ភ្នំពេញ ៖ ក្រុមជនសង្ស័យប្រើប្រាស់គ្រឿងញៀនចំនួន៤នាក់ ត្រូវបានកម្លាំងនគរបាលប៉ុស្តិ៍ផ្សារថ្មី៣ចុះក្របួចទាំងអស់គ្នាភ្លាមៗ ខណៈដែលពួកគេកំពុងតែប្រមូលផ្ដុំគ្នាជក់ និងប្រើប្រាស់។ ជាក់ស្តែងកាលពីវេលាម៉ោង១០ព្រឹក ថ្ងៃទី២៦ ខែមករា ឆ្នាំ២០១៥ នៅចំណុចកាំជណ្តើរជាន់ទី៣ប្លុកតាន់ប៉ា ផ្លូវលេខ១៥៤កែងផ្លូវលេខ៤៩ ភូមិ៨ សង្កាត់ផ្សារថ្មី៣ ខណ្ឌដូនពេញ។
នគរបាលមូលដ្ឋានបានឲ្យដឹងថា ក្រុមជនសង្ស័យ៤នាក់ដែលឃាត់ខ្លួននេះទី១-ឈ្មោះ ពិន រតនៈ ហៅប៉ូលី ភេទប្រុស អាយុ៣០ឆ្នាំ ស្នាកើនៅសង្កាត់ផ្សារថ្មី៣ ខណ្ឌដូនពេញ ទី២-ឈ្មោះ ឯម ពន្លឺ ហៅខា ភេទប្រុស អាយុ៣៤ឆ្នាំ ស្នាក់នៅសង្កាត់ជ្រោយចង្វា ខណ្ឌជ្រោយចង្វា ទី៣-ឈ្មោះ សុខ ពេជ្រ ភេទប្រុស អាយុ២៤ឆ្នាំ ទី៤-ឈ្មោះស ចាន់ធឿន ភេទប្រុស អាយុ២២ឆ្នាំ ពុំមានមុខរបរ និងទីលំនៅពិតប្រាកដដូចគ្នា។ ក្នុងការឃាត់ខ្លួនជនសង្ស័យនេះកម្លាំងសមត្ថកិច្ចបានដកហូតវត្ថុតាងរួមមានប្រដាប់ប្រដាសម្រាប់ជក់មួយចំនួន និងម៉ាទឹកកកមួយកញ្ចប់តូច។
ប្រភពព័ត៌មានបន្តទៀតថា មុនពេលឃាត់ខ្លួនក្រុមជនសង្ស័យទាំងនេះគឺកម្លាំងនគរបាលមូលដ្ឋានបានចេញល្បាតដើម្បីទប់ស្កាត់រាលបទល្មើសផ្សេងៗ រួចក៏ទទួលបានព័ត៌មានយ៉ាងច្បាស់ថា ក្រុមជនសង្ស័យកំពុងតែប្រមូលផ្ដុំគ្នាជក់គ្រឿងញៀននៅចំណុចកើតហេតុនោះ ទើបកម្លាំងចុះទៅដល់ឃើញជាក់ស្តែង ក៏ឃាត់ខ្លួនទាំងអស់គ្នាដើម្បីចាត់ការទៅតាមនីតិវិធីច្បាប់៕
រស្មី
0 Comments