​ហើយក៏​មានការ​តថ្លៃ​គ្នា រហូត​ត្រូវ​គ្នា​ក្នុង​តំលៃ​4100$​ដោយ ខ្លួន​ពុំបាន​ពិនិត្យ​ឯកសារ​កាត​គ្រី​ច្បាស់លាស់។

ស្ត្រី​រងគ្រោះ​បន្តថា លុះ​03​ថ្ងៃ​ក្រោយមក​ មាន​គេ​មក​រក​ទិញ​រថយន្ត​នោះ​ ហើយ​គេ​បាន​មើល​កាត​គ្រី រថយន្ត​នោះ ទើប​ដឹង​ថា ​ក្លែងក្លាយ​ ហើយ​គេ​បាន​អោយ មន្ត្រី​សាធារណការ​ឆែក​មើល ម្តង​ទៀត​ក៏​ឃើញថា​ក្លែងក្លាយ មែន ​និង​ថា​លេខ​រថយន្ត​នោះ​ជា​លេខ​រថយន្ត​កាមរី​ទៅវិញ។

បន្ទាប់មក​ ខ្លួន​ឈ្មោះ​ញ៉ែម​សម្ផស្ស​ និង​ប្តី​បាន​ប្រាប់​ទៅ​ឈ្មោះ​ហ៊ាង​ ម៉េង​សាន​ថា​អោយប្រាក់​4100$​មកវិញ ហើយ​យក​រថយន្ត​របស់ខ្លួន​ទៅវិញ​ទៅ​ចុះ តែ​ឈ្មោះ​ហ៊ាង​ម៉េង​សាន​មិន​ព្រម​អោយ​លុយ​វិញ​ឡើយ។

ជនរងគ្រោះ​បញ្ជាក់ថា ឈ្មោះ​ហ៊ាង​ម៉េង​សាន​នេះ ជួល​ដី​គេ​បាញ់ថ្នាំ​រថយន្ត​ដល់​អាណត្តិ​ត្រូវ​បញ្ឈប់ និង​បម្រុង​គេច​ខ្លួន​ផង​នោះ ​និង​ម្យ៉ាងទៀត​អ្នកស្រី​ខ្លាច​រថយន្ត​នោះ​មានការ​ពាក់ព័ន្ធ​ករណី​ផ្សេងទៀត​ក៏​សម្រេច​ចិត្ត​មកប្តឹង​នគរបាល​ជួយ​អន្តរាគមន៍​ជួយ​ដោះស្រាយ​អោយ​ឃាត់​ធ្វើតាម​ច្បាប់​។​
ប៉ូលិស​បាន បញ្ជាក់ថា ​ជនសង្ស័យ​បាន​ឃាត់ខ្លួន​នៅ​អធិការដ្ឋាន​នគរបាល​ស្រុក​កសាង​សំណុំរឿង​តាម​នីតិ​វិធី៕


​

Source: Kampuchea Thmey Daily