ក្រុមខ្លាំងស្វាយរៀងលត់ក្រុមខ្សោយអាជ្ញាធរអប្សរា៦-០ ខណៈណាហ្គាវើលលត់ព្រៃវែង១៥-០
ភ្នំពេញ ៖ ព្រឹត្តិការណ៍ Hun Sen-Cup វគ្គ១ភាគ៨ផ្តាច់ព្រ័ត្រ នៅថ្ងៃទី២២ ខែមករា ឆ្នាំ២០១៥ ដែល ជាការប្រកួតក្នុងពូល C និង ពូល D ដែលមួយពូលៗមាន២ប្រកួត សរុប៤ប្រកួតនោះ ឃើញថាក្នុងចំណោមក្រុមក្នុងLeague ៥ក្រុម ដែលមានវត្តមានក្នុងការប្រកួតនេះ សុទ្ធតែឈ្នះនិងលត់ក្រុមខ្សោយៗយ៉ាងចាស់ដៃ លើកលែងតែក្រុមក្រសួងការពារជាតិមួយប៉ុណ្ណោះដែលចាញ់ ត្បិតប៉ះជាមួយក្រុមខ្លាំងជើងឯកLeague។
នៅក្នុងការប្រកួតពូល C ក្រុមបឹងកេតអង្គរ FC បានលត់ក្រុមចំណូលថ្មីសហភាពសហព័ន្ធយុវជនកម្ពុជាខេត្តបាត់ដំបង១០ទល់២។ នៅតង់ទី១-បឹងកេតអង្គរ FC នាំមុខមុនតែ២ទល់០ប៉ុណ្ណោះ តែតង់ទី២-បឹងកេតអង្គរ FC រកបាន៨គ្រាប់បន្ថែមទៀត។ មួយប្រកួតទៀតរបស់ពូល C ក្រុមភ្នំពេញក្រោន បានយកឈ្នះក្រុមក្រសួងការពារជាតិ៤ទល់០។ ការពារជាតិជាក្រុមដែលលេងជម្រុះនៅតំបន់ភ្នំពេញបានចំណាត់ថ្នាក់លេខ១ ហើយក៏ជាក្រុមដែលលេងក្នុង League ដែរ។
ក្រុមក្រសួងការពារជាតិអាចនឹងហាលអាវត្រឹមវគ្គ១ភាគ៨នេះ ដោយសារក្នុងពូលCនេះ មានក្រុមខ្លាំងក្នុងLeagueដល់ទៅ៣ គឺភ្នំពេញក្រោន បឹងកេតអង្គរFC និងការពារជាតិ ខណៈដែលក្នុង១ពូលជម្រុះយកតែ២ក្រុមឡើងប៉ុណ្ណោះ។
សម្រាប់ពូលD វិញ ក្រុមណាហ្គាវើលបានលត់ក្រុមខ្សោយខេត្តព្រៃវែង១៥ទល់០ឯណោះ។ ព្រៃវែងទំនងជាឆ្លងមិនផុតវគ្គ១ភាគ៨ឬ១៦ក្រុមចុងក្រោយនេះឡើយ។ ក្នុងពូល D នេះដែរ ក្រុមខ្លាំងខេត្តស្វាយរៀង ក៏បានលត់ក្រុមខ្សោយអាជ្ញាធរអប្សរា( កងរាជអាវុធហត្ថខេត្តសៀមរាប) ៦ទល់០ ផងដែរ។ សម្រាប់ពូល D នេះ ក្រុមខេត្តព្រៃវែង និងអាជ្ញាធរអប្សរា គឺជាក្រុមនឹងត្រូវធ្លាក់ត្រឹមនេះ ព្រោះក្រុមដែលត្រៀមឡើងមានរួចទៅហើយ គឺក្រុមណាហ្គាវើល និងស្វាយរៀង៕
វិសិទ្ធ
0 Comments