ត្បូងឃ្មុំ ៖ សមិទ្ធផលចេតិយថ្មីមួយទៀត កសាងក្នុងស្រះទឹកទំហំ (៣១ម៉ែត្រ គុណនឹង២០ម៉ែត្រ)មានរចនាជាស្ពាននាគឆ្លងចេញចូល មានបង្កាន់ដៃព័ទ្ធជុំវិញស្រះយ៉ាងស្រស់ស្អាត ដែលផ្ដួចផ្ដើមកសាងឡើងដោយសម្ដេចប្រធានរដ្ឋសភា និងលោកជំទាវ នៅក្នុងវត្តជម្ពូសុវណ្ណ ហៅវត្តត្រពាំងព្រីង ឃុំត្រពាំងផ្លុង ស្រុកពញាក្រែក ខេត្តត្បូងឃ្មុំ ត្រូវបានសម្ពោធបើកឲ្យប្រើប្រាស់ជាផ្លូវការនារសៀលថ្ងៃទី២៨ ខែមករា ឆ្នាំ២០១៥នេះ។
មានមតិសំណេះសំណាលទៅកាន់ពុទ្ធបរិស័ទ អាជ្ញាធរដែនដី ដែលបានចូលរួមពិធីកាត់ខ្សែបូសម្ពោធនេះ សម្ដេចពញាចក្រី ហេង សំរិន ប្រធានរដ្ឋសភាបានមានប្រសាសន៍លើកឡើងថា សម្ដេច និង លោកជំទាវផ្ដើមកសាងចេតិយនេះឡើងដើម្បីជាកន្លែងដ៏សមគួរមួយសម្រាប់តម្កល់អដ្ឋិធាតុព្រះចៅអធិការវត្តព្រះនាម សេក មាន និង ព្រះគ្រូសូត្រ នង សូ ដែលជាព្រះគ្រូរបស់សម្ដេចកាលសម្ដេចនៅក្មេងធ្លាប់បួសរៀនក្នុងវត្តនេះ។ សំណង់ចេតិយនេះផ្ដើមកសាងពីថ្ងៃទី១២ ខែវិច្ឆិកា ឆ្នាំ២០១២ រហូតបញ្ចប់ការកសាងនៅថ្ងៃទី០១ ខែធ្នូ ឆ្នាំ២០១៤ ចំណាយទឹកប្រាក់សរុបចំនួន ១៨៩.៨៥៦.២០០រៀល ដែលជាថវិកាបានមកពីការចូលរួមកសាងរបស់ពុទ្ធបរិស័ទចំណុះជើងវត្ត សប្បុរសជនគ្រប់ទិសទី ព្រមទាំងមានការចូលរួមពីសម្ដេច និងលោកជំទាវនូវថវិកាចំនួន១០៥លានរៀលផងដែរ។ សម្ដេចអគ្គមហាពញាចក្រី ហេង សរិន បានរំលឹកថា យើងជាអ្នកកាន់ព្រះពុទ្ធសាសនា យើងត្រូវមានសច្ចៈធម៌ ចេះស្គាល់គុណនិងទោស ទើបមានសេចក្តីសុខ តែបើយើងមិនស្គាល់គុណទោសទេ សេចក្តីសុខពិតជាមិនអាចកើតមានដល់ខ្លួនយើងនោះឡើយ។
សម្ដេចបន្តថា ចំពោះសមិទ្ធផលនានាក្នុងវត្តនេះ ក៏ដូចនៅទូទាំងប្រទេសដែរ គឺពិតជាកើតឡើងដោយគុណបុណ្យ២ធ្នូ និងថ្ងៃ៧មករា ក្រោមការដឹកនាំរបស់គណបក្សប្រជាជនកម្ពុជា។ ដូច្នេះមានតែថ្ងៃទី២ ខែធ្នូ ឆ្នាំ១៩៧៨ និងថ្ងៃទី៧ ខែមករា ឆ្នាំ១៩៧៩ទេ ដែលជាថ្ងៃផ្តល់កំណើតទី២ឲ្យយើង ដែលយើងក៏ត្រូវមិនបំភ្លេចគុណដែរ នេះហើយជាសច្ចៈធម៌។ កាលជំនាន់របបប៉ុលពត ប្រទេសជាតិបានទទួលរងនូវភាពខ្ទេចខ្ទាំ ប្រជាពលរដ្ឋរស់នៅយ៉ាងសែនមហាលំបាកវេទនាបំផុត សូម្បីតែទីវត្តអារាមដែលជាទីកន្លែងសក្ការៈបូជារបស់ពុទ្ធបរិស័ទខ្មែរយើង ក៏ត្រូវពួកវាបំផ្លាញគ្មានសល់ដែរ។ តួយ៉ាងដូចវត្តត្រពាំងព្រឺង ឃុំត្រពាំងផ្លុង ស្រុកពញាក្រែក ខេត្តត្បូងឃ្មុំយើងនេះ មិនខុសពីវត្តដទៃទៀតក្នុងទូទាំងប្រទេសដែរ រាល់សមិទ្ធផលក្នុងវត្តត្រូវបានបំផ្លាញគ្មានសល់ កុំតែមានថ្ងៃទី២ ខែធ្នូ និងថ្ងៃទី៧ ខែមករាទេ ទើបមានថ្ងៃនេះ។ សម្ដេចបន្ថែមថា បច្ចុប្បន្នរាជរដ្ឋាភិបាលកម្ពុជាមានការខិតខំប្រែងណាស់ ដើម្បីសុខសន្តិភាព ការរីកចម្រើនប្រទេសជាតិ និងប្រជាជន។ គ្រប់ហេដ្ឋារចនាសម្ព័ន្ធត្រូវបានស្តា និងអភិវឌ្ឍន៍ឡើងវិញ សាលារៀន មន្ទីរពេទ្យ ផ្លូវជាតិ ផ្លូវលំ សំណង់ធារាសាស្ត្រ វត្តអារាម មានការរីកដុះដាលដូចផ្សិត បម្រើសេចក្តីត្រូវការរបស់ប្រជាពលរដ្ឋបានយ៉ាងល្អប្រសើរ។
សម្ដេចអគ្គមហាពញ្ញាចក្រី ហេង សំរិន បានឲ្យដឹងដែរថា កន្លងមកវត្តនេះសម្ដេច និងលោកជំទាវ តែងបានជួយរួមចំណែកកសាងសមិទ្ធផលនានាជូនវត្តត្រពាំងព្រឺងជាបន្តបន្ទាប់ សម្រាប់ជាប្រយោជន៍ដល់ព្រះសង្ឃ ពុទ្ធបរិស័ទ ក្នុងមូលដ្ឋាននេះរួមមាន ព្រះវិហារ ដងទង់ ក្លោងទ្វារ កុដិ ឧបដ្ឋានសាលា ស្រះទឹក និងចេតិយដែលសម្ពោធដាក់ឲ្យប្រើប្រាស់ជាផ្លូវការក្នុងថ្ងៃនេះ។
លោកតា ធាម សេងគ្រុយ អាចារ្យវត្តត្រពាំងព្រឺងបានប្រាប់ឲ្យដឹងដែរថា វត្តនេះសម្ដេចធ្លាប់បួសរៀនកាលនៅពីក្មេង មានអាយុកាលយូរលង់ជាង២០០ឆ្នាំមកហើយ ប៉ុន្តែក្នុងរបបប្រល័យពូជសាសន៍ប៉ុលពត វត្តនេះត្រូវបានបំផ្លាញគ្មានសល់អ្វីទេ ទើបតែក្រោយថ្ងៃរំដោះ៧មករា ឆ្នាំ១៩៧៩ ត្រូវបានកសាងជាថ្មីឡើងវិញទាំងអស់។ លោកបន្តថា កាលសម័យដើម វត្តនេះខ្វះខាតណាស់សំណង់ធ្វើតែពីឈើប៉ុណ្ណោះ ទើបតែឥឡូវដោយមានការជួយជ្រោមជ្រែងគ្រប់បែបយ៉ាងពីសម្ដេចចក្រី ហេង សំរិន និងលោកជំទាវ ព្រមទាំងបុត្រា បុត្រីរបស់សម្ដេច រួមជាមួយពុទ្ធបរិស័ទជិតឆ្ងាយ វត្តត្រពាំងព្រឺងមានភ័ព្វសំណាងបានទទួលបានការអភិវឌ្ឍន៍ រីកចម្រើនជាបន្តបន្ទាប់។
ក្នុងពិធីនេះដែរ សម្ដេចនិងលោកជំទាវ ក៏បានប្រគេនបច្ច័យចំនួន២០លានរៀលសម្រាប់ជួយកសាងវត្តនេះបន្ថែមទៀត ព្រមទាំងបានចែកជូនដល់លោកយាយ លោកតាចំនួន២០០នាក់នូវក្រណាត់សរម្នាក់មួយដុំ ថវិកា១ម៉ឺនរៀល និងផ្តល់ជាអំណោយដល់សិស្សានុសិស្ស១៥០នាក់ ម្នាក់ៗទទួលបានសៀវភៅ១ក្បាល ថវិកា២.០០០រៀល៕
សុងយោ
0 Comments