ស្ទឹងត្រែង ៖ បន្ទាប់ពីមន្ទីរកសិកម្មខេត្តស្ទឹងត្រែងបង្កើតសហគមន៍អភិវឌ្ឍន៍កសិកម្មនៅបណ្ដាឃុំនានាទទួលបានជោគជ័យនោះ ឃុំអូរម្រះបានបង្កើតសហគមន៍អភិវឌ្ឍន៍កសិកម្មមួយបន្ថែមទៀត ដើម្បីទទួលបានក្នុងការជួយឱ្យកសិករ មានជីវភាពធូរធារប្រសើរឡើងជាងមុនបន្ថែមទៀត។
ក្នុងមហាសន្និបាតការបង្កើតសហគមន៍អភិវឌ្ឍន៍កសិកម្មឃុំអូរម្រះនៅក្នុងស្រុកសៀមបូកខេត្តស្ទឹងត្រែងថ្មីៗនេះ។ លោក ទូច ធា ប្រធានមន្ទីរកសិកម្មខេត្តបានបញ្ជាក់ថា ប៉ុន្មានឆ្នាំចុងក្រោយនេះសហគមន៍អភិវឌ្ឍន៍កសិកម្មដែលបានបង្កើតឡើងអាចជួយកសិករឲ្យមានលទ្ធភាពបានច្រើននៅតាមមូលដ្ឋានក្នុងការផលិតកសិផលសម្រាប់លក់ដូរ តែទីផ្សារលក់នោះមានបញ្ហាប្រឈម ដោយសារក្រុមឈ្មួញទម្លាក់ថ្លៃទិញកសិផលថោក ដូចជា ស្រូវ ស្វាយចន្ទី ដំឡូងមី ពោត សណ្ដែក ល្ង ទៅតាមតែមាត់ថា។
លោកប្រធានមន្ទីរលើកឡើងថា បញ្ហាប្រឈមនេះតម្រូវឲ្យយើងបង្កើតឲ្យមានសហគមន៍កសិកម្មដើម្បីទ្រទ្រង់ដល់ផលិតផល និងស្វែងរកដៃគូជួយគាំទ្រថា ថ្ងៃនេះការបង្កើតសហគមន៍កសិកម្ម ជាឱកាសដ៏ល្អប្រពៃសម្រាប់បងប្អូនយើងទាំងអស់គ្នាដើម្បីពង្រឹងសិទ្ធអំណាចរបស់ខ្លួនក្នុងការអភិវឌ្ឍន៍វិស័យកសិកម្មការរក្សាទីផ្សារផលិតផលនិងស្វែងរកដៃគូនានា ធានានូវនិរន្តរភាពទីផ្សារ ឈានទៅលើកកំពស់ជីវភាពរស់នៅរបស់បងប្អូនឲ្យចាកផុតពីភាពក្រីក្រ ដើម្បីសម្រេចបានការងារទាំងនេះ ខ្ញុំសូមសំណូមពរដល់បណ្ដាមន្ទីរ អង្គភាព និងអង្គការពាក់ព័ន្ធនានា មេត្តាជួយគាំទ្រផ្នែករដ្ឋបាលច្បាប់ និងបច្ចេកទេសដល់សហគមន៍ អភិវឌ្ឍន៍កសិកម្មឲ្យដំណើរការ ប្រកបដោយប្រសិទ្ធភាព ជាពិសេសមន្ទីរពាណិជ្ជកម្មខេត្ត មេត្តាជួយផ្សព្វផ្សាយអំពីសក្ដានុពល ទីផ្សារក្នុង ទីផ្សារក្រៅស្រុកដល់សហគមន៍កសិកម្មយើងដើម្បីឲ្យពួកគេគាត់អាចផ្គត់ផ្គង់កសិផលតាមតម្រូវការទីផ្សារនិងទាន់ពេលវេលា។
លោក វ៉ា មឿន នាយកប្រតិបត្តិអង្គការម្លប់បៃតងបានសំដែងការគាំទ្រដល់សហគមន៍អភិវឌ្ឍន៍កសិកម្មដែលបានបង្កើតឡើង និងសន្យាជួយរកដើមទុនមកជួយយផ្គត់ផ្គង់ដើម្បីធ្វើឲ្យសហគមន៍នេះឲ្យមានការរីកចម្រើន ខ្ញុំនឹងទៅចលនាលុយពីខាងហ្នឹងមកជួយ បើសិនជាសហគមន៍អភិវឌ្ឍន៍កសិកម្មអូរម្រះនេះត្រូវការពង្រីកដើមទុនឲ្យច្រើនដើម្បីអាចបំពេញសេចក្តីត្រូវការសមាជិករបស់ខ្លួន ខ្ញុំទៅចលនាគេឲ្យមកជួយ ប៉ុន្តែជាធម្មតារបស់គេនោះ គេរកស៊ីដែរ កាលណាគេជួយគេយកការដែរតែគេយកតិច។
លោក កុល សំអុល អភិបាលខេត្តមានប្រសាសន៍ថា ការរួមចំណែកពីដៃគូជាកត្តាចំបងក្នុងការបង្កើនបាននូវធនធានសម្រាប់ជួយរៀបចំសហគមន៍ឲ្យដំណើរការទៅមាននិរន្តរភាព ទាំងផ្នែកបច្ចេកទេស ទាំងការកសាងផែនការអភិវឌ្ឍន៍ ការផលិត និងការទំនាក់ទំនងរកទីផ្សារ។ ដូចនេះរាល់សហគមន៍ដែលបានបង្កើតឡើងហើយ ត្រូវពង្រឹងសមត្ថភាពរបស់ខ្លួនដើម្បីធ្វើឲ្យសហគមន៍មានភាពរឹងមាំ សមាជិករស់នៅមានជីវភាពធូរធារ។
សូមបញ្ជាក់ថា សហគមន៍អភិវឌ្ឍន៍កសិកម្មនៅខេត្តស្ទឹងត្រែងមកដល់ពេលនេះ បង្កើតបាន ចំនួន៦ហើយ គឺនៅស្រុកសៀមបូកចំនួន២ ស្រុកថាឡាបរិវ៉ាត់ ចំនួន៣ និងស្រុកសេសានចំនួន១សហគមន៍ ដែលសហគមន៍និមួយៗមានសមាជិកចាប់ពី៤០គ្រួសាររហូតដល់ជាង១០០គ្រួសារ៕
ងិន លីម
0 Comments