កំពង់ឆ្នាំង ៖ ម៉ាស៊ីនអារនិងច្រៀកឈើខុសច្បាប់ជាច្រើនគ្រឿងបាននិងកំពុងធ្វើសកម្មភាពយ៉ាងអានាធិបតេយ្យនៅក្នុងភូមិកណ្ដាល ឃុំត្រពាំងចាន់ ស្រុកបរិបូណ៌ ដោយគ្មានការបង្ក្រាបពីមន្ត្រីជំនាញ ឬអាជ្ញាធរនៅក្នុងមូលដ្ឋានមានផែនការបង្ក្រាបឡើយ ដោយសារតែបែបនេះធ្វើឲ្យមានការរិះគន់ពីប្រជាពលរដ្ឋថា មន្ត្រីជំនាញទុកចិញ្ចឹមឆ្នាំងបាយហើយ ទើបបទល្មើសព្រៃឈើក្នុងចំណុចនេះគ្មានការបង្ក្រាប។ រាល់ថ្ងៃគេពិនិត្យឃើញនៅក្នុងភូមិកណ្ដាលមានម៉ាស៊ីនអារច្រៀកឈើខុសច្បាប់ចំនួនប្រមាណ៤០គ្រឿងនៅតាមផ្ទះប្រជាពលរដ្ឋក្នុងភូមិធ្វើសកម្មភាពច្រៀកឈើលាន់ទ្រហឹងខ្ទរត្រចៀក ប៉ុន្តែមិនដែលឃើញសមត្ថកិច្ចជំនាញ ឬសមត្ថកិច្ចមូលដ្ឋានធ្វើសកម្មភាពបង្ក្រាបបទល្មើសព្រៃឈើនេះឡើយដែលធ្វើឲ្យអ្នកប្រព្រឹត្តបទល្មើសរឹតតែបានចិត្ត គ្មានខ្លាចអ្នកណាឡើយ។
ប្រភពពីប្រជាពលរដ្ឋនៅទីនោះបាននិយាយឲ្យដឹងថា ឈើហ៊ុបដែលគេយកមកអារច្រៀកទាំងនោះ ត្រូវបានក្រុមល្មើសទៅកាប់ពីស្រុកលើជាប់ព្រំប្រទល់ខេត្តពោធិ៍សាត់ ដោយទៅកាប់រយៈពេល៥ទៅ៦ថ្ងៃ ទើបដឹកតាមរទេះត្រឡប់មកដល់ភូមិវិញ ហើយនាំគ្នាអារច្រៀកជាគ្រឿង រួចទើបដឹកយកទៅដាក់តាមដេប៉ូលក់ឈើនានាក្នុងស្រុកបរិបូណ៌។
លោក ពុំ ម៉េង មន្ត្រីសង្កាត់រដ្ឋបាលព្រៃឈើត្រពាំងចាន់បានឆ្លើយតាមទូរស័ព្ទឲ្យដឹងនៅព្រឹកថ្ងៃទី២៨ ខែមករា ឆ្នាំ២០១៥នេះថា លោកទទួលស្គាល់ថា ពិតជាមានបទល្មើសនេះកើតឡើងក្នុងភូមិកណ្ដាលនោះមែន ប៉ុន្តែវាជាលក្ខណៈគ្រួសារប៉ុណ្ណោះ តែលោកនឹងរាយការណ៍ជូនខណ្ឌដើម្បីរៀបចំផែនការបង្ក្រាបក្នុងពេលឆាប់ៗខាងមុខនេះ។
លោក ឃួន សៅរុំ អភិបាលស្រុកបរិបូណ៌បានឲ្យដឹងថា ឈើទាំងនោះបានដឹកពីស្រុកក្រគរ
ខេត្តពោធិ៍សាត់ យកមកអារច្រៀកនៅភូមិកណ្ដាលនេះ តែទោះថាដឹកពីណាមកក៏ខុសច្បាប់ដែរ ករណីនេះលោកបានឲ្យមន្ត្រីសង្កាត់ព្រៃឈើត្រពាំងចាន់ចុះទៅបង្ក្រាប និងធ្វើកិច្ចសន្យាបញ្ឈប់ តែបើនៅតែប្រព្រឹត្តទៀត លោកនឹងចាត់ការតាមផ្លូវច្បាប់មិនអត់ឱនឡើយ។
ប្រជាពលរដ្ឋបានប្រាប់ឲ្យដឹងថា បទល្មើសខាងលើនេះមិនមែនទើបតែកើតថ្មីៗនោះទេ គឺបានកើតឡើងយូរឆ្នាំហើយ មិនដែលឃើញមានសមត្ថកិច្ចណាបង្ក្រាបឡើយ ដែលនេះជាការជូនដំណឹងមួយរបស់អ្នកកាសែតយើងដល់ស្ថាប័នពាក់ព័ន្ធ សូមពិនិត្យមើលមន្ត្រីអសកម្មរបស់ខ្លួនផង៕
( ឈៀង ថារិទ្ធ
0 Comments