កំពង់ឆ្នាំង ៖ ជនល្មើសម្នាក់ ត្រូវបានសមត្ថកិច្ចនគរបាលស្រុករលាប្អៀរធ្វើការប្រដេញចាប់ខ្លួនបានបន្ទាប់ពីជនល្មើសរូបនោះបានយកកាំបិតអារកនារីរងគ្រោះបំណងប្លន់យកម៉ូតូមិនបានសម្រេចជាង២ម៉ោងមុនពេលចាប់ខ្លួន។ ករណីចាប់ខ្លួនជនល្មើសខាងលើនេះ បានធ្វើឡើងនៅវេលាម៉ោង៩និង៣០នាទីយប់ ថ្ងៃទី២៩ ខែមករា ឆ្នាំ២០១៥ នៅចំណុចក្រុងវិហារយេស៊ូ ស្ថិតក្នុងភូមិទួលខ្សាច់ ឃុំជ្រៃបាក់ ស្រុករលាប្អៀរ។
លោក ទឹម ចន្ឋី អធិការនគរបាលស្រុករលាប្អៀរបាននិយាយឲ្យដឹងថា ជនល្មើសខាងលើមានឈ្មោះ ម៉េស ចាន់ធូរ អាយុ២០ឆ្នាំ ជាអ្នកស៊ីឈ្នួលយាមវិហារយេស៊ូឲ្យគេនៅភូមិទួលខ្សាច់ ឃុំជ្រៃបាក់(ជាកន្លែងកើតហេតុ) មានទីលំនៅខេត្តកំពង់ចាម បានមកស្នាក់នៅក្នុងភូមិត្រពាំចឹកសារ សង្កាត់កំពង់ឆ្នាំង ក្រុងកំពង់ឆ្នាំង។
មុនពេលកើតហេតុនៅម៉ោង៧និង៣០នាទីយប់ នារីរងគ្រោះឈ្មោះ សឿ កុលីន អាយុ១៧ឆ្នាំ មានទីលំនៅភូមិទួលខ្សាច់បានជិះម៉ូតូម៉ាកស្មាស់រីវ៉ូ ពណ៌ខ្មៅ ត្រឡប់ពីមកពីរៀននៅសាលាវិទ្យាល័យព្រះបានសុរាម្រិតក្នុងក្រុងកំពង់ឆ្នាំងវិញ ដោយបានមកឈប់នៅក្នុងដីភូមិមុខផ្ទះ ស្រាប់តែពេលនោះជនល្មើសខាងលើបានស្ទុះចេញពីក្បែរអណ្ដូងទឹកយកកាំបិតមកភ្ជង់.កកុំឲ្យនាងស្រែក តែនាងបានស្រែកឲ្យគេជួយ ពេលនោះជនល្មើសបានវាសកាំបិតមុតដាច់.កនារីរងគ្រោះចេញឈាមរហាម ហើយគេបានគេចរត់ខ្លួនបាត់តែម្តង។ ភ្លាមៗនោះដែរ សមត្ថកិច្ចនគរបាលប៉ុស្តិ៍ និងនគរបាលស្រុកបានសហការគ្នារុករកពេញភូមិជាង២ម៉ោង ទើបចាប់ជនល្មើសបាន ពេលដែលរូបគេលបៗត្រឡប់ចូលមកពួននៅកន្លែងដែលខ្លួនយាមនៅវិហាយ៉ីស៊ូវិញ។ ជនល្មើសបានធ្វើសកម្មភាពប៉ងប្លន់យកម៉ូតូ តែពេលចម្លើយសារភាពចំពោះមុខសមត្ថកិច្ច ជននេះឆ្លើយថា ភ្ជង់កាំបិតប៉ងប្លន់យកកងដៃផ្លាកទីនទៅវិញ។
ជនល្មើសឈ្មោះ ម៉េស ចាន់ធូ បានសារភាពឲ្យដឹងថា ខ្លួនត្រូវបានគេជួលឲ្យមកយាមនៅវិហារយេស៊ូ មានឈ្មោះ "វិហារជំនុំទួលខ្សាច់" ហើយបានឃើញនារីរងគ្រោះពាក់កងដៃពេលថ្ងៃ លុះយប់ឡើង ខ្លួនបានយកខ្សែនីឡុងយកទៅពួនចាំនាងចេញពីសាលាដើម្បីប្លន់យកកងដៃលក់ យកប្រាក់ផ្ញើទៅម្តាយនៅស្រុកដែលជំពាក់លុយគេ រូបគេមិនបានប្រើកាំបិតអារ.កចង់ប្លន់យកម៉ូតូនោះឡើយ។ ខ្សែនីឡុងដែលជនល្មើសអះអាងថាជាឧបករណ៍រឹតកប៉ុនប៉ងប្លន់ សមត្ថកិច្ចរកមិនឃើញទេនៅកន្លែងកើតហេតុ គឺរកឃើញតែកាំបិតកៃមួយ និងទូរស័ព្ទដៃមួយគ្រឿងជ្រុះក្នុងព្រៃ។ ចំណែកនារីរងគ្រោះបានរងរបួសផ្នែក.កស្រាល។
ជនល្មើសនិងវត្ថុតាង ត្រូវបានសមត្ថកិច្ចគរបាលស្រុករលាប្អៀរ កសាងសំណុំរឿងតាមនីតិវិធីបញ្ជូនទៅស្នងការដ្ឋាននគរបាលខេត្តដើម្បីឲ្យសមត្ថកិច្ចជំនាញបំពេញសំណុំរឿងបន្ថែមបញ្ជូនខ្លួនទៅកាន់សាលាដំបូងខេត្ត៕
ឈៀង ថារិទ្ធ
0 Comments