ពួកឧទ្ទាមដែលគ្រប់គ្រងរដ្ឋធានីរបស់ប្រទេសយេមែន បានវាយតបតនឹងពួកបាតុកររាប់សិបនាក់ ដែលនឹងដើរធ្វើបាតុកម្មប្រឆាំងពួកគេនៅថ្ងៃពុធ ដោយបានបាញ់កាំភ្លើងស្វ័យប្រវត្តទៅលើអាកាស ហើយនិងវាយពួកបាតុករ ដោយប្រើព្រនង់ និងកាំបិត។
អុះពើហឹង្សានេះបានធ្វើឲ្យមានការជ្រួលច្រាលកាន់តែខ្លាំង នៅក្នុងប្រទេសយេមែន ដែលគ្មានអ្នកដឹកនាំ ក្រោយពីប្រធានាធិបតីបានលាលែងពីតំណែង កាលពីសប្តាហ៍មុនក្រោមការគាបសង្កត់របស់ពួកឧទ្ទាមស៊ីអ៊ីត ដែលគេស្គាល់ថា ជាក្រុមហូធី ដែលបានចាប់លោកឃុំក្នុងផ្ទះ និងទាមទារឲ្យចែករំលែកអំណាចនោះ។
ពួកសាក្សីនិយាយថា ពួកឧទ្ទាមបានចាប់ឃុំពួកបាតុករ និងអ្នកសារព័ត៌មានជាច្រើននាក់ នៅថ្ងៃពុធហើយថា មនុស្សប្រហែល១០នាក់ ត្រូវរបួសស្រាលនៅក្នុងការវាយប្រតប់គ្នានោះ។ ប្រភពអនឡាញរបស់យេមែននិយាយថា អ្នកសារព័ត៌មានម្នាក់នៅក្នុងចំណោមពួកអ្នកសារព័ត៌មានរបស់ខ្លួន ត្រូវបានពួកហូធីចាប់ ប៉ុន្តែក្រោយមកត្រូវបានគេដោះលែងវិញ។
ក្រុមហូធីបានដណ្តើមកាន់កាប់រដ្ឋធានីសាណានៅក្នុងខែកញ្ញា ហើយសប្តាហ៍មុន បានចាប់ប្រធានាធិបតី នាយករដ្ឋមន្រ្តី និងពួកសមាជិកគណៈរដ្ឋមន្ត្រីថ្នាក់កំពូល ឃុំនៅក្នុងផ្ទះ ដោយបង្ខំឲ្យពួកគេលាលែងពីតំណែង។
ចាប់ពីពេលនោះមកបាតុកម្មប្រឆាំងក្រុមហូធី បានធ្វើនៅទូទាំងប្រទេស។ ពួកឧទ្ទាមបានចាប់ឃុំ និងអ្នកសារព័ត៌មានជាង១០នាក់នៅថ្ងៃច័ន្ទ ហើយពួកប្រឆាំងនឹងក្រុមហូធី បានអំពាវនាវឲ្យដោះលែងពួកគេ៕
0 Comments