មណ្ឌលគិរី ៖ បច្ចុប្បន្ននេះដំណាំម្រេចគឺជាដំណាំដែលមានទីផ្សារល្អ ទាំងក្នុងនិងក្រៅប្រទេស ហើយគេសង្កេតឃើញថា ទោះជាខេត្តមណ្ឌលគិរីជាតំបន់ខ្ពង់រាបប្រជុំភ្នំក៏ពិតមែន ប៉ុន្តែផ្ទៃដីក្នុងខេត្តនេះអំណោយផលបានយ៉ាងល្អសម្រាប់ដំណាំស្ទើរគ្រប់ប្រភេទ រួមទាំងដំណាំម្រេចផងដែរ។ ហើយត្រូវបានគេមើលឃើញថា ប្រជាកសិករគ្រប់វណ្ណៈ ទាំងអ្នកមានធនធាន និងបងប្អូនប្រជាកសិករដែលពុំសូវមានធនធាននោះ បានងាកមកចាប់លើអារម្មណ៍លើការបង្កបង្កើនផលដំណាំម្រេច ទៅតាមលទ្ធភាពដែលពួកគាត់អាចធ្វើទៅបាន។
ប្រជាកសិករដែលដាំដំណាំម្រេចក្នុងស្រុកពេជ្រចិន្ដាបានឲ្យដឹងថា ផ្ទៃដីក្នុងខេត្តនេះគឺមានជីវជាតិ ដោយម្រេចរបស់ពួកគាត់លូតលាស់បានល្អ និងគ្មានជំងឺដូចម្រេចដែលដាំនៅស្រុកក្រោម។ ហើយចំពោះការចំណាយដើមទន់សម្រាប់ការដាំដំណាំម្រេចក្នុងខេត្តមណ្ឌលគិរី គឺអស់ដើមទន់តិចជាង បើប្រៀបធៀបទៅនឹងខេត្តផ្សេងៗ ដូចជាខេត្តកំពង់ចាម ខេត្តកំពតជាដើម។ ដោយសារតែដីមានតម្លៃថោក ហើយជន្លង់ម្រេចក៏មានតម្លៃថោកផងដែរ។ ដោយជន្លង់មួយដើមមានតម្លៃ ប្រហែលជា១១.០០០រៀល ទៅ១២.០០០រៀល។ ទន្ទឹមនឹងនោះ ទោះជាខេត្តមណ្ឌលគិរីជាតំបន់ភ្នំ ប៉ុន្តែសម្រាប់ការកាយស្រះយកទឹកមកផ្គត់ផ្គង់ការថែទាំដំណាំម្រេចនោះ គឺឆាប់នឹងចេញទឹក មិនមានអ្វីខុសប្លែកពីស្ថានដីធម្មតាឡើយ។
លោក សុង ឃាង ប្រធានមន្ទីរកសិកម្មបានឲ្យដឹងដែរថា ក្នុងរយៈពេលប៉ុន្មានចុងក្រោយនេះ ឃើញថាផ្ទៃដីដាំដុះដំណាំម្រេចក្នុងខេត្តមណ្ឌលគិរីបានកើនឡើងខ្ពស់គួរឲ្យកត់សម្គាល់ បើគិតត្រឹមឆ្នាំ២០១៤ គឺមានដំណាំម្រេចលើផ្ទៃដីប្រមាណ២៣៥ហិកតា ហើយតួលេខនេះបើធៀបនឹងឆ្នាំ២០១៣ មានការកើនឡើងប្រមាណជា១០០ហិកតា។ ហើយសម្រាប់ឆ្នាំ២០១៥នេះ មន្ទីរកសិកម្មខេត្តមណ្ឌលគិរីពុំទាន់គ្រោងនឹងវាយតម្លៃសម្រាប់ការបង្កបង្កើនផលដំណាំម្រេចនៅឡើយទេ ប៉ុន្តែលោកប្រធានមន្ទីរសង្ឃឹមយ៉ាងមុតមាំថា កំណើននៃការដាំដំណាំម្រេចក្នុងខេត្តនេះនឹងមានការកើនឡើងជាងឆ្នាំ២០១៤កន្លងទៅ ព្រោះបើតាមការស្រង់ស្ថិតិរបស់មន្ទីរគឺមានប្រជាពលរដ្ឋភាគច្រើននឹងដាំដំណាំម្រេចក្នុងឆ្នាំ២០១៥នេះ។
លោកបានបន្តថា ក្នុងចំណោមក្រុង-ស្រុកទាំង៥របស់ខេត្តមណ្ឌលគិរី គឺប្រជាកសិករក្នុងស្រុកពេជ្រចិន្ដាបានបង្កបង្កើនផលដំណាំម្រេចច្រើនជាងគេ។ ហើយចំពោះពូជម្រេចដែលពួកគាត់ដាំភាគច្រើនគឺមានដូចជា ពូជម្រេចកំពត និងពូជម្រេចឥណ្ឌា ប៉ុន្តែពូជម្រេចកំពតរបស់ប្រទេសកម្ពុជាយើងទទួលបានទិន្នផលល្អជាង។ លោកប្រធានមន្ទីរបានបញ្ជាក់ឲ្យដឹងទៀតថា ក្នុងឆ្នាំ២០១៤កន្លងទៅ ដំណាំម្រេចដែលទទួលបានផលមានប្រមាណជា២០ហិកតា៕
អ៊ិត ភីរុណ
0 Comments