ប៉ោយប៉ែត ៖ មន្ត្រីរាជអាវុធហត្ថខេត្តបន្ទាយមានជ័យអូសកជំទាវអត់ក្រឹត្យម្នាក់ បញ្ជូនទៅតុលាការក្នុងព្រឹកថ្ងៃទី២៧ ខែមករា ឆ្នាំ២០១៥នេះ ដើម្បីចាត់ការតាមនីតិវិធីច្បាប់ បន្ទាប់ពីស្ត្រីខាងលើនោះ តាំងខ្លួនជាសាច់ញាតិរបស់ថ្នាក់ដឹកនាំកំពូលៗ ដើរឆបោកប្រជាពលរដ្ឋដើម្បីឲ្យមានតួនាទីជាអភិបាលក្រុងប៉ោយប៉ែត ក្រោមថវិការត់ការដ៏ច្រើនបំផុត ហើយក៏ត្រូវសមត្ថកិច្ចឃាត់ខ្លួនតែម្តង។
ក្នុងករណីចាប់ខ្លួនស្ត្រីដែលតាំងខ្លួនជាជំទាវនោះ គឺកើតមាននៅក្នុងម៉ោង១និង៥០នាទី រសៀល ថ្ងៃទី២៦ ខែមករា ឆ្នាំ២០១៥ នៅក្នុងក្រុងប៉ោយប៉ែត ស្របពេលដែលស្ត្រីរូបនេះ កំពុងធ្វើការទំនាក់ទំនងទៅម្ចាស់ភោជនីយដ្ឋានមួយឈ្មោះ នាគទិព្ធ ដើម្បីធ្វើពិធីជប់លៀងជូនទៅមន្ត្រីដែលខ្លួនបានត្រៀមរត់ការជាចៅហ្វាយក្រុងថ្មីជំនួសលោកអភិបាលក្រុង ងោ ម៉េងជ្រួនសព្វថ្ងៃនេះ ប៉ុន្តែសំណាងអាក្រក់សម្រាប់លោកជំទាវត្បាញអាយខាងលើនោះ ត្រូវបានសមត្ថកិច្ចតាមប្រមាញ់បានភ្លាមៗតែម្តង។
ចំពោះបុរសដែលត្រៀមខ្លួនឡើងជាអភិបាលក្រុងប៉ោយប៉ែតនាពេលខាងមុខនេះ ឈ្មោះ ឱក សុផាន ដែលគេស្គាល់ច្បាស់ថា ជាឈ្មួញរកស៊ីដីធ្លីនៅក្នុងក្រុងប៉ោយប៉ែត និងជាអតីតសមាគមអភិវឌ្ឍន៍កសិកម្មជាតិប្រចាំក្រុងប៉ោយប៉ែត ឯស្ត្រីដែលតាំងខ្លួនជាជំទាវនោះ មានឈ្មោះ ទ្រីណាត់បារាំងមានលំនៅដ្ឋានក្នុងរាជធានីភ្នំពេញតែម្តង បាននិងកំពុងស្ថិតក្នុងការសើបសួរបន្តទាំងជនរងគ្រោះទាំងជនបង្ក ក្នុងទីបញ្ជាការរាជអាវុធហត្ថខេត្តបន្ទាយមានជ័យ ក្រោយពេលស៊ើបសួររួចមន្ត្រីរាជអាវុធហត្ថចងក្រងសំណុំរឿងរបស់ស្ត្រីនោះ ចាត់ការបន្តទៅតុលាការតែម្តង ពីបទឆបោក ប្រជាពលរដ្ឋនៅក្នុងខេត្តបន្ទាយមានជ័យ ដូចជានៅក្រុងប៉ោយប៉ែត តាមរយៈរត់ការតម្លើងតួនាទី ជូនទៅមន្ត្រីរាជការណាមួយនោះ។
លោក ងោ ម៉េងជ្រួន អភិបាលក្រុងប៉ោយប៉ែតបានឲ្យដឹងថា ករណីភ្ញាក់ផ្អើលថា លោកត្រូវគេដកចេញពីអភិបាលក្រុងនោះ គឺវាជារឿងមិនពិតទេ។ លោកបានបន្តទៀតថា នេះជាល្បិចបោកប្រាស់របស់ជនខិលខូចទៅលើប្រជាពលរដ្ឋមួយចំនួនសម្រាប់តែផលប្រយោជន៍របស់ខ្លួនតែប៉ុណ្ណោះ។ លោក ងោ ម៉េងជ្រួន បានបន្តទៀតថា លោកជាមន្ត្រីរាជការ បើសិនជាថ្នាក់លើត្រូវការដោះដូរ ឬតែងតាំងភារកិច្ចថ្មីទេនោះ គឺលោកអនុវត្តតាមព្រះរាជក្រឹត្យ ឬអនុក្រឹត្យរបស់ក្រសួងមហាផ្ទៃ ដែលជាអ្នកចាត់ចែងតែប៉ុណ្ណោះ មិនមែនធ្វើដូចជំទាវអត់ក្រឹត្យ ដើរសម្អុយឈ្មោះលោក ហើយតម្លើងអ្នកផ្សេងមកជំនួសបានងាយដូចបកចេកនោះទេ។
ចំពោះលោក ឱក សុផាន ត្រូវបានមន្ត្រីរាជអាវុធហត្ថខេត្តបានបញ្ជាក់ថា លោកបានចាញ់បោកស្ត្រីរូបនោះមែន បើសិនជាសមត្ថកិច្ចមិនចាប់ទេ លោកក៏មិនដឹងថាខ្លួនចាញ់បោកគេដែរ។ ដោយឡែកលោក បោន ប៊ិន មេបញ្ជាការរងកងរាជអាវុធហត្ថខេត្តបន្ទាយមានជ័យ បានឲ្យដឹងថា ដោយមានបទបញ្ជាពីលោក ឪ បូរិន្ទ មេបញ្ជាការកងរាជអាវុធហត្ថខេត្តបន្ទាយមានជ័យ បានបញ្ជាក់ឲ្យរូបលោកចុះស្រាវជ្រាវនិងចាប់ខ្លួនស្ត្រីខាងលើនោះ ក្រោយមកលោកក៏បានស៊ើបអង្កេតនិងចាត់ការជនឆបោកបានតែម្តង។ លោកបានបន្តទៀតថា ខណៈពេលនេះ មន្ត្រីរបស់លោកកំពុងរៀបចំសំណុំរឿងបញ្ជូនជនល្មើសទៅតុលាការក្នុងថ្ងៃនេះ ចាត់ការតាមនីតិវិធីច្បាប់ហើយ៕
ពៅរី
0 Comments