អ្នកប្រដាល់ខ្មែរ៣និងថៃ៣ ជួបគ្នាលើសង្វៀនSEA-TV
ភ្នំពេញ ៖ ព្រឹត្តិការណ៍ប្រកួតប្រដាល់ក្នុងកម្មវិធី Ganzberg Top Fighter នាព្រឹកថ្ងៃអាទិត្យ ទី០១ ខែកុម្ភៈ លើសង្វៀន SEA-TV អ្នកប្រដាល់ខ្មែរ៣រូបនឹងជួបប្រកួតជាមួយអ្នកប្រដាល់ថៃ៣រូប។ អ្នកប្រដាល់កម្ពុជាទាំង៣រូបនោះ គឺ ហ៊ឹម សេរី អ្នកប្រដាល់ក្លឹបតាព្រហ្មមានជ័យបង្ក្រាបគ្រឿងញៀន ត្រូវជួបជាមួយអ្នកប្រដាល់ថៃឈ្មោះ Det ordoom ដោយប្រកួតក្នុងទម្ងន់៥១គីឡូក្រាម។ អ្នកប្រដាល់ថៃរូបនេះធ្លាប់មកប្រកួតនៅសង្វៀន SEA-TVនេះម្តងហើយ ដោយវាយចាញ់ ម៉ន វិរះ អ្នកប្រដាល់ក្លិបការិយាល័យទី៥កងទ័ពជើងគោក ក្នុងទឹកទី៣កាលពីថ្ងៃទី០៧ ខែធ្នូ ឆ្នាំ២០១៤កន្លងមកនោះ។
Det ordoom អ្នកប្រដាល់ថៃរូបនេះ មានកម្ពស់ប្រហាក់ប្រហែល ហ៊ឹម សេរីដែរ តែប្រវត្តិប្រកួតរបស់គេច្រើនជាង សេរី ដោយប្រកួតបានចំនួន៥៥ដង ដោយឈ្នះ៤០ដង ចាញ់១៣ដង និងស្មើ២ដង ខណៈដែល ហ៊ឹម សេរី អ្នកប្រដាល់កម្ពុជាយើងប្រកួតបានចំនួន៣៥ដង ឈ្នះ៣០ដង ចាញ់៤ដង និងស្មើ១ដង។ ហ៊ឹម សេរី ធ្លាប់ប្រកួតជាមួយថៃប្រមាណ៣ដងហើយ ដោយវាយឈ្នះ ថៃ ដោយពិន្ទុទាំង៣ដង។ ជាអ្នកប្រដាល់ដែលមានកណ្ដាប់ដៃលឿន រហ័ស និងខ្លាំងនោះ ហ៊ឹម សេរីមិនញញើតអ្នកប្រដាល់ថៃនោះឡើយ។
បើតាមលោក មាស សុខគ្រី គ្រូបង្វឹកក្លិបតាព្រហ្មមានជ័យនិយាយឲ្យដឹងថា ហ៊ឹម សេរី បានត្រៀមខ្លួនយ៉ាងល្អសម្រាប់ជំនួបជាមួយថៃនេះ។ ចាំមើល តើ ហ៊ឹម សេរី អាចយកឈ្នះ Det ordoom បានឬអត់ ? អ្នកប្រដាល់កម្ពុជា ពេជ្រ ម្ទេសខ្មាំង ក្លិបអារុណរះកីឡា ត្រូវផ្គូផ្គងឲ្យជួបប្រកួតជាមួយអ្នកប្រដាល់ថៃឈ្មោះ Peach Thong Chhai ដោយប្រកួតក្នុងប្រភេទទម្ងន់៥៤គីឡូក្រាម។
អ្នកប្រដាល់ថៃរូបនេះ បើតាមលោក ញាន សុធី អ្នកផ្គូផ្គងប្រដាល់ប្រចាំ SEATV និយាយឲ្យដឹងនោះថា គេជាជើងខ្លាំងមួយរូបនៅប្រទេសថៃ ដោយគេមានប្រវត្តិប្រកួតបាន៦២ដង ឈ្នះ៥១ដងចាញ់០៩ដង និងស្មើ២ដង។ Peach Thong Chhai នេះ មិនធ្លាប់ដែលមកកម្ពុជាទេកន្លងមក។ គេមានកម្ពស់ទាបជាងម្ទេសខ្មាំងបន្តិចប៉ុណ្ណោះ គឺ១,៥៩ម៉ែត្រ ក្នុងពេលដែលម្ទេសខ្មាំងមានកម្ពស់១,៦២ម៉ែត្រ។ ទោះជាយ៉ាងណាសម្រាប់ការជួបជាមួយម្ទេសខ្មាំងជើងខ្លាំងរបស់កម្ពុជាម្នាក់នេះ Peach Thong Chhaiមិនជាស្រួលខ្លួនប៉ុន្មានទេ ទោះបីជាការប្រកួតជាមួយថៃនេះជាជំនួបលើកដំបូងក៏ដោយ ។ ម្ទេសខ្មាំងនេះវាយខ្លាំង និងមានបច្ចេកទេសក្នុងការប្រកួតល្អ ហើយមួយទៀត គេដូចជាថ្នឹកហើយរឿងវាយលើសង្វៀនប្រដាល់នេះ។ ព្រំ សំណាង អ្នកប្រដាល់ក្លិបកងពលតូចទ័ពឆ័ត្រយោង៩១១ គេនឹងជួបជាមួយអ្នកប្រដាល់ថៃឈ្មោះ Sak Soben ដោយប្រកួតក្នុងទម្ងន់៧១គីឡូក្រាម។ ព្រំ សំណាងជាជើងខ្លាំងម្នាក់ដែររបស់កម្ពុជា ហើយគេក៏ធ្លាប់ប្រកួតជាមួយបរទេសច្រើនដងហើយដែរ ដោយឈ្នះច្រើនជាងចាញ់។
Sak Soben នេះ មិនដែលមកស្រុកខ្មែរទេកន្លងមក។ បើតាមប្រវត្តិប្រកួតរបស់គេ មិនជាអន់ទេដោយធ្លាប់ឆ្លងកាត់ប្រកួតចំនួន៦៦ដង ក្នុងនោះវាយឈ្នះ៥៩ដងទៅហើយ ចាញ់៧ដង និងមិនដែលស្មើឡើយ។
អ្នកប្រដាល់កណ្ដាប់ដៃខ្លាំង ព្រំ សំណាង គេប្រកួតបាន៥២ដង តិចជាង Sak Soben ១៤ដងប៉ុណ្ណោះ ក្នុងនោះវាយឈ្នះ៤២ដង និងចាញ់៨ដង ស្មើ២ដង។ គេប្រកួតជាមួយអ្នកប្រដាល់ថៃលើកចុងក្រោយ គឺឈ្នះ Sing dech S.Khamsing ដោយពិន្ទុ កាលពីឆ្នាំ២០១៤កន្លងមក។
ចាំមើលឡើងប្រកួតលើកនេះ ព្រំ សំណាង អាចយកឈ្នះអ្នកប្រដាល់ថៃ Sak Soben បានឬអត់៕
វិសិទ្ធ
0 Comments