ភ្នំពេញ ៖ រថយន្តម៉ាកសេរីទំនើបមួយគ្រឿងមានតំលៃរាប់ម៉ឺនដុល្លារ ដែលបើកបរដោយស្ត្រីម្នាក់ បានបើកបរក្នុងល្បឿនលឿនដូចហោះជ្រុលចង្កូតទៅបុករះរនាំងដែកពុះចែកទ្រូងផ្លូវបាក់អស់៨ផ្ទាំង បណ្ដាលឲ្យដាច់ការឡេកង់មុខខាងឆ្វេង និងកាងខាងស្ដាំ ហើយបើករត់លែងរួច ក៏ប្រញាប់ចេញពីក្នុងរថយន្តគេចខ្លួនបាត់បន្សល់តែរថយន្តទុកនៅកន្លែងកើតហេតុដើម្បីឲ្យសមត្ថកិច្ចផ្នែកជំនាញចុះមកស្ទូចយកទៅរក្សាទុក។
ហេតុការណ៍គ្រោះថ្នាក់នោះបានកើតឡើងកាលពីវេលាម៉ោង០៥និង១០នាទីព្រឹក ថ្ងៃទី២៦ ខែមករា ឆ្នាំ២០១៥ នៅលើផ្លូវសហព័ន្ធរុស្ស៊ី ខាងមុខអគ្គបញ្ជាការដ្ឋានកងទ័ពជើងគោក ស្ថិតក្នុងភូមិ៩ សង្កាត់មិត្តភាព ខណ្ឌ៧មករា រាជធានីភ្នំពេញ។
សាក្សីប្រាប់ឲ្យដឹងថា មុនពេលកើតហេតុពួកគាត់បានឃើញរថយន្តម៉ាកTOUAREG ពាក់ស្លាកលេខភ្នំពេញ 2R-8885 បើកបរដោយស្រី្តម្នាក់ប្រហែលទើបចេញពីផឹកស៊ីស្រវឹងធ្លាក់ភ្នែកបានបើកបរក្នុងល្បឿនលឿនដូចហោះតាមផ្លូវសហព័ន្ធរុស្សី ក្នុងទិសដៅពីលិចទៅកើត ខណៈមកដល់ចំណុចកើតហេតុមិនដឹងជាយ៉ាងណានោះទេ ស្រាប់តែរថយន្តក៏បានរេចង្កូតទៅបុករះរនាំងដែកពុះចែកទ្រូងផ្លូវបាក់៨ផ្ទាំងធ្វើឲ្យមានការភ្ញាក់ផ្អើលដល់ប្រជាពលរដ្ឋ និងសមត្ថកិច្ចចុះដល់កន្លែងកើតហេតុ។ សាក្សីប្រាប់បន្តថា នៅក្នុងហេតុការណ៍នេះ បណ្ដាលឲ្យរថយន្តដាច់ការឡេកង់មុខខាងឆ្វេង និងកាងខាងស្ដាំ បើកទៅមុខលែងរួច ចំណែកអ្នកបើកបរក្រោយពីបុករបាំងចែកទ្រូងផ្លូវរួច ក៏មានរថយន្តសេរីទំនើបមួយទៀត បានបើកមកកន្លែងកើតហេតុ ហើយដឹកស្រី្តខាងលើគេចខ្លួនបាត់ស្រមោល។ សមត្ថកិច្ចប្រាប់ឲ្យដឹងថា ករណីបុករនាំងដែកចែកទ្រូងផ្លូវដែលបង្កដោយរថយន្តម៉ាក TOUAREG សេរីទំនើបតំលៃរាប់ម៉ឺនដុល្លារនេះ នៅមិនទាន់ស្គាល់អត្តសញ្ញាណអ្នកបើកបរបង្កហេតុនៅឡើយទេ។ ក្រោយពេលកើតហេតុសមត្ថកិច្ចបានចុះមកស្ទូចរថយន្តបង្កហេតុនោះទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញដើម្បីរង់ចាំម្ចាស់រថយន្តចូលខ្លួនមកដោះស្រាយតាមនីតិវិធី៕
រ៉ាវុទ្ធ
0 Comments