ភ្នំពេញ ៖ គ្រូបង្រៀនសាលាប៊ែលធីជាជនជាតិកាណាដាម្នាក់ ដែលគេដឹងថាជាមនុស្សស្រលាញ់ភេទដូចគ្នា ត្រូវបានគេប្រទះឃើញដេកស្លាប់នៅក្នុងផ្ទះជួលបង្កជាការភ្ញាក់ផ្អើលកាលពីវេលាម៉ោង១៤និង៣០នាទីល្ងាច ថ្ងៃទី២៧ ខែមករា ឆ្នាំ២០១៥ នៅផ្ទះជួលលេខ៣៩E២ផ្លូវលេខ១៣៦ ក្រុម១៩ភូមិ១៣ សង្កាត់ផ្សារកណ្ដាល១ ខណ្ឌដូនពេញ។
សមត្ថកិច្ចបានឲ្យដឹងថា ជនបរទេសដេកស្លាប់នោះមានឈ្មោះ Mathieson Floyd Lewis ជាជនជាតិកាណាដា ឆ្នាំកំណើត១៩៥៨ មុខរបរគ្រូបង្រៀនសាលាប៊ែលធី កាន់លិខិតឆ្លងដែនលេខTx៨៤២៩៩៧ ចូលមកប្រទេសកម្ពុជាកាលពីថ្ងៃទី២៦ ខែធ្នូ ឆ្នាំ២០១៤ តាមច្រកអន្តរជាតិភ្នំពេញសព្វថ្ងៃស្នាក់នៅផ្ទះជួលកន្លែងកើតហេតុ។
បើតាមការបំភ្លឺពីឈ្មោះ ង៉ែត សីហា ភេទប្រុស ជាជនជាតិខ្មែរបានប្រាប់សមត្ថកិច្ចថា ខ្លួនបានស្គាល់ជនរងគ្រោះកាលពីចុងខែធ្នូ ឆ្នាំ២០១៤មកម្ល៉េះ គឺស្គាល់គ្នានៅក្នុងក្លិបកំសាន្តយីហោ(ខូហ្សីបារ) ដែលជាកន្លែងធ្វើការរបស់ខ្លួន។ បន្ទាប់មកជនរងគ្រោះក៏បានបបួលខ្លួនមកស្នាក់នៅជាមួយគ្នានៅក្នុងផ្ទះជួលកន្លែងកើតហេតុជាលក្ខណៈប្ដី-ប្រពន្ធ(ស្រលាញ់ភេទដូចគ្នា) លុះមកដល់ថ្ងៃទី២៧ ខែមករា ឆ្នាំ២០១៥នេះ វេលាម៉ោងប្រហែល៤ទៀបភ្លឺ ពេលដែលខ្លួនចេញពីធ្វើការវិញមកដល់បន្ទប់ជួលក៏ឃើញជនរងគ្រោះកំពុងដេកស្រមុក ហើយខ្លួនក៏ដេកនៅក្បែរគាត់ លុះមកដល់វេលាម៉ោង១៤ល្ងាច ខ្លួនបានងើបពីដេកឃើញជនរងគ្រោះដេកលែងស្រមុកយកដៃទៅដាស់ទើបដឹងថា ជនរងគ្រោះស្លាប់បាត់ទៅហើយ ពីព្រោះកន្លងមកជនរងគ្រោះធ្លាប់ប្រាប់ខ្លួនថាគាត់ចេះតែឈឺចុកចាប់បេះដូង។ ពាក់ព័ន្ធនឹងការដេកស្លាប់របស់ជនបរទេសរូបនោះ កម្លាំងគណៈកម្មការចម្រុះបានចុះពិនិត្យធ្វើកោសល្យវិច័យដោយសម្រេចបូមទឹកនោមសពយកទៅពិនិត្យព្រោះមានការសង្ស័យ៕
រស្មី
0 Comments