ត្បូងឃ្មុំ ៖ ក្រសួងសាធារណការបានព្រមានដល់មន្ត្រីដែលមិនអនុវត្តន៍ច្បាប់ពាក់ព័ន្ធនឹងការដឹកលើសទម្ងន់កម្រិតកំណត់របស់ក្រសួងចាត់ការអនុវត្តទៅតាមច្បាប់ និងស្នើដល់ក្រុមហ៊ុន បងប្អូន ដឹកជញ្ជូនទាំងអស់ ត្រូវអនុវត្តទៅតាមច្បាប់ដើម្បីធានាដល់គុណភាពផ្លូវនៅសាលប្រជុំសាលាខេត្តត្បូងឃ្មុំ ដែលបានប្រព្រឹត្តឡើងកាលពីព្រឹកថ្ងៃទី២៨ ខែមករា ឆ្នាំ២០១៥នេះ។
លោក ប្រាជ្ញ ចន្ទ អភិបាលនៃគណៈអភិបាលខេត្តត្បូងឃ្មុំបានមានប្រសាសន៍ថា រដ្ឋបាលខេត្តត្បូងឃ្មុំ រួមទាំងមន្ទីរ អង្គភាពពាក់ព័ន្ធបានខិតខំរួមគ្នាក្នុងការផ្សព្វផ្សាយ បញ្ជ្រាប លើកកម្ពស់ការយល់ដឹង និងឈានទៅរកការទប់ស្កាត់ បង្ក្រាប និងមានវិធានការតាមផ្លូវច្បាប់ចំពោះការដឹកជញ្ជូនលើសទម្ងន់កម្រិតកំណត់ ដើម្បីរួមចំណែកក្នុងការរឹតបន្តឹងការអនុវត្តច្បាប់បទបញ្ញត្តិពាក់ព័ន្ធនានា និងការប្រព្រឹត្តទៅនៃការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ ប៉ុន្តែយើងខ្ញុំនៅសង្កេតឃើញការប្រព្រឹត្តបទល្មើស ការមិនគោរពច្បាប់នៅតែមិនបន្តកើតមាន និងតម្រូវឲ្យមានការគិតគូរយកចិត្តទុកដាក់ ដោះស្រាយឲ្យបានម៉ឺងម៉ាត់ហ្មត់ចត់ តឹងរ៉ឹង និងមិនឲ្យមានការចូលរួមអនុវត្តពីគ្រប់សមត្ថកិច្ចដែលមានការពាក់ព័ន្ធទាំងអស់។
លោក ត្រាំ អ៊ីវតឹក រដ្ឋមន្ត្រីក្រសួងសាធារណការ និងដឹកជញ្ជូនបានថ្លែងថា ក្រុមហ៊ុន បងប្អូនដឹកជញ្ជូនត្រូវកំណត់ទៅតាមច្បាប់បានកំណត់ កាលណាយើងដឹកលើសទម្ងន់ វាបណ្ដាលឲ្យខូចផ្លូវ ពិសេសនៅរដូវវស្សា។ គោលបំណងចង់ឲ្យបងប្អូនចូលរួមជាមួយរដ្ឋអំណាចដើម្បីគោរពច្បាប់ទាំងអស់គ្នា ព្រោះផ្លូវនេះជាផ្លូវយើងដែរ កុំយល់ថា ផ្លូវនេះជាផ្លូវរបស់រដ្ឋ ចេះតែដឹកលើសទម្ងន់កម្រិតកំណត់ដើម្បីយកចំណេញ បណ្ដាលឲ្យខូចផ្លូវនោះទេ ត្រូវចូលរួមថែរក្សាទាំងអស់គ្នា។ ហើយខាងក្រុមជញ្ជីងស្ថិតក្រោមការគ្រប់គ្រងរបស់ខេត្ត ធ្វើយ៉ាងណាកុំឲ្យក្រុមនេះក្លាយជាកុងត្រូលជជុះ ចាំតែទាលុយពីក្រុមដឹកជញ្ជូន ដូចបងប្អូនចោទប្រកាន់នោះ។ ក្រុមជញ្ជីងទាំងអស់ ទាំងចល័ត អចល័ត ត្រូវមានវិញ្ញាបនបត្ររបស់ក្រសួងសាធារណការ និងដឹកជញ្ជូនបានយល់ច្បាស់ពីច្បាប់ ស្គាល់ប្រភេទរថយន្ត ដើម្បីឈានទៅធ្វើការផាកពិន័យឲ្យស្របទៅតាមលក្ខណៈច្បាប់។ សមត្ថកិច្ចធ្វើខុសពីច្បាប់ គាត់គិតតែពីទាលុយ សូមរាយការណ៍មកក្រសួង ក្រសួងនឹងចាត់ការទៅតាមផ្លូវច្បាប់៕
សាន វិឡែម
0 Comments