មណ្ឌលគិរី ៖ លោក គុជ សូរិយា អនុប្រធានមន្ទីរទេសចរណ៍ខេត្តមណ្ឌលគិរីឲ្យដឹងថា ទឹកជ្រោះប៊ូស្រាជាតំបន់កំសាន្តមួយសម្រាប់អ្នកទេសចរដែលមានសម្រស់ធម្មជាតិល្អដាច់គេនៅទូទាំងប្រទេសកម្ពុជា ដែលជារៀងរាល់ថ្ងៃ ប៊ូស្រាតែងតែទទួលបាននូវកំណើនអ្នកទេសចរជាតិ និងអន្តរជាតិយ៉ាងច្រើនកុះករ។ លោកបានឲ្យដឹងទៀតថា ភ្ញៀវទេសចរទាំងឡាយអាចធ្វើដំណើរទៅលេងនៅរមណីយដ្ឋានធម្មជាតិទឹកជ្រោះប៊ូស្រា ដែលស្ថិតនៅភូមិភាគឥសាន្តនៃប្រទេសកម្ពុជាបាន ដែលគ្រាន់តែចំណាយពេលធ្វើដំណើរប្រហែលជា៧ទៅ៨ម៉ោងតាមបណ្តោយផ្លូវជាតិលេខ៦ លេខ៧ និងផ្លូវជាតិលេខ៧៦ ដែលអ៊ុតកៅស៊ូរាបស្មើអមសងខាងដោយព្រៃឈើ និងជ្រលងភ្នំ លុះនៅពេលបានមកដល់ទឹកដីខេត្តមណ្ឌលគិរីហើយ គេត្រូវបន្តដំណើរចេញពីក្រុងសែនមនោរម្យតាមផ្លូវក្រួសក្រហមចំងាយប្រមាណជា៤៥គីឡូម៉ែត្រនោះនឹងបានទៅដល់ទឹកជ្រោះប៊ូស្រាដែលជាតំបន់ទេសចរណ៍មានសោភ័ណភាពល្អដាច់គេនៅទូទាំងប្រទេសដូចក្តីបំណងជាក់ជាមិនខាន។
នៅពេលបានមកដល់រមណីយដ្ឋានដែលស្ថិតនៅតំបន់ព្រៃភ្នំ និងជាតំបន់ផ្តល់សក្តានុភាពអេកូទេសចរណ៍ដ៏សំខាន់នៅលើទឹកដីរបស់បងប្អូនជនជាតិភាគតិចដ៏ស្រស់បំព្រងមួយនេះភ្លាមលោកបាននិយាយបន្ថែមឲ្យដឹងទៀតថា ពោលគ្រប់អ្នកទេសចរណ៍ប្រុស ស្រី ក្មេង ចាស់ ក៏ដូចជាភ្ញៀវទេសចរបរទេសប្រាកដជាបានរីករាយទៅនឹងសម្រស់ទេសភាពធម្មជាតិនៅតាមដងផ្លូវចូលទៅកាន់ទីនេះរួមមានចំការកៅស៊ូ ចំការដំឡូងមី ចំការម្រេច ចំការកាហ្វេ ចំការស្វាយចន្ទី និងព្រៃដុះច្រូងច្រាងអមសងខាងផ្លូវគួរឲ្យចេតនាណាស់។ បន្ទាប់ពីបានប្លែកភ្នែកជាមួយនឹងទេសភាពនៅតាមដងផ្លូវចូលទៅកាន់ទឹកជ្រោះប៊ូស្រានោះ អ្វីដែលយើងកាន់តែត្រេកត្រអាល និងជក់ចិត្តខ្លាំងនោះគឺក្នុងដំណើរទស្សនាចរណ៍ចុះតាមកាំជណ្តើរថ្មដែលមានចំនួនរាប់រយកាំ និងមានសភាពបត់បែនឃើញមានដើមរុក្ខជាតិប្លែកៗ ពិសេសដើមឫស្សីព្រេចដុះដេរដាស និងឮសូរតែសំឡេងសត្វបក្សាបក្សីយំយ៉ាងគ្រលួច លុះនៅពេលយើងបានមកជិតដល់ល្បាក់ទឹកជ្រោះប៊ូស្រានោះគេនឹងបានឃើញ និងស្ដាប់ឮសន្ធឹកទឹកធ្លាក់ខ្ទររំពងពេញព្រៃដោយម្នាក់ទទួលបាននូវភាពត្រជាក់កាយក្រៃលែង។
ពីមុខល្បាក់ទឹកធ្លាក់ក្នុងទំហំមុខកាត់ធំមហិមានោះគេឃើញមានផ្ទាំងថ្មដោយកន្លែងខ្លះអាចឲ្យអ្នកទេសចរអង្គុយលេងឬក៏អង្គុយញាំអាហារបានយ៉ាងរីករាយ និងនៅក្បែរនោះមានដើមរុក្ខជាតិនិងជ្រលងទឹកហូរធ្លាក់ទៅល្បាក់ខាងក្រោមមើលឃើញចុងព្រឹកលឹមៗព្រៃគួរឲ្យស្រាវ ហើយបើតាមការលើកឡើងបន្តរបស់លោកបានឲ្យដឹងថា ទឹកជ្រោះប៊ូស្រាមានទីតាំងនៅភូមិប៊ូស្រា ឃុំប៊ូស្រា ស្រុកពេជ្រចិន្តា វិសាលភាពពទឹកជ្រោះប៊ូស្រានេះដែរចែកចេញជា៣ដំណាក់ ដោយដំណាក់ទី១-ទឹកហូរធ្លាក់ក្នុងកំពស់ពី៨ទៅ១២ម៉ែត្រ ដែលមានមុខកាត់ទទឹង១៥ម៉ែត្រនៅរដូវវស្សា និងកំពស់ពី១០ទៅ១៥ម៉ែត្រនៅរដូវប្រាំង ដំណាក់ទី២-ទឹកហូរធ្លាក់មានកំពស់១៥ទៅ២០ម៉ែត្រ និងមុខកាត់២០ម៉ែត្រនៅរដូវវស្សា និងកំពស់១៨ទៅ២៥ម៉ែត្រ និងមុខកាត់១៣ម៉ែត្រនៅរដូវប្រាំងដែលទឹកធ្លាក់ទីនេះមានចំងាយ១៥០ម៉ែត្រពីទឹកធ្លាក់ដំណាក់ទី១ និងទឹកធ្លាក់ ដំណាក់ទី៣-ទឹកហូរធ្លាក់មានល្បឿនលឿនខ្លាំងជាល្បាក់ទី២ដោយល្បាក់នេះយើងមិនអាចធ្វើដំណើរទៅដល់នោះទេ។លោកបញ្ជាក់ឲ្យដឹងថា ខេត្តមណ្ឌលគិរីគឺជាតំបន់អេកូទេសចរណ៍មួយយ៉ាងសំខាន់ក្នុងប្រទេសកម្ពុជាដែលដែលមានសក្ដានុពលលើវិស័យទេសចរណ៍ដ៏សំបូរបែបនៃធនធានធម្មជាតិ និងជាតំបន់វប្បធម៌ដ៏ស្តុកស្តម្ភទំនៀមទម្លាប់ប្រពៃណីរបស់បងប្អូនជនជាតិភាគតិចនៅរក្សាបានគង់វង្សដែលជាចំណុចទាក់ទាញចំបងមួយ ជាក់ស្តែងដូចជានៅតំបន់ទេសចរណ៍ទឹកជ្រោះប៊ូស្រាដែលបានបរិយាយជូនខាងលើនេះគឺជាកន្លែងលេងកំសាន្តមួយដែលគេគ្រប់គ្នាទទួលស្គាល់ថាជាតំបន់ទឹកជ្រោះដែលស្អាតជាងគេនៅក្នុងដែនដីសុវណ្ណភូមិនៃប្រទេសកម្ពុជាយើង៕
ឥន្ទ្រីយ៍ទេព
0 Comments